Urom 3 - Naaŋmen Nɔpaalaa Gane

¹ Ka a naŋ waa lɛ boŋ tɔnɔ ka a Gyuu neɛ taa? Bee boŋ tɔnɔ ka dɛgre iruu taa?

² A taa la tɔnɔ yaga yɛlɛ zaa poɔ. Bonso, a Gyuumine la ka Naaŋmen da daŋ de O yelbiri tere ka ba kaara o zu.

³ Boŋ na e ka ba mine ba wa taa yelmeŋɛ? A yeldeebo ba naŋ ba taa na toɔ̃ sãã la Naaŋmen yelmennoŋ bare be?

⁴ A koŋ baŋ waa a lɛ! Aneazaa ka neɛzaa waa la zirŋmaara, kyɛ Naaŋmen eŋ taa la yelmeŋɛ, aŋa ba naŋ da sɛge lɛ: “Ka ka fo na nyɛ yelmennoŋ yi a fo yelbie poɔ, ka fo deme bebe a fo sɛrɛɛdiibu poɔ.”

⁵ Kyɛ ka te yelmeŋɛ bataabo wa vɛŋ ka Naaŋmen yelmennoŋ sãã, te na yeli ka boŋ? Ka Naaŋmen ba taa yelmeŋɛ ne O naŋ de O supuriyaaraa dɔgle te be? (N yelee yɛlɛ aŋa nensaala).

⁶ A koŋ baŋ waa lɛ togitogi! Ka lɛ naane wola ka Naaŋmen na toɔ̃ di a andonɛɛ sɛrɛɛ?

⁷ Kyɛ ka n zirii ŋmaabo wa vɛŋ ka Naaŋmen yelmennoŋ e ka O puubu duoro zu, bonso ka ba naŋ kyɛnɛ derɛ saanaa dɔglɔ ma aŋa yelbe-erɛ?

⁸ Ka bonso ka te koŋ yeli (aŋa noba mine naŋ saana te yuori ka tenee la yele), “Yɛ vɛŋ ka te erɛ yelfaare ka ka yelsonne wa”? A saanaa ba naŋ de duori ba seŋ ne ba la!

Neɛzaa Ba Waa Meŋɛ

⁹ Boŋ pãã la? Tenee mɔɔ eŋ seɛɛ la be? Ai, a ba waa lɛ togitogi zaa; bonso, te daŋ wulee la ka Gyuumine ane Giriki noba zaa be la yelbebe kpeɛ̃õ puliŋ,

¹⁰ aŋa ba naŋ da sɛge lɛ: “Neɛzaa kyebe a e nemmeŋɛ, neŋyeni gba kyebe;

¹¹ neɛzaa kyebe a taa yelbammo, neɛzaa kyebe a boɔrɔ Naaŋmen.

¹² Nensaalba zaa bɔrɛɛ la, ba zaa laŋ la taa a leɛ noba naŋ ba taa tɔnɔ; neɛzaa kyebe a zoro nembaaloŋ, neŋyeni zaa gba kyebe.”

¹³ “A ba kɔkɔpoore waa ŋa yaare naŋ yuo gaŋ; ka ba bɛllɛ noba ne ba zelɛ.” “Ba nɔɛ zɛle ne la dompane logi.”

¹⁴ “Ba nɔɛ paale ne la kaa-emmo ane nɔtuo.”

¹⁵ “Ba gbɛɛ maŋ e la fɔ̃ɔ̃ ka ba te kyiri zẽẽ;

¹⁶ sããmo ane laadimee be la ba sobie poɔ,

¹⁷ kyɛ ka ba ba baŋ a emmaaroŋ sobiri.”

¹⁸ “Ba ba zoro Naaŋmen togitogi zaa.”

¹⁹ Pampana ŋa te baŋ ka bonna zaa a bege naŋ yele, o yele korɔ la banaŋ naŋ da be a bege puliŋ, ka ka noɔre zaa na pɔge, kyɛ ka Naaŋmen di a andonɛɛ zaa sɛrɛɛ.

²⁰ Bonso, “nensaala zaa koŋ nyɛ mennoŋ Naaŋmen zie” a yi a tontonne a bege naŋ manne biŋ eŋɛ, bonso, a bege zie la ka yelbieri bammo maŋ yi.

Mennoŋ Naŋ Yi Yeldeebo Eŋɛ

²¹ Kyɛ pampana ŋa, a yi a bege puoriŋ, a Naaŋmen mennoŋ yi sããɛ la, ka a bege ane a Ŋmen-yelmanneba da di a danseɛ;

²² Naaŋmen wuli la O mennoŋ a ko banaŋ zaa naŋ taa yeldeebo a Yeezu Kirista eŋɛ, bonso, tɛɛtɛɛ zaa ba kyebe.

²³ A naŋ ta ka nensaalba zaa e la yelbieri a waa tɔɔre ne Naaŋmen veɛloŋ;

²⁴ ŋaa ba nyɛ la mennoŋ naŋ waa kyɔɔtaa yi Naaŋmen garaaseɛ poɔ. O da e la a ŋaa yi a faabo naŋ be a Kirista Yeezu eŋɛ,

²⁵ Ona la ka Naaŋmen iri tere ka ba maale ne bagre ka O zẽẽ yɔɔ yelbebe sane ko a banaŋ naŋ taa yeldeebo. A Naaŋmen da e la a lɛ ka O wuli O mennoŋ, bonso, a O Naaŋmennoŋ kannyiri zuiŋ la ka O da di suuri ko nensaalba yelbebe zaa ba naŋ da e;

²⁶ a da eɛɛ la ka a wuli a zenɛ ŋa ka Naaŋmen waa la meŋɛ, a korɔ banaŋ naŋ taa yeldeebo a Yeezu eŋɛ mennoŋ.

²⁷ A pɔloo eebo tɛgɛ pãã la boŋ? A ba taa tɛgɛ. Boŋ tɔ bege la? Toma tommo poɔ la be? Ai, a yeldeebo bege la ka te na tuuro.

²⁸ Bonso, tenee sage deɛ la ka neɛ maŋ leɛ la nemmeŋɛ yi o soba yeldeebo eŋɛ, kyɛ a ba e o soba toma zuiŋ, aŋa lɛ a bege naŋ yeli.

²⁹ Bee a Naaŋmen e la a Gyuumine yoŋ Naaŋmen? O mɔɔ ba e a Giriki noba meŋ Naaŋmen be? Serɛzaa Naaŋmen waa la a Nemboore-yobo meŋ Naaŋmen,

³⁰ a naŋ pãã waa ka Naaŋmen e la yeni; ka Ona la na e ka banaŋ ba naŋ iri ba dɛgre e nemmenne a yi ba yeldeebo eŋɛ, kyɛ e ka a banaŋ meŋ ba naŋ ba iri ba dɛgre leɛ nemmenne a yi a yeldeebo na ne o zu.

³¹ Te mɔɔ pãã de a bege lɔɔ bare a yeldeebo ŋa zuiŋ be? A koŋ baŋ waa lɛ togitogi! Kyɛ te na maaleŋ tuuro la a bege.