TITU 1 - Naaŋmen Nɔpaalaa Gane

Yaane Puoro

¹ Maa Pɔɔl naŋ waa a Naaŋmen tontonɔ ane a Yeezu Kirista apostolii, a Naaŋmen neŋkaa-irri yeldeebo ane a yelmeŋɛ bammo naŋ kyaare ne a Naaŋmennoŋ zuiŋ,

² a nyɔvo-babaaraa teɛretɔroo a Naaŋmen naŋ ba ŋmaara zirii naŋ da eŋ noɔre tere sɛre kyɛ ka a andonɛɛ wa piili.

³ A saŋ naŋ da wa ta, Naaŋmen da iri la O yelbiri wuli, a yelbiri ŋa la ka a Naaŋmen a te Faara da de eŋ n nuuriŋ ka N moɔlɔ.

⁴ N sɛgrɛ la a lɛtɛ ŋa korɔ Tiitu naŋ e a n bi-meŋɛ a yeldeebo te naŋ laŋ poɔ: Ka a Saa Naaŋmen ane a te Faara Kirista Yeezu garaaseɛ ane maaroŋ be fo zie.

Tiitu Toma O Naŋ Toŋ Kirite Teŋɛ Poɔ

⁵ A yeli ŋa zuiŋ la ka N da bare fo a Kirite teŋɛ poɔ ka fo baare e a yɛlɛ na naŋ kyɛre ka a tu, kyɛ kaa-iri nembɛrɛ teŋɛ zaa poɔ a seŋ N naŋ da wuli fo lɛ.

⁶ A seŋ ka yɛ iri neɛ naŋ ba taa saanaa zaa, kyɛ taa pɔge yeni, ka o bibiiri waa yelderebɛ, ka noba ta yele ba yelfaare yɛlɛ bee a ta waa biiri naŋ ba sagra ba dɔgrebɔ nɔɛ.

⁷ Bonso, besɔp naŋ waa a Naaŋmen tontonɔ fere ka o ta taa saanaa zaa, a ta e neɛ naŋ wullo o meŋɛ bee a e neɛ naŋ taa sutoloŋ bee a e dããnyukuolo bee a e zɔɔboɔrɔ bee bombɔ-gaŋne soba naŋ boɔrɔ tɔnɔ;

⁸ kyɛ a fere ka o waa neɛ naŋ derɛ noba saanoŋ, a nɔŋ tonveɛle, a baŋ o meŋɛ taabo, a e neɛ naŋ tori, a e neɛ naŋ kpimare Naaŋmen puoruu kyɛ baŋ o meŋɛ nyɔgebo.

⁹ A seŋ ka o e neɛ naŋ baŋ a yelbiri naŋ seŋ ne dɛloo ka a ta aŋa lɛ a kannoo naŋ wuli, ka ka o na toɔ̃ wullo wuluu naŋ soma kyɛ toɔ̃ yeli lɔɔ a banaŋ naŋ tullo a yelmeŋɛ.

¹⁰ Noba yaga meŋ bebe la a zagra noɔre, a yele yelfoglo kyɛ bɛllɛ noba, a gaŋ a zaa, banaŋ naŋ are ko dɛgre iruu.

¹¹ A ferɛɛ la ka fo e ka ba pɔge ba nɔɛ, ba naŋ saana a yideme teɛroŋ ne ba wulfaare a naŋ ba taa sori ka ba wuli a ba bombɔ-faare zuiŋ.

¹² A ba poɔ neɛ kaŋ, a ba meŋɛ neɛ naŋ waa ba ŋmen-yelmanna la da yeli: “Kirite teŋɛ noba maŋ ŋmaara la zirii tegitegilɛ, ba waa ŋa wɛdonfaare, entuo deme naŋ dire digbogbo.”

¹³ A yeli ŋa e la yelmeŋɛ. A ŋaa zuiŋ, kpãã ba nimizeɛ zaa, ka ba na leɛ taa yeldeebo naŋ waa meŋɛ,

¹⁴ a ta kyɛllɛ a Gyuumine sensellɛ yɛlɛ bee a noba na naŋ zagre a yelmeŋɛ nɔɛ.

¹⁵ A banaŋ naŋ taa sukyiri peɛle, boma zaa maŋ e la peɛle, kyɛ banaŋ naŋ taa sukyiri dɛgɛ ane a yelbaderebɛ bonzaa ba e pelaa ba zie. Ba teɛrɛ ane ba zomɔ zaa dɛgɛɛ la.

¹⁶ Ba maŋ yeli ka ba baŋ la Naaŋmen kyɛ ka ba yel-erre wuli ka ba zagra la Naaŋmen. Ba waa la nendɛgɛ, a waa noba naŋ zagra noɔre, a ba seŋ ne tonvelaa zaa.