Yel-iriwulaa Gane 3 - Naaŋmen Nɔpaalaa Gane

A Duoro Ba Naŋ Sɛge Ko Saadise Puoruu Laŋne Deme

¹ “Sɛge ko a puoruu laŋne maleke naŋ be Saadise teŋɛ poɔ: A soba na naŋ taa a Naaŋmen seere ayopoĩ ane a ŋmarbie ayopoĩ yelbie la ama: “N baŋ la a fo tontonne; fo taa la yuori naŋ wuli ka fo voorɔ la kyɛ fo kpie la.

² Vaa-iri a ko a anaŋ naŋ kyɛre a kyɛ peɛle kũũ faŋ, bonso, N ba nyɛ a fo tontonne ka a tori a N Naaŋmen niŋesogɔ.

³ Leɛ-teɛre bonna fo naŋ da de kyɛ woŋ; sage de o, a kyɛ leɛ fo eebo. Ka fõõ koŋ vaa-iri, N na wa la aŋa nannyige, ka fo koŋ baŋ a gogo na N naŋ na wa a fo zie.

⁴ Kyɛ fo naŋ kyɛnɛ taa la noba mine belaa naŋ be a Saadise teŋɛ poɔ naŋ da ba dɛge a ba bonsuuri; ba na su la kparpeɛle ka maa ne ba laŋ kyɛŋ, bonso, ba seŋ ne la a lɛ.

⁵ Ka fõõ wa zɔɔtoɔ̃, ba na su fo la kparpelaa aŋa ba naŋ su ba lɛ, kyɛ N koŋ sãã a fo yuori bare a nyɔvore gane poɔ. N na pore la fo yosoŋ a N Saa ane O malekere niŋesogɔ.

⁶ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie.”

A Duoro Ba Naŋ Sɛge Ko Filadɛlfiya Puoruu Laŋne Deme

⁷ “Sɛge ko a puoruu laŋne maleke naŋ be a Filadɛlfiya teŋɛ poɔ: A nensoŋ na, a yelmeŋɛ soba na yelbie la ama, a onaŋ naŋ taa a Davil naaloŋ saafebiri, ona la maŋ yuo, ka neɛzaa koŋ pɔge, a maŋ pɔge ka neɛzaa kyebe na yuo:

⁸ “N baŋ la a fo tontonne. Nyɛ, N yuo la dendɔre bare fo niŋesogɔ, ka neɛzaa kontoɔ̃ pɔge o. N baŋ ka a fo kpeɛ̃õ e la belaa lɛ kyɛ ka fo naŋ nyɔge a N yelbiri taa, a ba zagre a n yuori bare.

⁹ A Setaana puoruudie noba na naŋ yeli ka ba waa la Gyuumine kyɛ ba waa, kyɛ ŋmaara zirii; N na e la ka ba wa le vɔgle muro a fo gbɛɛ puliŋ, kyɛ baŋ ka N da nɔŋ fo la.

¹⁰ Fo naŋ da sage de a N yɛlɛ taa ane kannyiri zuiŋ, N na gu fo la taa ka a dɔgɛɛ na naŋ waana a tendaa zaa ka o e a noba naŋ be a teŋɛzu nyɛ, ta pɔge fo.

¹¹ A koŋ kɔɔre kyɛ ka N wa; bonna fo naŋ taa, nyɔge taa kpeɛŋaa ka neɛzaa ta wa faa a fo nazupili.

¹² Ka fõõ wa zɔɔtoɔ̃, N na e la ka fo waa ŋa dalugri a N Naaŋmen puoruudie poɔ; fo daŋ koŋ yi o poɔ togitogi zaa. N na sɛge eŋ la fo eŋɛ a N Naaŋmen yuori ane a N Naaŋmen teŋkpoŋ yuori, a Gyɛruzɛlɛm paalaa naŋ yi a N Naaŋmen zie a tenvelaa poɔ sigre waana ane a N meŋɛ yopaalaa.

¹³ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie.”

A Duoro Ba Naŋ Sɛge Ko Laodisiya Puoruu Laŋne Deme

¹⁴ “Sɛge ko a puoruu laŋne maleke naŋ be Laodisiya teŋɛ poɔ: A Ameena, a yelmeŋɛ soba ane a yelmeŋɛ dansedire, a Naaŋmen bon-iri yiibu zie yelbie la ama:

¹⁵ “N baŋ la a fo tontonne; fo ba waa maaroŋ bee toloŋ. N da na nɔnɔ la ka fo waa maaroŋ bee toloŋ.

¹⁶ Fo naŋ waa bolɔbolɔ, a ba waa maaroŋ bee toloŋ zuiŋ, N boɔrɔ la ka N toore fo bare a N noɔre poɔ.

¹⁷ Bonso, fo yelee la, ‘N waa la bondaana, a kpɛ naaloŋ poɔ, ka bonzaa ba fãã ma.’ Fo ba baŋ ka fo zage la fo zaa, a seŋ ne nembaaloŋ zoobu, a waa nandaana, a zɔŋ, a taa eŋkpoŋkpoli.

¹⁸ Azuiŋ, N yele wullo fo la ka fo wa da salema ba naŋ nyoɔ ne vũũ yi N zie, a toɔ̃ e bondaana; wa da kparpeɛle su pɔge fo vi, ka ba ta nyɛrɛ a fo eŋkpoŋkpoli; kyɛ da tẽẽ a sɔ a fo nimie a na toɔ̃ nyɛrɛ.

¹⁹ A banaŋ N naŋ nɔŋ la ka N maŋ wuli kyɛ tage ba tobo. Azuiŋ, moɔ nimiri a leɛ fo eebo.

²⁰ Nyɛ! N are la a dendɔre noɔre a kpaara; ka fooŋ wa woŋ a N kɔkɔre, a yuo a pane, N na wa kpɛ la, a laŋ ne fo di, ka fo meŋ laŋ ne ma di.

²¹ A soba na naŋ zɔɔtoɔ̃, N na ko o la zie ka o zeŋ ne ma a N naaloŋ dakogi zu, aŋa maa meŋɛ naŋ da zɔɔtoɔ̃ a zeŋ ne a N Saa a O naaloŋ dakogi zu lɛ.

²² Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie.”