Toma 6 - Naaŋmen Nɔpaalaa Gane

Ba Naŋ Kaa-iri Noba Bayopoi Ka Ba Na Soŋnɔ A Apostoliimine

¹ A bebie na poɔ, a potuuribo naŋ da wa yɛllɛ a erɛ yaga, a Gyuumine na naŋ da wono Giriki kɔkɔre ka ba boɔlɔ ba Hɛllɛni da zɔɔrɔ la yɛlɛ ane a Gyuumine bonso ba da ba kaara a ba pɔgkɔbɔ zie, a bebiri zaa bondirii pommu eŋɛ.

² Lɛ la ka a pie ne bayi pãã da boɔle a potuuribo zaa lantaa kyɛ yeli, “A ba seŋ ka te bare a Naaŋmen yelbiri moɔloo kyɛ pono bondirii.

³ Azuiŋ, n bamine, yɛ kaa-iri a noba poɔ, dɔbɔ bayopoi naŋ taa yosoŋ kyɛ paale ne a Vooroŋ Soŋ ane yɛŋ ka te ko ba a toma ŋa,

⁴ kyɛ ka tenee kpimare puoruu ane a yelbiri moɔloo.”

⁵ A lɛ ba naŋ da yeli da pɛle la a noba zaa poɔ, ka ba da kaa-iri Stefanuu, neɛ naŋ paale ne yeldeebo ane a Vooroŋ Soŋ, a de ne Filipi, Purokoro, Nekanɔ, Temon, Paamena ane Nikoluse naŋ yi Antoɔki teŋɛ kyɛ kpɛ a Gyuumine puoruu poɔ paaloŋ.

⁶ Ba da eɛɛ la ka ba da wa are a apostoliimine niŋesogɔ, ka ba da de ba nuuri pare ba zuri kyɛ puori ko ba.

⁷ A Naaŋmen yelbiri da yɛllɛ la ka a potuuribo meŋ da yɛllɛ yaga zaa a Gyɛruzɛlɛm teŋɛ poɔ kyɛ ka Naaŋmen bagmaalba yaga meŋ da sage de a Yeezu yɛlɛ.

A Stefanuu Nyɔgebo Yɛlɛ

⁸ A Stefanuu da paale ne la garaaseɛ ane kpeɛ̃õ a da tonɔ toŋkpeɛne kyɛ erɛ yelwulii a noba poɔ.

⁹ Lɛ la ka a noba mine naŋ da be a puoruudie na ba naŋ da boɔlɔ Gbaŋgbaare naŋ so bamenne puoruudie (aŋa lɛ ba naŋ da boɔlɔ o) ane Seeriya ane Alɛzandereya tenne noba ane noba naŋ yi Silisiya ane Ezeya da iri ŋmeɛrɛ nɔkpeɛne ne a Stefanuu.

¹⁰ Kyɛ a Vooroŋ Soŋ naŋ da ko a Stefanuu yɛŋ ka o yele ne a yɛlɛ, ba da ba toɔ̃ yeli toɔ̃ o.

¹¹ Lɛ la ka ba da sɔgle tɔ noba mine eŋ ka ba yeli, “Te woŋee la ka o to Moozul ane Naaŋmen zoma.”

¹² Ba da tɔ la a noba ane a nembɛrɛ ane a Naaŋmen bege wulwulibo eŋ a Stefanuu. Ba da wa uri nyɔge o la a taa gaa ne a sɛrediribe zie.

¹³ Ba da tɔ la zirii dansediribe eŋ ka ba yeli, “A dɔɔ ŋa daŋ ba nage ka o sãã a Naaŋmen die zisoŋ ŋa ane a Naaŋmen begɛ;

¹⁴ bonso, te woŋee la ka o yeli ka a Yeezu, a Naazɛrɛ Bie na sãã la a Naaŋmen die ŋa kyɛ leɛre a yɛlɛ na Moozul naŋ da yeli ka te tuuro.”

¹⁵ Kyɛ a banaŋ zaa naŋ da zeŋ a sɛrɛɛdiibu zie da vɔ la nimie a kaara ne a Stefanuu, a da nyɛ ka o niŋe waa ŋa maleke niŋe.