Urom 6 - Naaŋmen Nɔpaalaa Gane

Laŋ Kpi Ne Kirista Kyɛ Leɛ-iri Ne Kirista

¹ Te pãã na yeli ka boŋ? Te mɔɔ naŋ kyɛnɛ erɛ yelbebe ka ka garaaseɛ na gore be?

² A lɛ koŋ baŋ e togitogi! Wola ka tenee naŋ kpi yelbieri eŋɛ na kyɛnɛ be yelbebe poɔ?

³ Yɛ ba baŋ ka te banaŋ zaa ba naŋ da ko te suobu a Kirista Yeezu eŋɛ, ka ba da so te la eŋ a O kũũ poɔ be?

⁴ Azuiŋ, ba laŋ ũũ te la ne a Kirista, ba naŋ da so te a suobu a eŋ O kũũ poɔ, ka ka aŋa lɛ a Saa puubu naŋ da e ka a Kirista leɛ-iri a kũũ poɔ, lɛ meŋ la ka te pãã na kyɛnɛ nyɔvo-paalaa poɔ.

⁵ Bonso, ka te kũũ ne Yeezu Kirista kũũ wa waa yeni, te kuuni poɔ leɛ-iruu meŋ sereŋ na waa la yeni ane a Yeezu Kirista kũũ leɛ-iruu.

⁶ Te baŋɛɛ la ka ba da kpa la a te eŋkoraa ne a Yeezu Kirista a dagaraa zu, ka ka a yelbieri eŋɛ na sãã, ka te na ta la waa yelbieri gbaŋgbaare.

⁷ Bonso, soba na zaa naŋ kpi, nyɛ la faabo yi yelbieri poɔ.

⁸ Kyɛ ka tenee wa laŋ ne a Kirista kpi, te sage deɛ la ka te meŋ ne O na laŋ voorɔ la.

⁹ Te baŋ ka ba naŋ da e ka a Kirista leɛ-iri a kuuni poɔ, O koŋ la baŋ kpi zaa; kũũ ba la di kpeɛ̃õ O zu.

¹⁰ A kũũ a Kirista naŋ da kpi, O da kpi la yelbieri eŋɛ, dayeni yoŋ, a ko nensaalba zaa; kyɛ a nyɔvore O naŋ voorɔ, O voorɔ korɔ la Naaŋmen.

¹¹ A lɛ zuiŋ, a ferɛɛ la ka yɛ meŋ nyɛ yɛmenne, ka yɛ kpie la yelbieri eŋɛ, kyɛ voorɔ Naaŋmen eŋɛ a Kirista Yeezu poɔ.

¹² Azuiŋ, yɛ ta vɛŋ ka yelbieri di kpeɛ̃õ yɛ enne naŋ na baŋ kpi zu, a e ka yɛ tuuro a vɔlfaare.

¹³ Yɛ ta la derɛ yɛ nandaare erɛ yelbieri aŋa faaloŋ tontomboma, kyɛ yɛ de yɛmenne ko Naaŋmen aŋa banaŋ ba naŋ e ka ba leɛ-iri kuuni poɔ a voorɔ, a de yɛ nandaare ko Naaŋmen ka a waa mennoŋ tontomboma.

¹⁴ Bonso, yelbieri koŋ la di kpeɛ̃õ yɛ zu, yɛ naŋ ba la be a bege puliŋ, kyɛ be a garaaseɛ puliŋ zuiŋ.

Sonnoŋ Gbaŋgbaare

¹⁵ Boŋ pãã la? Te erɛ yelbieri te naŋ ba la be a bege puliŋ kyɛ be a garaaseɛ puliŋ zuiŋ be? A koŋ baŋ waa lɛ togitogi!

¹⁶ Yɛ ba baŋ ka ka yɛnee de yɛmenne ko neɛzaa aŋa gbaŋgbaare naŋ sagra noɔre, yɛ waa la a neɛ na noɔre yɛ naŋ sagra gbaŋgbaare, ka yelbieri naŋ derɛ noba gɛrɛ ne kũũ poɔ, bee ka noɔre sagoo naŋ derɛ noba gɛrɛ ne mennoŋ poɔ la?

¹⁷ Kyɛ Naaŋmen taa la bareka ne yɛ naŋ da waa yelbieri gbaŋgbaare, kyɛ ka yɛ leɛ sagra noɔre a yɛ sukyie poɔ, a sage de wuluu na zaa ba naŋ da de eŋ yɛ nuuriŋ,

¹⁸ ka ka yɛnee ba naŋ da faa yi ne yelbieri poɔ leɛ waa mennoŋ gbaŋgbaare.

¹⁹ N yele la yɛlɛ nensaaloŋ poɔ, a yɛ nensaala bambaaloŋ zuiŋ. Aŋa lɛ yɛ naŋ da de yɛ nandaare ka a waa yeldɛgɛ ane faaloŋ naŋ ba poɔrɔ gbaŋgbaare, pampana ŋa, yɛ de yɛ nandaare ka a waa mennoŋ gbaŋgbaare ka yɛ na nyɛ pɛgeyiibu.

²⁰ Yɛ naŋ da waa yelbieri gbaŋgbaare, yɛ da so la yɛmenne ka yɛ ne mennoŋ da ba taa yelzaa.

²¹ Azuiŋ, boŋ tɔnɔ pãã la ka yɛ da nyɛ yi a yɛlɛ ama naŋ erɛ yɛ vi pampana? A yɛlɛ ama baaraa la kũũ.

²² Kyɛ pampana ŋa yɛ naŋ nyɛ faabo yi yelbieri poɔ, a leɛ Naaŋmen gbaŋgbaare, a tɔnɔ yɛ naŋ na nyɛ la pɛgeyiibu. A baaraa la nyɔvore naŋ ba taa baaraa.

²³ Bonso, yelbieri san-yɔɔ la kũũ, kyɛ Naaŋmen kyɔɔtaa naŋ e weɛlɛ la nyɔvore naŋ ba taa baaroo a Kirista Yeezu te Daana poɔ.