Toma 15 - Naaŋmen Nɔpaalaa Gane

A Gyɛruzɛlɛm Kpaaroŋ Kpoŋ Yɛlɛ

¹ Lɛ la ka noba mine da yi a Gyudiya a sigi wa Antoɔki a wa kanna a yɔɔmine, “Ka yɛnee ba iri yɛ dɛgre a seŋ a Moozul bege naŋ yeli lɛ, yɛ koŋ baŋ nyɛ faabo.”

² A yeli ŋa da wa ne la tage taa, ka nɔkpeɛne da kpɛ a Pɔɔl ane Banabase ane a noba na sogɔŋ. Lɛ la ka ba da iri Pɔɔl ane Banabase ane a noba na mine ka ba gaa Gyɛruzɛlɛm a te nyɛ a apostoliimine ane a nembɛrɛ ka ba gyɛle a yeli ŋa.

³ A lɛ zuiŋ a puoruu laŋne deme da toŋ ba la, kyɛ ba naŋ da tu a Foniseya ane Samareya, ba da manne la lɛ a Nemboore-yobo naŋ sage de a Yeezu yɛlɛ, ka a yelderebɛ zaa poore da pɛle yaga zaa.

⁴ Ba naŋ da wa ta Gyɛruzɛlɛm, a puoruu laŋne deme ane a apostoliimine ane a nembɛrɛ da de ba la saanoŋ. Ba da manne la a yɛlɛ na zaa Naaŋmen naŋ da tu ba zie a e.

⁵ Kyɛ a yelderebɛ mine naŋ da poɔ a Faraziimine laŋne poɔ da iri arɛɛ la kyɛ yeli, “A e la feroo ka a Nemboore-yobo iri ba dɛgre kyɛ tuuro a Moozul begɛ.”

⁶ A apostoliimine ane a nembɛrɛ da laŋ la taa ka ba kaa a yeli ŋa nyɛ.

⁷ Ba naŋ da ŋmɛ a nɔkpeɛne ka a kɔɔre puoriŋ, Piita da iri arɛɛ la kyɛ yeli ko ba, “N yɔɔmine, yɛ baŋɛɛ la ka a piiluu saŋ Naaŋmen da kaa-iri ma la yɛ poɔ, ka n zie la ka a Nemboore-yobo na tu woŋ a yelnoore kyɛ sage de.

⁸ Kyɛ Naaŋmen naŋ baŋ nensaala sukyiri, da di la danseɛ ko ba, O naŋ da ko ba a Vooroŋ Soŋ aŋa O naŋ da ko te lɛ.

⁹ A ba yeldeebo zuiŋ, O pɛge la a ba sukyie ka a veɛlɛ, ka tɛɛtɛɛ zaa ba kyebe te ne ba zie.

¹⁰ Pampana ŋa, bonso ka yɛ boɔrɔ ka yɛ e Naaŋmen nyɛ ne yɛ naŋ de a gbogli na te ne te sããkommine naŋ da ba toɔ̃ na tuo a yɛre a potuuribo kɔkɔɛ eŋɛ?

¹¹ Kyɛ a ba e a lɛ, te sage deɛ la ka a Daana Yeezu garaaseɛ la na faa te aŋa O naŋ na faa ba lɛ.”

¹² A noba zaa naŋ da lantaa da e la gbilli, kyɛ da kyɛllɛ a Banabase ane Pɔɔl ka ba da manne a yelwulii ane a toŋkpeɛne Naaŋmen naŋ da tu ba zie a e a Nemboore-yobo zie.

¹³ Ba naŋ da wa yeli a yɛlɛ baare, Gyimisi da yeli sɔgɛɛ la, “N yɔɔmine, yɛ kyɛlle woŋ n noɔre yɛlɛ.

¹⁴ Simeon da manne la lɛnɛɛ Naaŋmen naŋ da daŋ kaa a Nemboore-yobo ne nimimaaroŋ, a kaa-iri noba ba poɔ, a O yuori eŋɛ.

¹⁵ A yelbie ama ane a Ŋmen-yelmanneba yelbie tu la taa, a seŋ ba naŋ sɛge lɛ:

¹⁶ ‘A yeli ŋa puoriŋ, N na leɛ wa la, a wa leɛ mɛ a Davil yiri naŋ le; N na leɛ mɛ la a dabori, a e ka o leɛ are,

¹⁷ ka a lɛ vɛŋ ka noba zaa na boɔrɔ a Daana haali a Nemboore-yobo banaŋ zaa N naŋ boɔle N yuori eŋɛ. A ŋaa la ka a Daana yeli, a Onaŋ naŋ da maŋ erɛ

¹⁸ ka ba baŋna a yɛlɛ ama a yi a dakoroŋ saŋ.’

¹⁹ Azuiŋ, maa eŋ teɛroŋ la ka te ta dɔɔnɔ a Nemboore-yobo bama naŋ sagra derɛ a Naaŋmen yɛlɛ,

²⁰ kyɛ te sɛge ko ba ka ba ta dire tebɛ boma, a ta tonɔ peɛ̃mo toma, a ta ɔɔrɔ donne ba naŋ ba kɔre kyɛ ka a kpi, a kyɛ ta dire zẽẽ.

