Yel-iriwulaa Gane 2 - Naaŋmen Nɔpaalaa Gane

A Duoro Ba Naŋ Sɛge Ko Efesu Puoruu Laŋne Deme

¹ “Sɛge ko a puoruu laŋne maleke naŋ be a Efesu teŋɛ poɔ: A soba na naŋ taa a ŋmarbie ayopoĩ a O nuduluŋ poɔ, a Onaŋ naŋ kyɛnɛ a salema fentel-daare ayopoĩ poɔ yelbie la ama:

² “N baŋ la a fo tontonne, a wale fo naŋ kyeenɛ ane fo kannyiri diibu. N baŋ ka fo kontoɔ̃ di kannyiri ne yelfa-erebɛ. A banaŋ naŋ boɔlɔ bamenne apostoliimine kyɛ ba waa lɛ, fo e ba la nyɛ ka ba waa zirŋmaareba.

³ N baŋɛɛ meŋ ka fo da dire la kannyiri kyɛ wono tuo a N yuori zuiŋ kyɛ ka fo nuuri ba yoɔre.

⁴ Kyɛ yeli ŋa la ka N taa ne fo, fo bare la a nɔmmo na fo naŋ da taa a piiluu saŋ.

⁵ Leɛ-teɛre nyɛ bonna naŋ da e ka fo le; leɛ fo eebo a kyɛ tonɔ a toma na fo naŋ da tonɔ a dɛndɛŋ saŋ. Ka lɛ naane, N na wa iri la a fo fentel-daa bare a o aroozie, ka fõõ ba leɛ fo eebo.

⁶ Kyɛ fo taa la garebanyɛ ne a yeli ŋa: fo kyiire la a Nikoletan deme tontonne na N meŋ naŋ kyiire.

⁷ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie. N na ko la a soba na naŋ zɔɔtoɔ̃ sori ka o di a nyɔvore teɛ wɔmɔ naŋ be a Naaŋmen tenvelaa gaaden poɔ.”

A Duoro Ba Naŋ Sɛge Ko Semaana Puoruu Laŋne Deme

⁸ “Sɛge ko a puoruu laŋne maleke naŋ be Semaana teŋɛ poɔ: A dɛndɛŋ ane a baaraa, a onaŋ naŋ da kpi kyɛ leɛ-iri voorɔ yelbie la ama:

⁹ “N baŋ la a fo woore ane a fo nandaanoŋ yɛlɛ, aneazaa ka fo waa la bondaana. N baŋ la lɛ a banaŋ naŋ yeli ka ba waa la Gyuumine kyɛ ba waa Gyuumine naŋ saana fo yuori, a waa Setaana puoruu laŋne deme.

¹⁰ Ta zoro a tuo na fo naŋ na woŋ dabeɛ̃. Gu fo meŋɛ velaa, a sebɛlbɛllɛ boɔrɔ la ka o de yɛ mine eŋ nempagdie poɔ, ka ba na toɔ̃ e yɛ nyɛ, kyɛ ka yɛ be woore poɔ beri pie. Taa yelmennoŋ te ta fo kũũ saŋ, kyɛ N na ko fo la nyɔvore nazupili.

¹¹ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie. Soba na zaa naŋ zɔɔtoɔ̃, a kũũ boyi soba kontoɔ̃ e o soba yelfaa zaa.”

A Duoro Ba Naŋ Sɛge Ko Pɛgamu Puoruu Laŋne Deme

¹² “Sɛge ko a puoruu laŋne maleke naŋ be Pɛgamu teŋɛ poɔ: A soba na naŋ taa zɔɔzɔɔ-soɔ naŋ taa nɔɛ ayi ka a dire yaga yelbie la ama:

¹³ “N baŋ la zie fo naŋ kpeɛrɛ, benee Setaana nakogi naŋ be. Kyɛ fo nyɔge la a N yuori taa kpeɛŋaa zaa, a da ba zagre a yeldeebo fo naŋ taa ne ma bare, haali a bebie na ba naŋ da ko a N dansedire Antepa, a onaŋ naŋ da taa yelmeŋɛ ne ma a yɛ sogɔŋ, benee Setaana naŋ kpeɛrɛ.

