Urom 14 - Naaŋmen Nɔpaalaa Gane

Ta Di Fo Tɔsoba Sɛrɛɛ

¹ Yɛ tuori de banaŋ naŋ ba taa faŋ ba yeldeebo poɔ, kyɛ ka a ta waa ka yɛ boɔrɔ la ka yɛ ŋmɛ nɔkpeɛne ne ba kyaare ne lɛ ba naŋ teɛrɛ.

² A noba mine naŋ taa faŋ ba yeldeebo poɔ sagɛɛ la ka ba na baŋ di la bonzaa, kyɛ ka banaŋ naŋ ba taa faŋ ba yeldeebo poɔ dire zɛvaare yoŋ.

³ A banaŋ naŋ dire ta maŋ taa kaabanyɛ kyaare ne a banaŋ naŋ ba dire, ka banaŋ naŋ ba dire ta di banaŋ naŋ dire sɛrɛɛ, bonso, Naaŋmen tuori de ba la.

⁴ Fõõ la aŋ a na di fo tɔsoba kaŋ tontonɔ sɛrɛɛ? A ba meŋɛ daana yoŋ la na baŋ yeli ka ba ba taa saanaa bee ba taa la saanaa. Ba deme na bebe la bonso, a Daana taa la kpeɛ̃õ a na e ka ba are.

⁵ A noba mine maŋ de la a bebiri kaŋ ka o seɛ kaŋ, kyɛ ka ba mine de a bebie zaa ka a waa yeni. Yɛ kanzaa ta vɛŋ ka bonnoo be o teɛroŋ poɔ.

⁶ A banaŋ naŋ maŋ taa a bebiri kaŋ yɛlɛ, maŋ erɛ la lɛ a Daana emmo zuiŋ. A lɛ meŋ la ka banaŋ naŋ maŋ dire bonzaa, maŋ dire a Daana emmo zuiŋ, ba naŋ maŋ puori Naaŋmen bareka kyɛ di zuiŋ. Lɛ la ka banaŋ naŋ ba maŋ dire a boma zaa, ba maŋ di a Daana emmo zuiŋ, kyɛ maŋ puoro Naaŋmen bareka.

⁷ Te ba so temenne nyɔvoɛ, te ba kpi ko temenne meŋ.

⁸ Ka tenee voorɔ, te voorɔ la a Daana eŋɛ, ka tenee kpi te kpi la a Daana eŋɛ. Azuiŋ ka te pãã voorɔ la bee ka te kpie la, a Daana la so te.

⁹ Bonso, a ŋaa zuiŋ la ka a Kirista da kpi kyɛ leɛ-iri voorɔ, ka ka O na e a kuuni ane a voba Daana.

¹⁰ Bonso ka fo dire fo yɔɔ bee fo yɔɔpuulee sɛrɛɛ? Bee fõõ, bonso ka fo taa kaabanyɛ ne fo yɔɔ bee fo yɔɔpuulee? Bonso, te zaa na are la a Naaŋmen sɛredi-kogi niŋesogɔ.

¹¹ Bonso, ba sɛgɛɛ la: “A Daana yelee la, N naŋ voorɔ zuiŋ, dumo zaa na gbi la N niŋesogɔ, kyɛ ka zele zaa na danna Naaŋmen.”

¹² A lɛ zuiŋ, te kanzaa na manne la o meŋɛ yɛlɛ ko Naaŋmen.

Ta Wa Erɛ Ka Fo Tɔsoba Ŋmeɛrɛ Gbɛre Lere

¹³ A lɛ zuiŋ yɛ vɛŋ ka te ta la dire taa sɛrɛɛ, kyɛ yɛ leɛ yɛ eebo a daŋ ta la de gbɛŋmɛ-le bon biŋ yɛ taaba sobie zu bee a pigi ba sobie.

¹⁴ N baŋɛɛ la kyɛ sage de ka a Daana Yeezu meŋ are ko ma la ka bonzaa ba e dɛgre o meŋɛŋ; kyɛ o maŋ e la bondɛgre a ko banaŋ naŋ teɛrɛ ka o e la bondɛgre.

¹⁵ Ka bon fo naŋ dire wa vɛŋ ka fo yɔɔ bee fo yɔɔpuulee poɔ wa sãã, ka lɛ, fo ba la kyɛnɛ nɔmmo poɔ. Ta vɛŋ ka bon fo naŋ dire e ka neɛ na zuiŋ a Kirista naŋ da kpi, wɛ.

¹⁶ A lɛ zuiŋ, ta vɛŋ ka ba yeli fo yelsonne yɛlɛ aŋa a naŋ waa yelfaare.

¹⁷ Bonso, a Naaŋmen naaloŋ ba e bondirii ane bonnyuuri yɛlɛ, kyɛ o waa la mennoŋ, emmaaroŋ ane popeɛloŋ yɛlɛ a Vooroŋ Soŋ poɔ.

¹⁸ Naaŋmen poɔ maŋ pɛle ne la soba na naŋ tonɔ korɔ a Kirista, kyɛ ka nensaalba meŋ de o yɛlɛ.

¹⁹ Yɛ pãã vɛŋ ka te boɔrɔ yɛlɛ naŋ waana ne emmaaroŋ ane te zaa baabo.

²⁰ Yɛ ta kaa bondirii yɛlɛ a sãã a Naaŋmen toma bare. Bonzaa sereŋ soma la, kyɛ a ba veɛlɛ ka fo e ka fo taaba kpɛ sããmo poɔ ne bonna fo naŋ dire.

²¹ A soma la ka fo ta ɔɔ nɛne bee a nyu tewɔmɔ dãã bee a e yelzaa naŋ na vɛŋ ka fo yɔɔ ŋmɛ gbɛre.

²² A yeldeebo fo naŋ taa, taa o ne fo poɔ zaa Naaŋmen niŋesogɔ. Banaŋ zaa naŋ ba taa yeli na yeli kyaare ne bamenne ka ba sããɛ la ne bon ba naŋ sage de zuiŋ, nyɛ la maaloo.

²³ Kyɛ banaŋ naŋ taa bonnoo bondiraa eŋɛ kyɛ di sããɛ la, ba naŋ ba e a lɛ ne yeldeebo zuiŋ. Bonso, yelzaa naŋ ba yi yeldeebo poɔ e la yelbieri.