Toma 2 - Naaŋmen Nɔpaalaa Gane

A Vooroŋ Soŋ Waabo Yɛlɛ

¹ A Pɛnteko daare naŋ da wa ta, ba zaa da laŋ la taa ziyeni.

² A paretɛloŋ lɛ, ba da wa berɛ ka gɔnne deɛ yi sazu aŋa sasekpeɛŋaa a fuuro a wa paale a die na ba naŋ da zeŋ poɔ zaa.

³ Lɛ la ka ba da nyɛ boma naŋ waa ŋa vũũzelɛ, ka a sigi wa dɔgle ba yeni yeni zaa zu.

⁴ Ba zaa da paale ne la a Vooroŋ Soŋ a piili yele kɔkɔyobo a seŋ lɛ a Vooroŋ Soŋ naŋ ko ba faŋ ka ba yele.

⁵ A saŋ ŋa poɔ, a Gyuumine puoruu nimizeɛ deme naŋ da yi a tendaa zaa da kpeɛrɛ la a Gyɛruzɛlɛm poɔ.

⁶ Kyɛ a gɔnne ŋa zuiŋ, a nembeɛoŋ da laŋ la taa, ka ba nɔɛ zaa da maa bonso ba yeni yeni zaa da woŋee la ka ba yele o meŋɛ teŋɛ kɔkɔre.

⁷ A da e ba la nɔmaa ka ba da nyɔge nɔɛ a soorɔ, “A bama zaa naŋ yele a yɛlɛ ba waa Galili noba bee?

⁸ Kyɛ a ta la wola ka te yeni yeni zaa wono o meŋɛ kɔkɔre ka ba yele?

⁹ Pantiya noba, Midiya noba, Elam noba, ane noba naŋ kpeɛrɛ Mɛsopotamiya, Gyudiya ane Kapadosiya, Pɔntuse ane Ezeya,

¹⁰ Firigyeya ane Pamfiliya noba, Igyipiti deme ane noba naŋ yi Libiya tenne mine naŋ peɛle Saarin, ane sããma naŋ yi Urom, a Gyuumine ane a banaŋ naŋ kpɛ a Gyuumine puoruu poɔ paaloŋ,

¹¹ Kirite ane Arab noba, te zaa woŋee la ka ba yele te kɔkɔre a manna a Naaŋmen toŋkpeɛne.”

¹² Ba zaa nɔɛ da maaɛ la, ka ba bugi ba zaa, a soorɔ taa, “A yeli ŋa tɛge la boŋ?”

¹³ Kyɛ ka ba mine da erɛ ba laara, a da yele, “A noba bama nyu la dãã kuoli.”

A Piita Naŋ Kanne Noba

¹⁴ Kyɛ Piita ne a pieneyeni na da are la dendeŋ, ka Piita zɛge o kɔkɔre a yeli ko ba, “Gyudiya noba ane banaŋ zaa naŋ kpeɛrɛ Gyɛruzɛlɛm poɔ, yɛ baŋ a yeli ŋa, kyɛ eŋ toori kyɛllɛ bonna N naŋ yele.

¹⁵ Serɛzaa, a noba bama ba nyu dãã kuoli aŋa yɛ naŋ teɛre lɛ, bonso gbelli awae baguo saŋ naŋ la ŋaa.

¹⁶ Ai, a yɛlɛ ama la ka a Ŋmen-yelmanna Gyuwɛl da yeli:

¹⁷ ‘Naaŋmen yelee la, a bebi-baare saŋ a yɛlɛ ama na e la, N na paale la a noba zaa ne N Vooroŋ, ka yɛ bidɔbɔ ane pɔgeyaare na yele Ŋmen-yelmanna yelyelii, ka yɛ pɔlbilii nyɛrɛ yelnyɛre, ka yɛ dɔɔnyaŋne zanna zannoo.

¹⁸ A bebie na poɔ, N na paale la n gbaŋgba-dɔbɔ ane n gbaŋgba-pɔgeba ne a N Vooroŋ Soŋ; ka ba na yele Ŋmen-yelmanna yelyelii.

¹⁹ Kyɛ ka N e ka nɔmaa yɛlɛ sãã a saluoni poɔ ka yelwulii sãã a teŋɛzu, zẽẽ ane vũũ ane nyoore naŋ ŋmeɛlɛ duoro.

²⁰ A ŋmenaa na leɛ la ligruŋ ka a kyuu leɛ e zeɛ aŋa zẽẽ a ama zaa na e la kyɛ ka a Daana bebi-kpoŋ pãã ta.

²¹ Lɛ la ka neɛ na zaa naŋ boɔle a Daana yuori na nyɛ faabo.’

²² Yɛnee naŋ waa Izerayɛl noba, yɛ eŋ toori kyɛlle woŋ bonna N naŋ taa na yeli: Yeezu a Naazɛrɛ Bie, neɛ Naaŋmen naŋ sage de a e ka o toŋ toŋkpeɛne ane nɔmaa toma ane yelwulii ka a sãã yɛ zie, aŋa yɛmenne naŋ baŋ lɛ.

²³ A Yeezu ŋa la ka ba da de tere a seŋ a Naaŋmen naŋ da daŋ baŋ kyɛ nare biŋ. Ona la ka yɛ e ka a yɛ nenfaare a kpa dagaraa zu a ko.

