Urom 13 - Naaŋmen Nɔpaalaa Gane

Te Feroo Toma A Teŋɛzu Wederebɛ Zie

¹ Yɛ vɛŋ ka neɛzaa maŋ sigre o meŋɛ korɔ a teŋɛzu wederebɛ; bonso, wederɛ zaa ba kyebe ka Naaŋmen zie naane ka o yi. A wederebɛ banaŋ naŋ bebe waa la noba Naaŋmen naŋ biŋ.

² Azuiŋ, soba na zaa naŋ zagra a wederebɛ noɔre, zagra la bonna Naaŋmen naŋ biŋ, kyɛ banaŋ naŋ zagra a ba nɔɛ na le la sɛrɛɛdiibu poɔ.

³ Bonso, banaŋ naŋ erɛ soŋ ba zoro namine, kyɛ banaŋ naŋ erɛ faa la na zoro ba. Fo boɔrɔ la ka fo ta zoro wederebɛ be? Ka lɛ erɛ yɛlɛ naŋ e soŋ, kyɛ ba na puu fo la;

⁴ bonso, a wederebɛ waa la Naaŋmen tontonema naŋ bebe fo maaloo zuiŋ. Kyɛ ka fõõ wa erɛ yɛlɛ naŋ e faa, fo na zoro la dabeɛ̃, bonso, a kpeɛ̃õ a wederebɛ naŋ taa ba e weɛlɛ! Ba waa la Naaŋmen tontonema ka ba korɔ yelfa-erebɛ dɔgroŋ.

⁵ Azuiŋ, a ferɛɛ la ka neɛzaa sagra noɔre, ka a ta e a Naaŋmen supuriyaaraa yoŋ zuiŋ, kyɛ a fo teɛroŋ meŋ zuiŋ.

⁶ A lɛ meŋ zuiŋ la ka yɛ maŋ yɔɔrɔ a zuyɔɔ meŋ; bonso, a wederebɛ waa la Naaŋmen tontonema naŋ kaara a yɛlɛ ŋa ne a zu.

⁷ Yɛ yɔɔ bonna zaa naŋ seŋ ka yɛ yɔɔ ko ba. Yɛ yɔɔ a yɛ zuyɔɔ ko banaŋ zaa naŋ seŋ ka ba de a yɛ zuyɔɔ, a yɔɔrɔ a teŋɛ maaloo zuyɔɔ korɔ banaŋ a naŋ seŋ ka yɛ yɔɔ ko ba. Yɛ korɔ gyeremɛ banaŋ naŋ seŋ ka ba nyɛ gyeremɛ, kyɛ eŋnɛ banaŋ naŋ seŋ ka yɛ eŋnɛ ba.

Yɛ Nɔnɔ Taa

⁸ Yɛ ta di neɛzaa sane, ka nɔmmo yɛ naŋ na nɔŋ taa naane; bonso, soba na naŋ nɔŋ o tɔsoba tu seŋ la lɛ a bege naŋ wuli.

⁹ A Naaŋmen nɔɛ ama, “Ta toŋ moɔrɔ toma; Ta ko neɛ; Ta zuuro; Ta zɛnzɛnɛ ne fo tɔ bon”; a nɔɛ ama ane a nɔɛ na zaa naŋ kyɛre laŋ la taa a kpulli a yeluu ŋa poɔ, “Nɔŋ fo tɔsoba aŋa fo meŋɛ.”

¹⁰ Nɔmmo soba ba erɛ faa korɔ o tɔsoba; azuiŋ, ka fõõ wa nɔnɔ fo taaba wuli ka fo tu la a bege ka a ta.

Yelnimizeɛ N Naŋ Sɔrɔ

¹¹ A yi a yeli ŋa puoriŋ, yɛ baŋ la bonna saŋ naŋ la ŋaa, ka a saŋ taɛ la ka yɛ iri yɛ goɔŋ poɔ. Bonso, a faabo peɛle te la pampana ŋa a gaŋ saŋ na te naŋ da wa leɛ yelderebɛ.

¹² A zie sɔgɛɛ la gaa tɔɔre yaga, ka zinyaane peɛle. Yɛ vɛŋ ka te pãã lɔɔ a ligruŋ toma bare, kyɛ de a veɛloŋ zɔɔre boma su.

¹³ Yɛ vɛŋ ka te taa gyeremɛ aŋa noba naŋ be veɛloŋ poɔ, kyɛ bare yeldɛgɛ ane daanyukuoli, a bare vɔlfaare ane nenfa-yɛlɛ, a bare zɔɔre ane nyuuri.

¹⁴ Kyɛ yɛ de a Daana Yeezu Kirista ka O waa yɛ zɔɔzɔɔ-bon, a ta bare vuo fẽẽ zaa ko a eŋɛ vɔlfaare ka a nyɛ a boɔbo.