Loina 5 - Buki Tabu Lowaenei 1919

‘UPWA 5.

¹ Ta ‘abo ‘e bweu ‘i loegesi, ona‘upa‘upa ‘enana ‘i nonona ta ‘enega, tauna to‘ita, nai i ‘itena nai ‘i mwaratonina, ‘abo nigea i ‘ina‘inana, ga ‘ina bubuna bokobokona ‘i da ‘a‘ari:

² Nai ‘abo ‘e bweu tomota iage nigea ‘esasena ‘i gitoona, nai bomitawa nigea ‘esasena ‘ina kokoa, nai bulomakau nigea ‘esasena ‘ina kokoa, nai iage si lokawara nigea ‘esasena ‘idi kokoa, ta tauna ‘enega ‘i mia kwaia, ta tauna nigea i ‘esasena, ga ‘i da to‘umali:

³ Nai ‘abo tai ‘ina iage nigea ‘esasena ‘i gitoona, to‘ase nai ‘ina iage nigea ‘esasena ‘enega nigea i ‘esasena, ta tauna ‘enega ‘i mia kwaia; ni‘atu ‘i mwaratonina, ga ‘i da to‘umali:

⁴ Nai ‘abo ‘e bweu sopanega ‘i ona‘upa‘upa manini to‘umalina sabi guinua, nai bobo‘ana sabi guinua, to‘ase nai iage nina be tai ‘i da ‘inana manini ona‘upa‘upa ‘enega, ta tauna ‘enega ‘i mia kwaia; ni‘atu ‘i mwaratonina, ga ‘i da to‘umali iage getedi ‘e bweuna ‘ediega:

⁵ Ta gete ‘i da apwesa, ni‘atu ‘i to‘umali iage getedi ‘e bweuna ‘edia, ga iage ‘enega ‘i loegesi ‘i da simana:

⁶ Ta ‘ina to‘umalina ‘ana ‘ebwaeadaita ‘i da me‘ena Ieoba ‘enaia ‘ina loegesi ‘enega ‘i loeloegesi manuna, mewainena iau ‘enega, nai lami nai gota, loegesi ‘ana ‘ebwaeadaita manuna; ta to‐taria ‘i da gienua‘ebweu manuna ‘ina loegesi leleana.

⁷ Ta ‘abo ‘ina gwegwe nigea lami ‘i sawesawenaia, ga ‘ina to‘umalina ‘ana ‘ebwaeadaita ‘i da me‘ena iage ni‘atu ‘i loegesi ‘enega manuna, bunetutu ‘e rua, nai bunebune menonoiadi ‘e rua, Ieoba ‘enaia; ‘e bweu to‘umalina ‘ana ‘ebwaeadaita manuna, ta ‘e ruena ‘ebwaeadaita gabugabuna manuna.

⁸ Ta ‘i da me‘edi to‐taria ‘enaia, ga tauna ‘i da nate to‘umalina ‘ana ‘ebwaeadaita manuna ‘i da gimi ‘ebwaeae, ta ‘otonega bulubuluna ‘i da gi‘upa iaule, ta gea‘abo ‘i da weari rua:

⁹ Ta loegesi ‘ana ‘ebwaeadaita rarana ‘enega ‘ebetaria naanaana ‘i da loseuseula; ta rara ‘i tupwatupwa ‘i da dau ‘ebetaria ‘aena ‘enaia: tauna loegesi ‘ana ‘ebwaeadaita.

¹⁰ Ta ‘e ruena ‘i da sa‘u ‘ai‘aili ‘ebwaeadaita gabugabu manuna, loina na‘ieana: ta to‐taria ‘i da gienua‐‘ebweu manuna ‘ina loegesi ni‘atu ‘i loegesiena leleana, ta ‘ina to‘umalina ‘i da kweuna.

¹¹ Ta ‘abo ‘ina gwegwe nigea bunetutu ‘e rua ‘i sawesawenaia, nai bunebune menonoiadi ‘e rua, ga ‘ina ‘ebwaeadaita iage ‘enega ni‘atu ‘i loegesi manuna ‘i da me‘ena, palaua ‘esasena epa ‘ana ‘upwa ‘e sanauna loegesi ‘ana ‘ebwaeadaita manuna; gea‘abo bunama ‘ena ‘i sa‘usa‘u, nai mu‘ana ‘e bweuna ‘enaia: tauna loegesi ‘ana ‘ebwaeadaita manuna.

¹² Ta totaria ‘ena ‘i da me‘ena, ta to‐taria tauna nimanega ‘i da sapwari ‘i da ‘ewena ‘ana ‘ebenua‘i‘isi manuna, ta ‘ebetaria ‘ena ‘i da gabuna, Ieoba ‘ana ‘ebwaeadaita aweiega ‘edia: tauna loegesi ‘ana ‘ebwaeadaita.

¹³ Ta totaria ‘i da gienua‘ebweu manuna ‘ina loegesi ni‘atu ‘i loegesiena iage getedi ‘ebweuna ‘edia leleana, ta ‘ina to‘umalina ‘i da kweuna: ta iage ‘i tupwa ‘i da e to‐taria ‘ina iage, na‘ieana ‘ebwaeadaita palaua.

¹⁴ Ta Ieoba ‘i ona Mose ‘enaia, ‘i gwae,

¹⁵ ‘Abo ‘e bweu tomota to‘umalina ‘i guinuei, ta ‘i loegesi mwagemwagena, Ieoba ‘ina iage tabu ‘edia; ga ‘ina to‘umali ‘ana ‘ebwaeadaita ‘i da me‘ena Ieoba ‘enaia, sipi me‘olotona iau ‘enega nigea ma‘ina to‘umalinamo, na‘ieana ‘imu sawa sileba ‘ena sekeliega, anua tabu ‘ina sekeli ‘atua, to‘umalina ‘ana ‘ebwaeadaita manuna:

¹⁶ Ta iage tabu ‘ena ‘i loegesi manuna ‘i da e‘isa, ta ‘ana weara ‘e nimana ‘i da sa‘u epopo ‘enaia, ta to‐taria ‘ena ‘i da ‘ebwaea‘ena: ta to‐taria ‘i da gienua‘ebweu manuna to‘umalina ‘ana ‘ebwaeadaita sipina me‘olotona ‘enega, ta ‘ina to‘umalina ‘i da kweuna.

¹⁷ Ta ‘abo ‘e bweu ‘i loegesi, ta iage ni‘atu Ieoba ‘i ona gea‘abo si da guinua ga ‘i guinuena; ‘abo nigea ‘i mwaratonina, ‘i to‘umalina tuga, ta ‘ina bubuna bokobokona ‘i da ‘a‘ari.

¹⁸ Ta iau ‘enega sipi me‘olotona nigea ma‘ina to‘umalinamo ‘i da me‘ena, na‘ieana ‘imu sawa, to‘umalina ‘ana ‘ebwaeadaita, to‐taria ‘enaia: ta to‐taria ‘i da gienua‘ebweu manuna iage ‘enega ‘i loegesi mwagemwagena ga nigea ‘i mwaratonina leleana, ta ‘ina to‘umalina ‘i da kweuna.

¹⁹ Tauna to‘umalina ‘ana ‘ebwaeadaita: tauna ‘i to‘umali ‘ai‘aila Ieoba matanaia.