Urom 7 - Naaŋmen Nɔpaalaa Gane

Kultaa Ba Naŋ De Manne Ne Yɛlɛ

¹ N yɔɔmine ane n yɔɔpuuli, yɛ ba baŋ ka (bonso, N yele korɔ la a banaŋ naŋ baŋ a bege) a bege tonɔ la neɛ nyɔvore poɔ saŋ na o naŋ voorɔ yoŋ be?

² Bonso, a bege wuli ka pɔge naŋ kuli serɛ na bebe la ne a o serɛ a o serɛ nyɔvore zaa saŋ. Kyɛ ka a o serɛ wa kpi, a pɔge so la o meŋɛ yi a kultaa poɔ a seŋ a bege naŋ wuli lɛ.

³ A naŋ waa lɛ, ka a o serɛ naŋ wa voorɔ kyɛ ka o te kpeɛrɛ ne dɔɔ yuo, ba na boɔlɔ o la pɔge naŋ tonɔ moɔrɔ toma. Kyɛ ka a o serɛ wa kpi, o faa la o meŋɛ yi a bege ŋa poɔ, ka o naŋ wa kuli dɔɔ yuo, o ba toŋ moɔrɔ toma.

⁴ A lɛ ne o zu la, N bamine, yɛ tu la a Kirista eŋɛ zie a kpi kyaare ne a bege, ka ka yɛ na e taa noba, kyɛ waa a soba na ba naŋ da e ka O leɛ-iri a kuuni poɔ soobo, ka lɛ vɛŋ ka yɛ wɔnɔ wɔmɔ korɔ Naaŋmen.

⁵ Te naŋ da naŋ kyɛnɛ be a nensaaloŋ poɔ, a bege da maŋ e la ka te yelbebe vɔlfaa iri, a de te nandaare tonɔ ne toma ka a wɔnɔ wɔmɔ naŋ waana ne kũũ.

⁶ Kyɛ pampana ŋa, te nyɛ la faabo yi a bege poɔ, a kpi ko a bonna naŋ da nyɔge te eŋ gbaŋgbaaloŋ poɔ. Azuiŋ te ba la waa a nɔkoraa ba naŋ da sɛge biŋ gbaŋgbaare, kyɛ te waa la gbaŋgbaare a nyɔvo-paalaa poɔ a Vooroŋ Soŋ eŋɛ.

A Bege Ane Yelbieri

⁷ Boŋ pãã ka te na yeli? Ka a bege waa la yelbieri be? A koŋ baŋ waa lɛ togitogi! Kyɛ ka a bege zuiŋ da naane N da kontoɔ̃ baŋ yelbieri. N da koŋ baŋ ka zɛnzɛŋ e la yelbieri ka a bege da ba yeli, “Ta zɛnzɛnɛ ne fo tɔ bon.”

⁸ Kyɛ yelbieri nyɛ la vuo a bege zuiŋ, a dɔ̃ɔ̃ zɛnzɛŋ boorɔ zaa ka a iri n eŋɛ a e ka n zɛnzɛnɛ ne boma zaa. A yi a bege puoriŋ, yelbieri kpie la gaŋ.

⁹ N da kpeɛrɛ la n kpeɛbo ka N ne a bege ba laŋ yelzaa, kyɛ a Naaŋmen nɔɛ naŋ da wa wa, yelbieri da la iri do la zu,

¹⁰ ka N da kpi, ka a Naaŋmen nɔɛ na ne a zu naŋ da eŋ noɔre ko ma ka N na taa la nyɔvore waa kũũ n zie.

¹¹ Bonso, yelbieri naŋ da nyɛ vuo a Naaŋmen nɔɛ zie, da bɛlle ma la a tu be a ko ma.

¹² Azuiŋ a bege waa la soŋ, ka a Naaŋmen nɔɛ waa soŋ a tori kyɛ soma.

¹³ A bonna naŋ waa soŋ la pãã wa ne kũũ N zie be? A koŋ baŋ waa lɛ togitogi! Kyɛ yelbieri la da tonɔ o toma a tu bon naŋ soma zie a de kũũ wa ne N zie, ka lɛ na vɛŋ ka yelbieri wuli ka o waa la yelbieri, kyɛ tu a Naaŋmen nɔɛ zie a leɛ waa faaloŋ naŋ ba taa mannoo.

Zɔɔre Naŋ Be Nensaala Nyɔvore Poɔ

¹⁴ Bonso, te baŋ ka a bege waa la seeloŋ yeli; kyɛ maa eŋ be la a nensaaloŋ poɔ, ka ba koɔre ma eŋ gbaŋgbaaloŋ poɔ ka N be yelbieri puliŋ.

¹⁵ N ba baŋ n meŋɛ yel-erre tɛgɛ. Bonso, N ba maŋ e a yɛlɛ na N naŋ boɔrɔ, kyɛ a yɛlɛ na N naŋ ba boɔrɔ ne a zu la ka N maŋ e.

¹⁶ Pampana ŋa, ka maa e yɛlɛ na N naŋ ba boɔrɔ, N sagɛɛ la ka a bege waa la soŋ.

¹⁷ Kyɛ serɛzaa, a ba e ka maa meŋɛ la naŋ erɛ a yɛlɛ, kyɛ a yelbieri naŋ be n eŋɛŋ la erɛ.

¹⁸ Bonso, N baŋ ka bonsoŋ zaa ba kye n eŋɛŋ, a tɛgɛ la, a N eŋɛ poɔ. N na baŋ boɔrɔ la yeli naŋ soma eebo, kyɛ N kontoɔ̃ e o.

¹⁹ Bonso, N ba maŋ toɔ̃ e a soŋ na n naŋ maŋ boɔrɔ, kyɛ a faaloŋ na n naŋ ba maŋ boɔrɔ la ka N maŋ e.

²⁰ Pampana ŋa, ka maa erɛ yɛlɛ na N naŋ ba boɔrɔ, a ba la e ka maa la naŋ erɛ, kyɛ a yelbieri naŋ be n eŋɛŋ la erɛ.

²¹ Azuiŋ, N nyɛɛ la ka o waa bege ka maa wa boɔrɔ ka N e yeli naŋ soma, faaloŋ maŋ peɛle ma la yaga.

²² Bonso, N nɔnɔ la a Naaŋmen bege ne a n sukyiri zaa,

²³ kyɛ N nyɛ la a bege kaŋ meŋ a n nandaare poɔ ka o zɔɔrɔ ne a bege naŋ be n yɛŋ poɔ, a e ka n waa neɛ ba naŋ nyɔge ko a yelbieri bege naŋ be a n nandaare poɔ.

²⁴ Maa nemba-neɛ! Nembuo la na faa ma yi a n eŋɛ ŋa naŋ na kpi zie?

²⁵ Naaŋmen taa la bareka puoruu a Yeezu Kirista te Daana zuiŋ! A lɛ zuiŋ, a n yɛŋ poɔ, N waa la Naaŋmen bege gbaŋgbaa, kyɛ ka a n eŋɛ poɔ ka N waa a yelbieri bege gbaŋgbaa.