Toma 5 - Naaŋmen Nɔpaalaa Gane

Ananeɛ Ane O Pɔge Safiira Yɛlɛ

¹ Dɔɔ kaŋ yuori naŋ da di Ananeɛ ne o pɔge Safiira, da koɔre la ba weɛ;

² a da laŋ noɔre a ŋmaa a libie mine biŋ kyɛ taa a kyɛlɛɛ wa eŋ a apostoliimine nuuriŋ.

³ Ka a Piita da soore o, “Ananeɛ, bonso ka Setaana bɛlle fo ka fo ŋma zirii ko a Vooroŋ Soŋ ne fo naŋ ŋmaa a zie fo naŋ koɔre libie mine biŋ?

⁴ Fo naŋ da ba koɔre o sɛre, o da ba waa fo soobo be? Fo naŋ da wa koɔre a zie baare, a libie da ba waa fo soobo be? Wola ka a teɛroŋ ŋa tɔ wa a fo zie? Fo ba ŋmaa a zirii ŋa ko te kyɛ Naaŋmen la ka fo ŋmaa tere.”

⁵ A Ananeɛ naŋ da wa woŋ a yelbie ama, o da lee la a kpi. Dabeɛ̃ kpoŋ da kpɛ la banaŋ zaa naŋ da woŋ a yeli ŋa.

⁶ A pɔlbilii da waɛ la, a wa de pɛmɛ pilli pɔge ne o, a taa o yi gaa te ũũ.

⁷ Aŋa gogo ata puoriŋ, a o pɔge meŋ da wa kpɛɛ la, a da ba baŋ yeli na naŋ e.

⁸ Ka Piita da soore o, “Yeli ko ma, a ŋaa la ka fo ne a fo serɛ koɔre a zie be?” Ka o yeli sɔge, “Õõ, a lɛ la ka te da koɔre.”

⁹ Lɛ la ka Piita yeli ko o, “Wola la ka yɛ laŋ noɔre ka yɛ e a Daana Vooroŋ nyɛ? Nyɛ, a banaŋ naŋ gaa te ũũ a fo serɛ, bana la leɛ tara a dendɔre, ba na zɛle la fo meŋ yi ne.”

¹⁰ A paretɛloŋ lɛ, ka o da le a kpi. A pɔlbilii naŋ da wa kpɛ ba da nyɛ o la ka o kpi, ka ba de o gaa te ũũ peɛle a o serɛ.

¹¹ Dabeɛ̃ kpoŋ da kpɛ la a puoruu laŋne deme zaa ane a banaŋ zaa naŋ da woŋ a yɛlɛ ama.

A Apostoliimine Naŋ Saŋ Noba Yaga

¹² A apostoliimine da e la yɛlɛ naŋ e yelwulii kyɛ toŋ nɔmaa toma yaga a noba poɔ. Ba zaa da laŋ la taa a Solomɔn Kyaaraa poɔ.

¹³ Neŋyuo zaa da ba sage na kpɛ ba poɔ, kyɛ a noba da iri la ba yuori yaga zaa.

¹⁴ Anealɛzaa, dɔbɔ ane pɔgeba yaga naŋ da sage de a Daana yɛlɛ da laŋna ne ba la ka ba da yɛllɛ yaga.

¹⁵ A toŋkpeɛne ane a yelwulii a apostoliimine naŋ da erɛ zuiŋ, a noba da maŋ taa la baalba a yi ne a sobɛrɛ zu a te gaale gadori ne sɛnne zuri. Ba da maŋ e la lɛ, ka ka a Piita wa tɔlɔ ka o dasuoluŋ le ba mine zu.

¹⁶ Noba yaga da maŋ yi la tenne na naŋ peɛle Gyɛruzɛlɛm, a taa baalba ane banaŋ sefaare naŋ dɔgrɔ a waana ne, kyɛ ba zaa da maŋ nyɛ la sammo.

Ba Naŋ Dɔgre A Apostoliimine

¹⁷ Lɛ la ka a Naaŋmen bagmaalkare neŋkpoŋ ane a banaŋ zaa naŋ da be o zie (ba na la a Sadusiimine kpaaroŋ noba) nyuuri da iri yaga zaa.

¹⁸ A ba nyuuri zuiŋ, ba da nyɔge la a apostoliimine a pɔge a nempagdie na poɔ ba naŋ da pɔgrɔ a noba zaa.

¹⁹ Kyɛ tensogɔ saŋ a Daana maleke da wa yuo la a nempagdie dendɔre a da taa ba yi ne kyɛ yeli:

²⁰ “Yɛ gaa te are a Naaŋmen die poɔ a manna a nyɔvore ŋa yɛlɛ zaa korɔ a noba.”

²¹ Ba naŋ da wa woŋ a ŋaa, zie naŋ da wa nyaa, ba da kpɛ la a Naaŋmen die poɔ a te kanna a noba. A Naaŋmen bagmaalkare neŋkpoŋ ane a noba na naŋ da be o zie naŋ da wa ta, ba da boɔle la a sɛrediribe ane a Izerayɛl nembɛrɛ lantaa kyɛ pãã toŋ ka ba gaa a nempagdie poɔ te taa ba wa ne.

