Yel-iriwulaa Gane 9 - Naaŋmen Nɔpaalaa Gane

¹ A maleke banuu soba da peɛle la a o eele, ka N da nyɛ a ŋmarbiri na naŋ da yi sazu sigi le a teŋɛzu, ka ba da de a bogzuluŋ naŋ ba taa baaraa noɔre saafebiri ko o.

² O da yuo la a bogzuluŋ naŋ ba taa baaraa noɔre ka nyoore naŋ da waa ŋa vũũkpoŋ nyoore da wa yi o poɔ, ka a ŋmenaa ane a zie da ligi ne a nyoore naŋ da wa yi a bogzuluŋ naŋ ba taa baaraa poɔ.

³ Lɛ la ka sobo da wa yi a nyoore poɔ a wa be a tendaa zu, ka ba da ko a kpeɛ̃õ aŋa a teŋɛzu nanne.

⁴ Ba da yeli ko a la ka a ta sãã a moɔ bee bonzaa naŋ taa vamaara bee teɛ kanzaa, kyɛ a sãã noba na yoŋ naŋ ba taa a Naaŋmen ŋmaaroŋ a ba gberi enne.

⁵ Ba da ko a la sori ka a dɔgre ba kyuuri anuu kyɛ ta ko ba, ka a dɔgroŋ da waa ŋa naŋ naŋ maŋ teɛ neɛ ka o zɔɔrɔ o soba lɛ.

⁶ A bebie na poɔ, noba na maŋ bɔ la kũũ kyɛ koŋ nyɛ o; ba na maŋ boɔrɔ la ka ba kpi, kyɛ kũũ na maŋ zo yi la ba zie wieouŋ zaa.

⁷ A sobo da waa ŋa wie ba naŋ nare gu ne zɔɔre. Boma mine naŋ waa ŋa salema nazupile da be la a zuri eŋɛ; ka a niŋe da waa ŋa nensaalba niŋe.

⁸ A kɔɔloŋ da waa ŋa pɔgeba zukɔɔloŋ, ka a nyemɛ da waa ŋa gbeŋme nyemɛ;

⁹ a enne da taa la pɛgɛ aŋa kur-kparre ba naŋ maŋ su pɔge a nyaa, ka a begɛ gɔmɔ waa ŋa torikori ne wie yaga naŋ ŋmorɔ gɛrɛ zɔɔre.

¹⁰ A da taa la zoɛ naŋ taa piime aŋa nanne zoɛ, kyɛ a zoɛ eŋɛ la ka a kpeɛ̃õ be ka a na de dɔgre ne noba kyuuri anuu.

¹¹ A sobo naa da la a bogzuluŋ naŋ ba taa baaraa maleke; a o yuori a Hiburu kɔkɔre poɔ la Abadɔn, kyɛ ka ba boɔlɔ o a Giriki kɔkɔre poɔ meŋ ka Apoliyɔn.

¹² A dɛndɛŋ woore wa tɔle gaaɛ la, kyɛ a naŋ kyɛre la woore ayi naŋ na wa.

¹³ Lɛ la ka a maleke bayoɔbo soba da peɛle a o eele, ka N da woŋ kɔkɔre kaŋ ka o yi a eelɛ anaare na naŋ be a salema bagmaalkuuri naŋ be a Naaŋmen niŋesogɔ,

¹⁴ a yele yɛlɛ korɔ a maleke bayoɔbo soba na naŋ da taa a eele, “Lori a malekere banaare na ba naŋ leŋ a Yuferate bakpoŋ poɔ bare.”

¹⁵ Lɛ la ka ba da lori a malekere banaare na bare. Ba na la ka ba da nare gu ne a saŋ, a bebiri, a kyuu ane a yuoni ka ba ko a nensaalba poŋ ziiri ata, ziyeni.

¹⁶ A sogyɛre naŋ da zɔŋ a wie noɔre da waa la turi turi kɔɔraayi. N da woŋ la a ba noɔre naŋ seŋ lɛ.

¹⁷ Ŋaa la ka N da nyɛ a wie a n nyaabo poɔ: a wirizɔɔnema da su la kur-kparre ba naŋ maŋ su pɔge a nyaa ka a moɔ ŋa vũũ, ka a mine e suuni a waa ŋa kuuri kaŋ ba naŋ boɔlɔ safire, ka a mine waa gyirimuri. A wie zuri da waa ŋa gbeŋme zuri, ka vũũ ane nyoore ane gyirimuri da wa yi a nɔɛ poore.

¹⁸ A yelwolɔ ama ata naŋ da yire a wie nɔɛ poore, a vũũ ane a nyoore ane a gyirimuri da ko la a nensaalba poŋ ziiri ata, ziyeni.

¹⁹ Bonso, a wie kpeɛ̃õ da be la a nɔɛ pooreŋ ane a zoɛ enne. A wie zoɛ da waa ŋa weere, a taa zuri, ka a da de dɔgrɔ ne a noba.

²⁰ A nensaalba na naŋ kyɛre, a banaŋ a yelwolɔ ama naŋ da ba ko da ba leɛ a ba eebo yi a ba nuuri toma poɔ bee a bare a sefaare ane salema tebɛ ane selem-pelaa ane kuri ane kubo ane daare naŋ kontoɔ̃ nyɛ bee a woŋ bee a kyɛŋ puoruu.

²¹ Ba da ba leɛ ba eebo yi a ba neŋko poɔ, bee sɔyɛlɛ poɔ, bee a peɛ̃mo toma poɔ, bee a ba nannyigri poɔ.