Matio Gane 8 - Naaŋmen Nɔpaalaa Gane

Yeezu Naŋ Saŋ Kɔnkɔŋɔ

¹ A Yeezu naŋ da wa yi a taŋzu sigi, nembeɛoŋ da tuuro O la;

² ka kɔnkɔŋɔ kaŋ da wa gbi dumo O niŋesogɔ, a kyɛ yele, “Daana, ka fõõ boɔrɔ, fo na toɔ̃ saŋ ma la.”

³ Ka Yeezu da teɛ O nu a seene o, kyɛ yele, “N boɔrɔ la, nyɛ fo sammo.” A tɔntɔbaalɛ ka a dɔɔ kɔnnoŋ deɛ da baare.

⁴ Lɛ la ka Yeezu da yeli ko o, “Baŋ ne a, a ta wa yeli yelzaa ko neɛzaa, kyɛ gaa te de fo meŋɛ wuli a Naaŋmen bagmaale wederɛ, a kyɛ pãã tere a kyɔɔtaare na Moozul naŋ biŋ noɔre ka ba maŋ tere, ka a di a sammo danseɛ ba zie.”

Yeezu Naŋ Saŋ Sogyɛre Kɔɔ Neŋkpoŋ Tontonɔ Yɛlɛ

⁵ A Yeezu naŋ da wa te kpɛ Kapanum teŋɛ poɔ, sogyɛre kɔɔ neŋkpoŋ kaŋ da wa la O zie, a wa sɔre O,

⁶ a yele, “Daana, n tontonɔ gbɛre gaŋ la n yiri poɔ, a nyɛrɛ dɔgɛɛ yaga zaa.”

⁷ Ka O yeli ko o, “N na wa saŋ o la.”

⁸ Ka a sogyɛre kɔɔ neŋkpoŋ leɛ yeli sɔge, “Daana, N ba seŋ ne ka fo wa n yiri, kyɛ fõõ yeli a yelbiri yoŋ, a n tontonɔ na nyɛ la sammo.

⁹ Bonso, ba di la kponnuŋ n zu; ka N meŋ di kponnuŋ sogyɛre mine zu. Ka maa yeli ko kaŋ, ‘Gaa kyɛ,’ o maŋ gaa la; ka n yeli ko kaŋ, ‘Wa,’ ka o wa. Ka maa yeli ko n gbaŋgbaa, ‘E ŋaa,’ o maŋ e la.”

¹⁰ A Yeezu naŋ da wa woŋ a o yelyelii baare, O noɔre zaa da maaɛ la ka O leɛ yeli ko a noba naŋ tuuro O, “Yelmeŋɛ ka N yele korɔ yɛ, N daŋ ba nyɛ neɛ naŋ taa a yeldeebo ŋa tɔ a Izerayɛl poɔ.

¹¹ Maa yele korɔ yɛ, noba yaga na yi la a sapare ane saniŋe wa; a wa kpɛ a tenvelaa naaloŋ, ka ba ne Aboraham, Aziki ane Gyekɔb laŋ zeŋ di,

¹² kyɛ ka ba de a naaloŋ gbandiribe lɔɔ eŋ lige poɔ, ka ba be a be a kono nyerɛ nyemɛ.”

¹³ A Yeezu pãã da leɛ yeli ko la a sogyɛre kɔɔ neŋkpoŋ, “Gɛrɛ, vɛŋ ka a e a lɛ a ko fo, aŋa fo yeldeebo naŋ seŋ lɛ.” Ka a tontonɔ da nyɛ o sammo a gogo na poɔ.

Yeezu Naŋ Saŋ Baalba Yaga Piita Yiri Poɔ

¹⁴ A Yeezu naŋ da wa te kpɛ Piita yiri poɔ, O da nyɛ la a Piita deɛmpɔge ka o gaŋ ne entole.

¹⁵ Ka a Yeezu te tɔ o nu, ka a entole deɛ baare, ka a pɔge iri piili ka o kaa O zie.

¹⁶ A zimaane na, ba da taa la noba yaga sefaare naŋ be ba enne a wa ne a Yeezu zie, ka O da yeli yelbi-yenaa yoŋ a digi a sefaare ka a yi, kyɛ da saŋ banaŋ zaa naŋ da beɛrɛ.