¹⁴ Kyɛ N taa la yɛlɛ mine belaa ne fo: fo taa la noba mine naŋ tuuro a Balaam wuluu a be. A Balaam la da wuli Balake ka o da de gbɛŋmɛ-le bon biŋ a Izerayɛl biiri sori poɔ, ka lɛ na vɛŋ ka ba di bondirii ba naŋ de maale ne bagre ko tebɛ a kyɛ tonɔ peɛ̃mo toma.

¹⁵ Lɛ meŋ la ka fo taa ba mine ka ba de a Nikoletan deme wuluu.

¹⁶ Yɛ leɛ a yɛ eebo. Ka lɛ naane, a koŋ la kɔɔre kyɛ ka N wa yɛ zie, a wa de a N noɔre poɔ zɔɔzɔɔ-soɔ zɔɔ ne a noba.

¹⁷ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie. Soba na zaa naŋ zɔɔtoɔ̃, N na ko o la a maana ba naŋ kontoɔ̃ nyɛ ne nimiri mine. N na ko o la kusi-pelaa ba naŋ sɛge yopaalaa neɛzaa naŋ ba baŋ eŋ, ka a soba na naŋ de o yoŋ naane.”

A Duoro Ba Naŋ Sɛge Ko Taatira Puoruu Laŋne Deme

¹⁸ “Sɛge ko a puoruu laŋne maleke naŋ be Taatira teŋɛ poɔ: A Naaŋmen Bie yelbie la ama. Ona la ka O nimie waa ŋa vũũzele, ka O gbɛɛ waa ŋa kur-zeɛ:

¹⁹ “N baŋ la a fo tontonne; a fo nɔmmo, yeldeebo, tonteroo ane fo kannyiri diibu. N baŋ ka a fo puori tontonne zuo la a dɛndɛŋ deme.

²⁰ Kyɛ N taa la yeli ŋa ne fo: fo bare la Gyɛzebɛl, a pɔge na naŋ da boɔlɔ o meŋɛ Ŋmen-yelmanna, ka o wullo, a bɛllɛ a N tontonema ka ba tonɔ peɛ̃mo toma a kyɛ dire bondirii ba naŋ de maale ne bagre ko tebɛ.

²¹ N da ko la a Gyɛzebɛl vuo ka o leɛ o eebo kyɛ ka o da zagre ka o leɛ o eebo yi a o peɛ̃mo toma poɔ.

²² Baŋ ne a, N lɔɔrɔ o la eŋnɛ baaloŋ poɔ, kyɛ a banaŋ naŋ toŋ a moɔrɔ toma ne o, ka ba naŋ ba leɛ ba eebo yi a o yel-erre poɔ, N na lɔɔ ba la eŋ dɔgroŋ kpoŋ poɔ.

²³ N na ŋmɛ la a o biiri ko, ka a puoruu laŋne yie zaa baŋ ka maa la a soba na naŋ maŋ gyɛle nensaalba poteɛrɛ ane ba sukyie. Kyɛ N na ko la yɛ kanzaa bonna a o toma naŋ seŋ ne.

²⁴ Kyɛ a yɛ banaŋ naŋ kyɛre a Taatira teŋɛ poɔ naŋ ba tu a wuluu ŋa, a ba zanne a yɛlɛ na ba mine naŋ boɔlɔ, ‘a Setaana yelsɔgle bɛrɛ.’ Yɛnee eŋ, N yele korɔ yɛ la: N koŋ la de tuotegroŋ zaa dɔgle yɛ zu;

²⁵ bonna yɛ naŋ taa, yɛ nyɔge taa kpeɛŋaa a te ta saŋ na N naŋ na wa.

²⁶ Soba na zaa naŋ zɔɔtoɔ̃ a kyɛ naŋ kyɛnɛ tonɔ a N toma te ta a baaraa, N na ko o la, kpeɛ̃õ a tenne zu;

²⁷ ka o di naaloŋ ba zu ane nimikuoŋaa, aŋa lɛ ba naŋ maŋ ŋmare yagraa dogre naŋ ba nyoɔ yi velaa;

²⁸ lɛ meŋ gba la ka N da nyɛ kpeɛ̃õ yi a N Saa zie. A soba na naŋ zɔɔtoɔ̃, N na ko o la a zinyaakyeŋkyoɔlaa ka o wuli o kpeɛ̃õ ane o zɔɔtoɔ̃mo.

²⁹ Vɛŋ ka soba na zaa naŋ taa toori kyɛlle woŋ bonna a Vooroŋ Soŋ naŋ yele korɔ a puoruu laŋne yie.”