Urom 2 - Naaŋmen Nɔpaalaa Gane

A Naaŋmen Sɛrɛɛdiibu Yɛlɛ

¹ Azuiŋ, neɛ na zaa fo naŋ waa, fo ba taa gaafara zaa na tere, ka fooŋ wa dire fo taaba sɛrɛɛ. Bonso, ka fooŋ wa dire fo tɔsoba sɛrɛɛ a yeli ka o lee la, fo meŋɛ meŋ lee la, bonso, fooŋ a sɛredire meŋ erɛ la a yɛlɛ na ne a zu.

² Yɛ maŋ yeli la, “Te baŋ ka Naaŋmen sɛrɛɛdiibu kyaare ne banaŋ naŋ erɛ a yɛlɛ ama tu la a yelmeŋɛ sori.”

³ Neɛ na zaa fo naŋ waa, fo teɛre ka ka fooŋ wa di banaŋ naŋ erɛ a yɛlɛ ama sɛrɛɛ, kyɛ ka fo meŋɛ meŋ erɛ a, fo na toɔ̃ zo yi la Naaŋmen sɛrɛɛdiibu poɔ be?

⁴ Bee a Naaŋmen nimimaaroŋ kpoŋ ane O meŋɛ bantaabo ne O kannyiri la ka yɛ ba de ka a waa bonzaa? Yɛ ba baŋ ka Naaŋmen nimimaaroŋ bebe la ka ka yɛ leɛ yɛ eebo be?

⁵ Kyɛ a yɛ sukyie naŋ dare, ka yɛ zagre ka yɛ leɛ yɛ eebo zuiŋ, yɛ nara binne la yɛmenne supuriyaaraa a kyɛllɛ ne a supuriyaaraa bebiri, a daare na Naaŋmen mennoŋ sɛrɛɛdiibu naŋ na wa.

⁶ Bonso, Naaŋmen na yɔɔ la neɛzaa seŋ o meŋɛ yel-erre naŋ waa lɛ:

⁷ banaŋ zaa naŋ taa kannyiri a tonɔ tonsonne a boɔrɔ puubu, gyeremɛ ane eŋɛ naŋ koŋ baŋ kpi, Naaŋmen na ko ba la nyɔvore naŋ ba taa baaroo;

⁸ kyɛ banaŋ naŋ boɔrɔ bamenne yɛlɛ, a ba sagra a yelmeŋɛ kyɛ erɛ potuyɛlɛ na nyɛ la supuriyaaraa ane sutoloŋ.

⁹ Dɔgɛɛ ane posãã-kpoŋ na pɔge la neɛ na zaa naŋ erɛ yelfaare, a Gyuumine na la a dɛndɛŋ noba, kyɛ ka a Giriki noba meŋ pãã tu.

¹⁰ Kyɛ neɛzaa naŋ tonɔ tonsonne na nyɛ la puubu, emmo ane emmaaroŋ, a Gyuumine na la a dɛndɛŋ deme, kyɛ ka a Giriki noba meŋ pãã tu.

¹¹ Bonso, Naaŋmen ba erɛ nɔmboore.

¹² Banaŋ zaa naŋ da ba taa a bege kyɛ e yelbebe, ba na wɛ la kyɛ ka a ba e a bege zuiŋ, kyɛ banaŋ naŋ da taa a bege kyɛ e yelbebe, ba na di la ba sɛrɛɛ ne a bege.

¹³ Bonso, a ba e a banaŋ naŋ wono a bege la waa nemmenne Naaŋmen zie, kyɛ banaŋ naŋ tuuro bonna a bege naŋ wullo la na e nemmenne.

¹⁴ Ka a Nemboore-yobo naŋ ba taa a bege wa erɛ yɛlɛ ne ba yɛŋ a seŋ lɛ a bege naŋ wullo, aneazaa ka ba ba taa a bege, a ba yɛŋ teɛrɛ da e la bege a ko bamenne.