¹⁷ A ŋaa da eɛɛ la ka a Ŋmen-yelmanna Azaaya yɛlɛ na tu a tuubu, “O de la te bambaaloŋ, kyɛ tuo te baaloŋ zaa.”

Noba Mine Naŋ Da Boɔrɔ Ka Ba Tu Yeezu

¹⁸ A Yeezu naŋ da wa nyɛ a neŋyaga ka ba ŋmaagyili O, O da ko ba la noɔre ka ba gaŋ gaa a mane konkoori na kaŋ.

¹⁹ A Naaŋmen begɛ wulwullo kaŋ pãã da tage ta la a Yeezu, a yeli ko O, “Wulwullo, N na tu fo la a gaa zie na zaa fo naŋ gɛrɛ.”

²⁰ Ka a Yeezu leɛ yeli ko o, “Wɛbaare taa la bogri kpeɛrɛ, ka sazu nuuli meŋ taa kyogri gana, kyɛ a Nensaala Bie ba taa zie na kɔgle O zu.”

²¹ A O potuuro kaŋ meŋ da wa yeli ko O la, “Daana, vɛŋ ka n gaa te ũũ n saa sɛre kyɛ pãã wa tuuro fo.”

²² Ka a Yeezu yeli ko o, “Tuuro ma, kyɛ bare a kuuni ka ba uuno ba kuuni.”

Yeezu Naŋ E Ka Sasekpeɛŋaa Ŋmaa

²³ A Yeezu naŋ da wa te kpɛ a gbori, a O potuuribo meŋ da tu O la.

²⁴ Sasekpeɛŋaa kaŋ da kyɛre la a mane zu, ka a kɔmmie ŋmeɛrɛ a gbori ka o boɔrɔ ka o kyigi, kyɛ ka a Yeezu da gaŋ gbire.

²⁵ Ka a potuuribo te seŋ O, a yele, “Daana, faa te! Te weɛrɛ la!”

²⁶ Ka O yeli ko ba, “Bonso ka yɛ zoro dabeɛ̃, yɛnee yelde-fẽẽ deme?” Lɛ la ka O iri a tanne a saseɛ ane a mane ka a zie deɛ ŋmaa vooroŋ.

²⁷ Ka a potuuribo nɔɛ da maa; ka ba yele, “Nemboŋ-tɔ la a dɔɔ ŋa, haali ka saseɛ ane mane zaa sagra O noɔre?”

Yeezu Naŋ Saŋ Dɔbɔ Bayi Mine Naŋ Da Taa Sefaare

²⁸ A Yeezu naŋ da wa te ta a mane konkoori kaŋ, a Gadara paaloŋ seŋ, dɔbɔ bayi mine naŋ da taa sefaare da ŋmore yi la a yaare poɔ a wa tuori O. A noba ŋa da taa la potuo yaga, ka lɛ vɛŋ ka noba da ba la tuuro a sobiri na.

²⁹ Tɔntɔbaalɛ ka ba kyeere ne kɔkɔkpeɛne a soorɔ, “Naaŋmen Bie, boŋ ka fo taa na e ne te? Fo mɔɔ wa la a kyɛ ka fo dɔgre te, kyɛ ka a saŋ naŋ ba ta be?”

³⁰ Dobasugo da be la a be seŋ dire diibu.

³¹ A sefaare da sɔre O la, a yeli, “Ka fõõ na digi te ka te yi a dɔbɔ bama enne, vɛŋ ka te yi te kpɛ a dobaare ama.”

³² Ka a Yeezu yeli ko a, “Yɛ gɛrɛ!” Lɛ la ka a wa yi a te kpɛ a dobasugo. Paretɛloŋ lɛ ka a dobaare zaa deɛ ŋmore sigi te kpɛ a mane poɔ, a wɛ a koɔ̃ poɔ.

³³ A dobakyeenemɛ da zo gaa la a teŋɛ poɔ, a te manne a yɛlɛ zaa naŋ e a dobaare ane a sefa-iribe na bayi zie a ko a noba.

³⁴ Lɛ la ka a teŋɛ deme zaa da yi ka ba te nyɛ a Yeezu. Ba naŋ da wa te nyɛ O, ba da sɔre O la ka O yi a ba paaloŋ poɔ.