Yel-iriwulaa Gane 4 - Naaŋmen Nɔpaalaa Gane

A Tenvelaa Poɔ Puoruu Yɛlɛ

¹ A ŋaa puoriŋ, N da kaaɛ la a nyɛ dendɔre ka o yuo gaŋ a tenvelaa poɔ! Ka a kɔkɔre N naŋ da daŋ woŋ ka o yele yɛlɛ korɔ ma aŋa eele, yeli, “Do wa kyɛ ka N wuli fo bon naŋ na e a yeli ŋa puoriŋ.”

² A daadaalɛ, ka a Vooroŋ Soŋ da sigi ma, ka N da nyɛ nakogi ka o be a tenvelaa poɔ, ka neɛ kaŋ da zeŋ a nakogi zu!

³ Ka a soba na naŋ da zeŋ a nakogi zu da waa ŋa kusi-veɛle mine ba naŋ boɔlɔ gyaspa ane kaneliyan, ka sagoŋgoŋ naŋ waa ŋa vaare naŋ nyegrɛ ŋmaagyili a nakogi.

⁴ Nakogri lezare ne anaare da biŋ gyeere la a nakogi na, ka nembɛrɛ lezare ne banaare naŋ da su kparpeɛle kyɛ vɔgle salema nazupile da zeŋ a nakogri zu.

⁵ Saa nyegroo ane hooroo ane saa tannoo da yire la a nakogi zie, kyɛ ka fentele ayopoĩ da dire a nakogi niŋesogɔ. A fentele ayopoĩ la a Naaŋmen seere ayopoĩ;

⁶ ka bonkaŋ da be a nakogi niŋesogɔ a waa ŋa mane koɔ̃ naŋ nyegrɛ aŋa kyaanaa, a e yileŋyileŋ aŋa biiree poɔ koɔ̃. Bonvoba anaare da are gyili la a nakogi zaa, a taa nimie yaga a niŋe ane a puori:

⁷ a bonvore dɛndɛŋ soba da waa ŋa gbeŋni, ka a ayi soba waa ŋa naadɛre, ka a ata soba niŋe waa ŋa nensaala niŋe, ka a anaare soba waa ŋa tuu naŋ ɛgrɛ.

⁸ A bonvoba anaare kanzaa maŋ taa la begɛ ayoɔbo, a taa nimie gyeere a lamboe zaa ane a pooreŋ meŋ. Ŋmenaa ane tensogɔ ka a maŋ yiele tegitegilɛ, a yele, “Soŋ, soŋ, soŋ, la a Daana Naaŋmen, a Kpeɛ̃õ Zaa Soba, Ona la da bebe, Ona la bebe, Ona la na wa.”

⁹ Saŋ na zaa a bonvoba naŋ maŋ wa danne, a eŋ, kyɛ puori a soba na naŋ zeŋ a nakogi zu ameseɛrɛ, a Onaŋ naŋ voorɔ tegitegilɛ,

¹⁰ a nembɛrɛ lezare ne banaare maŋ le vɔgle la a soba na naŋ da zeŋ a nakogi zu kyɛ puori a soba na naŋ voorɔ tegitegilɛ. Ba maŋ vɔge la a ba nazupile biŋ a nakogi niŋesogɔ, kyɛ yiele:

¹¹ “Te Daana Naaŋmen, fo seŋ ne la ka fo nyɛ puubu, emmo ane kpeɛ̃õ, bonso, fõõ la da iri a boma zaa, kyɛ a fo poboɔbo zuiŋ la ka fo da iri a, ka a da bebe.”