²¹ Bonso, a dakoroŋ saŋ, Moozul da taa la noba naŋ da maŋ moɔlɔ a Naaŋmen yɛlɛ a teŋkponni zaa poore, kyɛ ka a pɛnnoo bebiri zaa ka ba maŋ kanne O yɛlɛ a puoruuderi poore.”

Gane Ba Naŋ Sɛge Ko A Nemboore-yobo Naŋ Sage De A Kirista Yɛlɛ

²² A apostoliimine ane a nembɛrɛ ane a puoruu laŋne deme zaa pãã da laŋ la noɔre, a kaa-iri noba a ba poɔ, a na toŋ ba ka ba gaa a Antoɔki, a laŋ ne Pɔɔl ane Banabase. Ba da toŋ la Gyudase ba naŋ boɔlɔ Basaba ane Selase, naŋ da waa wederebɛ a yɔɔmine poɔ,

²³ ne a gane ŋa, “A yɛ yɔɔmine, a apostoliimine ane a nembɛrɛ puoro la a yɔɔmine, a Nemboore-yobo naŋ be Antoɔki ane Seeriya ane Selusiya tenne poore.

²⁴ Te woŋ ka a te noba mine naŋ yi te poɔ, te naŋ ba toŋ, da wa yeli la yɛlɛ a dɔ̃ɔ̃ yɛ teɛroŋ.

²⁵ Azuiŋ, te laŋ la noɔre a kaa-iri noba a toŋ ba yɛ zie, ba ne Banabase ane Pɔɔl te naŋ nɔŋ,

²⁶ ba naŋ de ba nyɔvoɛ zaa kpimare a te Daana Yeezu Kirista zuiŋ.

²⁷ A lɛ zuiŋ, te toŋ la Gyudase ane Selase ka ba wa manne a yeli ŋa ne ba nɔɛ a ko yɛ.

²⁸ Bonso, a Vooroŋ Soŋ ane te nyɛɛ la ka a ba seŋ ka te de dɔgroŋ zaa dɔgle yɛ zu, ka a yelfere ama yoŋ naane:

²⁹ yɛ ta dire tebɛ boma, a ta dire zẽẽ, a ta ɔɔrɔ donne ba naŋ ba kɔre kyɛ ka a kpi, a ta tonɔ peɛ̃mo toma. Yɛ na e la a neɛ, ka yɛnee iri yɛmenne yi a ama poɔ. Yɛ zeŋ velaa.”

³⁰ Ba pãã da toŋ ba la, ka ba da sigi a Antoɔki. Ba naŋ da wa boɔle a puoruu laŋne deme lantaa, ba da de la a gane ko ba.

³¹ A noba naŋ da wa kanne a gane, ba poore da pɛlɛɛ la ne a gane yelbie.

³² A Gyudase ane Selase meŋ naŋ da waa Ŋmen-yelmanneba, da yeli la yɛlɛ yaga teɛ a yɔɔmine a ko ba faŋ paalaa.

³³ Ba naŋ da wa be a be ka a kɔɔre belaa, a yelderebɛ da puori ba la kyɛ eŋ ba sori ka ba leɛ gaa a noba na naŋ toŋ ba zie.

³⁴ [Kyɛ Selase eŋ zie, a da waa la velaa ko o ka o kpeɛrɛ a be]

³⁵ Kyɛ Pɔɔl ane Banabase da zeŋ la a Antoɔki poɔ. Ba ne noba yaga mine da kanne la a noba kyɛ moɔle a Daana yelbiri a be.

Pɔɔl Ane Banabase Naŋ Wɛle Taa

³⁶ Bebie mine puoriŋ, Pɔɔl da yeli ko la Banabase, “E ka te leɛ yɔ a nyɛ a yelderebɛ a tenne na zaa poore te naŋ da kanne a Daana yelbiri a nyɛ lɛ ba naŋ erɛ.”

³⁷ Banabase da boɔrɔ la ka ba taa a Gyɔɔn ba naŋ boɔlɔ Marko a gɛrɛ ne.

³⁸ Kyɛ Pɔɔl da ba boɔrɔ ka o taa neɛ naŋ da zo kyɛ bare ba Pamfiliya poɔ, a ba tu ba a toŋ a toma.

³⁹ A nɔkpeɛne da wa kpɛ la faa, ka a lɛ da e ka ba da wɛltaa; Banabase da taa la a Marko ka ba kpɛ gbori a gaa Saapuru.

⁴⁰ Kyɛ Pɔɔl da kaa-iri la Selase, ka a yelderebɛ da sɔre a Daana maaloo ko o kyɛ ka ba gɛrɛ.

⁴¹ O da tu la Seeriya ane Silisiya, a erɛ ka a puoruu laŋne noba yeldeebo erɛ kpeɛŋaa.