²² Kyɛ a Naaŋmen die polisiri naŋ da gaa be, ba da ba nyɛ ba a nempagdie poɔ. Lɛ la ka ba leɛ gaa te yeli:

²³ “Te nyɛ la a nempagdie ka o lare velaa zaa are, ka a dendɔ-guuribo are a dendɔreŋ kyɛ te naŋ wa yuo a dendɔɛ te da ba nyɛ neɛzaa a die poɔ.”

²⁴ A Naaŋmen die sogyɛre neŋkpoŋ ane a Naaŋmen bagmaalkare naŋ da wa woŋ a yɛlɛ ama, ba da bugee la, a ŋmeɛrɛ ba gyɛŋ ane yeli na naŋ erɛ.

²⁵ Lɛ la ka neɛ kaŋ da wa ta, a yeli ko ba, “Nyɛ, a noba na yɛ naŋ da page a nempagdie poɔ be la a Naaŋmen die poɔ are kanna a noba.”

²⁶ Lɛ la ka a Naaŋmen die neŋkpoŋ ane a polisiri da gaa te taa ba wa ne, kyɛ ba da ba de kpaŋkpaŋkpeɛ̃õ nyɔge ne ba, bonso ba da zoro la dabeɛ̃ ka a noba na za ba la ne kubo.

²⁷ Ba naŋ da taa ba wa ne, ba da eɛɛ la ka ba are a sɛrediribe niŋesɔgɔ kyɛ ka a Naaŋmen bagmaalkare neŋkpoŋ da soore ba:

²⁸ “Te da kpãã yɛ la ka yɛ ta kanna a noba a dɔɔ ŋa yuori eŋɛ, kyɛ ka yɛ paale a Gyɛruzɛlɛm zaa ne a yɛ kannoo, a boɔrɔ ka a dɔɔ ŋa zẽẽ do te.”

²⁹ Kyɛ a Piita ane a o taaba apostoliimine da yeli sɔge ba la, “A ferɛɛ la ka te sage Naaŋmen noɔre a gaŋ nensaala noɔre.

³⁰ A te sããkommine Naaŋmen la e ka a Yeezu yɛ naŋ da kpa a dagaraa zu ka O kpi, leɛ-iri a kuuni poɔ.

³¹ Naaŋmen zɛge O la ka O do zeŋ a O nuduluŋ seŋ a waa Wederɛ ane Faara, ka ka O na e ka a Izerayɛl noba nyɛ meŋɛ-leɛbo ane yelbebe sudi.

³² Te ne a Vooroŋ Soŋ la e a yɛlɛ ama dansediribe. A Vooroŋ Soŋ la ka Naaŋmen ko a banaŋ naŋ sage de O yɛlɛ.”

³³ Ba naŋ da wa te woŋ a ŋaa ba suuri da iree la ka ba da boɔrɔ ka ba ko ba.

³⁴ Kyɛ a Farazii neɛ kaŋ naŋ da be a sɛrediribe poɔ ka o yuori di Gamaleɛ, a da waa Naaŋmen begɛ wulwullo kaŋ noba zaa naŋ da eŋnɛ, da iri arɛɛ la kyɛ yeli ka ba e ka a apostoliimine yi yeŋe belaa

³⁵ O pãã da yeli ko ba la, “N taaba Izerayɛl noba, yɛ baŋ velaa bonna yɛ naŋ boɔrɔ ka yɛ e a noba bama.

³⁶ Bonso saŋ kaŋ naŋ tɔle, Tiyodase da iree la a boɔlɔ o meŋɛ neɛ kaŋ, ka noba naŋ ta ŋa kɔɔraanaare da tu o; kyɛ ba da ko o la ka a banaŋ zaa naŋ da tuuro o da zo yaare ka a yɛlɛ da baare.

³⁷ A yi a Tiyodase puoriŋ, Gyudase a Galili bie kaŋ meŋ da iree la a nensɔre saŋ a da nyɛ noba ka ba tu o. O meŋ da kpie la ka banaŋ zaa naŋ da tu o puori da zo yaare.

³⁸ Azuiŋ a yeli ŋa poɔ, N yele korɔ yɛ la, yɛ iri yɛ nu a noba bama zie kyɛ vɛŋ ba, bonso, ka a yeli ŋa bee a tone ŋa wa yi nensaala zie, o na le la;

³⁹ kyɛ ka o naŋ wa yi Naaŋmen zie, yɛ koŋ baŋ zɔɔtoɔ̃ ba. Ka lɛ naane yɛ na wa berɛ ka yɛ zɔɔrɔ ne la Naaŋmen!” A noba da de la a o wuluu.

⁴⁰ Kyɛ ba naŋ da wa boɔle a apostoliimine ka ba kpɛ wa, ba da feɛ ba la kyɛ kpãã ba ka ba ta wa daŋ la porɔ a Yeezu yuori, kyɛ bare ba ka ba gaa.

⁴¹ Ba naŋ da wa yi a sɛrɛɛdiibu zie, ba da kyellɛ la ne ba meŋ naŋ seŋ ne ka ba di vi a Yeezu yuori eŋɛ.

⁴² Bie zaa a Naaŋmen die poɔ ane a ba yie poɔ ba da maŋ kanna la kyɛ moɔlɔ korɔ a noba ka a Yeezu la a Mɛzaaya.