²⁴ Kyɛ Naaŋmen da faa O la, a e ka O leɛ-iri a kuuni poɔ, bonso, kũũ da ba taa faŋ a na toɔ̃ nyɔge O taa.

²⁵ Bonso, Davil da yeli kyaare ne o la: ‘N nyɛ la a Daana n niŋesogɔ tegitegilɛ, bonso o be la n nuduluŋ ka N na ta miine;

²⁶ Azuiŋ, N poɔ da pɛlɛɛ la ka N da kyellɛ, kyɛ lɛ yoŋ naane, N na voorɔ la ne teɛretɔroo

²⁷ Bonso, fo koŋ bare a n seɛ ka o kpɛ dazugovũũ, bee a vɛŋ ka a fo Nensoŋ poɔ̃.

²⁸ Fo eɛɛ la ka N baŋ nyɔvore sobie; fo na e la ka n be fo niŋesogɔ a paale ne popeɛloŋ.’

²⁹ N taaba Izerayɛl noba, N na baŋ ŋmɛ la nyaa a yeli ko yɛ ka a te sããkoma Davil da kpie la ka ba ũũ o, ka a o yaa naŋ be te zie a wa tɔ zenɛ.

³⁰ O naŋ da waa Ŋmen-yelmanna zuiŋ, o da baŋ ka Naaŋmen da pollɛɛ la, a eŋ noɔre ko o ka O na biŋ la o bie kaŋ a o nakogi zu.

³¹ A Davil daŋ nyɛ la a yeli ŋa lɛnso ka o da yeli a Mɛzaaya kuuni poɔ leɛ-iruu yɛlɛ, a yele, ‘Ba da ba gyɛ O bare a kuuni poɔ, bee a sage ka a O eŋɛ poɔ̃.’

³² A Yeezu ŋa la ka Naaŋmen da e ka o leɛ-iri, ka te zaa e a yeli ŋa dansediribe.

³³ Naaŋmen pãã da zɛge O la ka O do zeŋ O nuduluŋ seŋ, kyɛ ka O da de a Vooroŋ Soŋ a Saa naŋ da eŋ noɔre ka O na tere la, ona la ka O paale ne te ka yɛ nyɛ a kyɛ woŋ.

³⁴ A Davil da ba do tenvelaa, kyɛ o meŋɛ la da yeli: ‘A Daana Naaŋmen da yeli ko la a n Daana “Zeŋ a n nuduluŋ seŋ,

³⁵ a te ta lɛ saŋ N naŋ na e ka fo dɔndɔnne leɛ a fo gbɛɛ dɔgloo zie.” ’

³⁶ Azuiŋ yɛ vɛŋ ka a Izerayɛl noba zaa baŋ kyerete ka Naaŋmen zɛge la a Yeezu ŋa yɛ naŋ da kpa a dagaraa zu, ka O waa Daana ane Mɛzaaya.”

A Dɛndɛŋ Noba Naŋ Da Kpɛ A Kiristabiiri Puoruu Poɔ

³⁷ Ba naŋ da woŋ a ŋaa, a da tɔ la ba sukyie, ka ba da soore a Piita ane a o taaba apostoliimine, “Yɔɔmine, te e wola?”

³⁸ Ka a Piita yeli ko ba, “Yɛ leɛ yɛ eebo, ka yɛ yeni yeni zaa de suobu a Yeezu Kirista yuori eŋɛ, a nyɛ yelbebe sudi, kyɛ yɛ na nyɛ la a Vooroŋ Soŋ kyɔɔtaa.

³⁹ Bonso, yɛnee ane yɛ biiri la ka Naaŋmen da eŋ a noɔre ŋa tere ane banaŋ zaa naŋ be tɔɔre zaa ane neɛzaa a Daana, a te Naaŋmen naŋ boɔle.”

⁴⁰ A Piita da wuli ba la yɛlɛ yaga a kyɛ kanne ba a yele, “Yɛ faa yɛmenne yi a zenɛ faaloŋ noba zie.”

⁴¹ Lɛ la ka a banaŋ zaa naŋ da sage de a o yɛlɛ da de suobu. A lɛ daare noba naŋ da sage de a yɛlɛ a poɔ ba poɔ da ta ŋa noba turi ata.

⁴² A noba bama da kpimare la a apostoliimine wuluu, a da laŋna ne ba, a laŋna ŋmaara a boroboro a kyɛ laŋna puoro.

A Dɛndɛŋ Yelderebɛ Da De La Ba Boma Lantaa

⁴³ Dabeɛ̃ da kpɛ la a noba zaa bonso, a apostoliimine da tonɔ la toŋkpeɛne ane yelwulii yaga.

⁴⁴ Kyɛ banaŋ zaa naŋ da de a Yeezu yɛlɛ da laŋ la taa, a laŋ boma.

⁴⁵ Ba da maŋ koɔre la a ba boma ba naŋ taa ane boma ba naŋ so a de a libie poŋ ko ba zaa a seŋ a naŋ wono ba yeni yeni zaa lɛ.

⁴⁶ Bie la bie zaa ba da maŋ laŋ la taa a di diibu ba yie poɔ ane popeɛloŋ kyɛ da maŋ laŋna a Naaŋmen die poɔ

⁴⁷ a danna Naaŋmen ka a noba zaa da nɔŋ ba yɛlɛ. Bie la bie zaa a Daana da maŋ e la ka banaŋ zaa naŋ da nyɛrɛ faabo waana poɔrɔ ba poɔ.