¹⁵ Ba wulee la ka bonna a bege naŋ wullo sɛge eŋ la ba sukyie poɔ ka bamenne teɛroŋ meŋ dire a danseɛ; a ba teɛrɛ naŋ ba are ziyeni na di la ba sɛrɛɛ a ko ba saanaa saŋ kaŋ, ka saŋ kaŋ meŋ ka o yeli ka ba erɛ la velaa.

¹⁶ A seŋ lɛ N naŋ moɔlɔ a Ŋmen-yelnoore, a bebiri na daare, Naaŋmen na tu la Yeezu Kirista zie kyɛ di nensaalba zaa sukyie poɔ yelsɔglɔ sɛrɛɛ.

A Gyuumine Ane A Bege Yɛlɛ

¹⁷ Kyɛ ka fooŋ pãã boɔlɔ fo meŋɛ Gyuu neɛ, a dɛle a bege kyɛ erɛ pɔloo fo ne Naaŋmen naŋ e taa noba,

¹⁸ kyɛ baŋ O poboɔbo, a baŋ bon naŋ e velaa kaa-iruu, fo naŋ nyɛ wuluu yi a bege poɔ zuiŋ,

¹⁹ ka fooŋ sereŋ baŋ velaa ka fo waa la a zɔnne guuro, a e kyaane ko a banaŋ naŋ be lige poɔ,

²⁰ a leɛrɛ dambolo ba tuluu poɔ, a waa bibiiri wulwullo, a taa bammo ane yelmeŋɛ zaa a bege poɔ,

²¹ fõõ naŋ pãã wullo fo taaba, fo koŋ wuli fo meŋɛ be? Fo naŋ moɔlɔ ka ba ta zuuro, fo na zuuro la be?

²² Fõõ naŋ yeli ka ba ta tonɔ moɔrɔ toma, fo na tonɔ la moɔrɔ toma be? Fõõ naŋ kyiiri tebɛ, fo maŋ faara la ŋmenderi boma be?

²³ Fõõ naŋ erɛ pɔloo ne a bege, fo na zagra la ka fo eŋ Naaŋmen ne fo naŋ ba tuuro a bege wuluu be?

²⁴ Bonso, ba da sɛgɛɛ la, “Ba to la Naaŋmen zone a Nemboore-yobo poɔ yɛ zuiŋ.”

²⁵ Dɛgre iruu sereŋ na taa la tɛgɛ, ka fooŋ wa tuuro a bege wuluu; kyɛ ka fooŋ ba wa tuuro a bege wuluu, fo dɛgre iruu waa seŋ ŋa neɛ dɛgre ba naŋ ba iri.

²⁶ Azuiŋ, ka banaŋ ba naŋ ba iri ba dɛgre wa erɛ seŋ lɛ a bege naŋ wullo, a ba dɛgre ba-iruu koŋ leɛ waa seŋ ŋa neɛ dɛgre ba naŋ iri be?

²⁷ Lɛ la ka banaŋ ba naŋ ba iri ba dɛgre kyɛ ka ba tuuro a bege na de saanaa dɔgle yɛ banaŋ ba naŋ da sɛge a bege ane a dɛgre iruu tere kyɛ ka yɛ ba tuuro a bege wuluu.

²⁸ Bonso, neɛ endaa naane maŋ wuli ka o waa la Gyuu neɛ, bee ka dɛgre iruu naŋ waa meŋɛ waa endaa dɛgre iruu.

²⁹ Kyɛ neɛ naŋ waa Gyuu neɛ meŋɛ la neɛ naŋ waa kaŋ o sukyiri poɔ, ka dɛgre iruu naŋ e serɛ be o soba sukyiri poɔ. A e la seɛ poɔ yeli, a ba e nimiri yelnyɛraa. A soba ŋa tɔ ba nyɛrɛ puubu yire o taaba zie, kyɛ Naaŋmen zie la ka o puubu maŋ yi.