Urom 5 - Naaŋmen Nɔpaalaa Gane

Yɛlɛ Sonnoŋ Naŋ Maŋ Wa Ne

¹ Azuiŋ, te naŋ leɛ nensonne a te yeldeebo zuiŋ, te taa la emmaaroŋ ne Naaŋmen a yi te Daana Yeezu Kirista eŋɛ.

² A Yeezu Kirista zie la ka te tu a nyɛ garaaseɛ ŋa te naŋ taa; kyɛ ka te erɛ pɔloo a te teɛretɔroo te naŋ taa ka te ne Naaŋmen na laŋ la puubu.

³ Kyɛ a lɛ yoŋ naane, te erɛ la pɔloo meŋ a te dɔgɛɛ diibu poɔ, a baŋ ka dɔgɛɛ diibu maŋ waana ne la kannyiri,

⁴ ka kannyiri diibu waana ne gyogo naŋ soma, ka gyogo naŋ soma waana ne teɛretɔroo,

⁵ kyɛ a teɛretɔroo maŋ ko te la bambaare, bonso, Naaŋmen tu la a Vooroŋ Soŋ O naŋ ko te zie kyɛ paale te sukyie ne O nɔmmo.

⁶ Bonso, te naŋ da naŋ be bambaaloŋ poɔ, kyɛ a saŋ meŋɛ naŋ da wa ta, a Kirista da kpi la a yelfa-erebɛ zuiŋ.

⁷ Serɛzaa, a na waa la tuo ka neɛ kpi ko nemmeŋɛ. Kyɛ amine kaŋ neɛ na baŋ sage la ka o kpi ko nensoŋ.

⁸ Kyɛ Naaŋmen wuli la O nɔmmo ko te, bonso, te naŋ da naŋ waa yelbe-erebɛ, a Kirista da kpi la te zuiŋ.

⁹ A gaŋ a zaa, pampana ŋa Naaŋmen naŋ e ka te leɛ nemmenne a Kirista zẽẽ zuiŋ, te pãã na tu la O zie a nyɛ faabo yi a Naaŋmen supuriyaaraa poɔ.

¹⁰ Ka teneŋ da naŋ waa dɔndɔnne kyɛ ka te ne Naaŋmen da leɛ maale taa yi a O Bidɔɔ kũũ eŋɛ, serɛzaa, te naŋ leɛ maale taa, te na nyɛ la faabo a O Bidɔɔ nyɔvore zuiŋ.

¹¹ Kyɛ a gaŋ a lɛ, te erɛ la pɔloo Naaŋmen eŋɛ, a te Daana Yeezu Kirista zuiŋ. A O zuiŋ la ka te ne Naaŋmen leɛ maale taa.

Adama Ane Kirista

¹² Azuiŋ, aŋa yelbieri naŋ tu neŋyeni zie kyɛ wa a teŋɛzu, ka kũũ meŋ tu yelbieri zie a wa, a lɛ meŋ la ka kũũ yaare te ta nensaalba zaa, bonso, nensaalba zaa da e la yelbieri;

¹³ yelbieri sereŋ da daŋ kpɛ la a teŋɛzu sɛre kyɛ ka a bege wa bebe. Kyɛ yelbieri ba duoro neɛ benee a bege naŋ ba kye.

¹⁴ Kyɛ anealɛzaa, kũũ da di la naaloŋ a yi Adama te tɔ Moozul, a laŋ ne banaŋ meŋ zaa naŋ da ba e a Adama yelbieri na tɔ. A Adama waa ŋa a soba na naŋ na wa.

¹⁵ Kyɛ a Naaŋmen kyɔɔtaa na O naŋ tere weɛlɛ ba waa ŋa a Adama saanaa. Ka neŋyaga da kpi neŋyeni naŋ e yelbieri zuiŋ, bonnoo zaa ba kyebe ka Naaŋmen garaaseɛ ane a neŋyeni, a Yeezu Kirista, kyɔɔtaa naŋ e weɛlɛ be a garaaseɛ poɔ, gorɛɛ la ko neŋyaga.

¹⁶ Kyɛ a kyɔɔtaa ŋa naŋ e weɛlɛ ba waa ŋa a neŋyeni yelbieri. Bonso, a sɛrɛɛdiibu naŋ tuuro a neŋyeni saanaa wa ne la sɛrɛɛ poɔ leebu, kyɛ a kyɔɔtaa naŋ waa weɛlɛ a tuuro yelbebe yaga puori waana ne la sonnoŋ.

¹⁷ Ka a naŋ e ka neŋyeni yelbieri eebo zuiŋ la ka kũũ tu be di naaloŋ, a banaŋ naŋ de a garaase-kpoŋ ane a mennoŋ kyɔɔtaa naŋ e weɛlɛ na di la naaloŋ gaŋ a lɛ a yi a neŋyeni meŋ zie, a Yeezu Kirista.

¹⁸ Azuiŋ, a ŋa lɛ neŋyeni yelbieri eebo naŋ taa nensaalba zaa kpɛ ne weɛbo poɔ, lɛ meŋ ka neŋyeni mennoŋ eebo na taa noba zaa kpɛ ne mennoŋ ane nyɔvore poɔ.

¹⁹ Bonso, a ŋa lɛ neŋyeni noɔre zagroo naŋ e ka noba yaga leɛ yelbe-erebɛ, lɛ meŋ ka neŋyeni noɔre sagoo e ka neŋyaga nyɛ mennoŋ.

²⁰ Kyɛ a bege da waɛ la, ka o wa e ka yelbebe eebo maaleŋ do zu yaga. Benee yelbebe eebo naŋ do zu, garaaseɛ meŋ maŋ do la zu a gaŋ a lɛ,

²¹ ka aŋa lɛ yelbieri naŋ dire naaloŋ kũũ zu, a lɛ ka garaaseɛ meŋ na di naaloŋ mennoŋ zu, a waana ne nyɔvore naŋ ba taa baaraa a yi a Yeezu Kirista, te Daana zie.