Matio Gane 4 - Naaŋmen Nɔpaalaa Gane

A Yeezu Enyaabo Yɛlɛ

¹ Lɛ la ka a Vooroŋ Soŋ pãã da taa a Yeezu te kpɛ ne a wɛgyɛŋ poɔ ka a sebɛlbɛllɛ na te e o a nyɛ.

² O da leŋ la noɔre beri lezaayi, ŋmenaa ane tensogɔ, ka kɔŋ pãã da kpɛ O.

³ A sebɛlbɛllɛ da wa yeli ko O la, “Ka fõõ wa waa Naaŋmen Bie, yeli a kubo ama ka a leɛ boroboro.”

⁴ Ka O yeli sɔge, “Ba sɛgɛɛ la: ‘Bondirii yoŋ naane korɔ nensaala nyɔvore, kyɛ yelbiri zaa naŋ yi Naaŋmen noɔre meŋ terɛ la nyɔvore.’ ”

⁵ Lɛ la ka a sebɛlbɛllɛ la taa O gaa ne a tensoŋ poɔ, a te do ne O a Naaŋmen die peɛzu,

⁶ a yeli ko O, “Ka fõõ wa sereŋ waa Naaŋmen Bie, ɛge kyinni teŋɛ, bonso, ba sɛgɛɛ la: ‘Naaŋmen na toŋ la O malekere fo zuiŋ,’ kyɛ la sɛge, ‘Ba na sogi nyɔge fo la eŋ ba nuuri poɔ, ka fo gbɛre na ta wa ŋmɛ kuuri.’ ”

⁷ Ka a Yeezu laboreŋ yeli ko o, “Ba la sɛge la a ŋmen gane poɔ, ‘Ta e a fo Daana fo Naaŋmen nyɛ.’ ”

⁸ A sebɛlbɛllɛ da laboreŋ taa O la te do ne taŋ wogiwogi kaŋ zu a te wuli O a tendaa paaloŋ naaloŋ zaa ane a veɛloŋ;

⁹ kyɛ yeli ko O, “Ka fõõ le gbi dumo puori ma, N na de la a ama zaa ko fo.”

¹⁰ Ka Yeezu yeli ko o, “Setaana! Tage yi be kyɛ kyɛre ma, bonso, ba sɛgɛɛ la: ‘Puoro a Daana fo Naaŋmen, kyɛ tonɔ korɔ O yoŋ.’ ”

¹¹ Lɛ la ka a sebɛlbɛllɛ da bare O kyɛ gaa, tɔntɔbaalɛ ka malekere wa kaa O zie.

Yeezu Naŋ Piili O Toma Galili Poɔ

¹² A Yeezu naŋ da wa woŋ ka ba nyɔge la a Gyɔɔn, O da yi la a be gaa Galili teŋɛ.

¹³ O da iri la a Naazɛrɛ poɔ, a gaa te kpeɛrɛ Kapanum naŋ peɛle mane noɔreŋ, a Zɛbulun ane Nafetali paaloŋ poɔ.

¹⁴ A yɛlɛ ama zaa da eɛɛ la ka ka a Ŋmen-yelmanna Azaaya naŋ da yeli lɛ na tu a tuubu.

¹⁵ “Zɛbulun ane Nafetali tenne naŋ be a mane sobiri noɔreŋ, a te gaŋ gaa Gyɔɔdan mane, Galili a Nemboore-yobo tenne

¹⁶ a noba naŋ da zeŋ lige poɔ nyɛ la veɛloŋ kpoŋ, ka banaŋ meŋ naŋ da zeŋ a kũũ dasuoluŋ poɔ, veɛloŋ kpoŋ kyaane ba la.”

¹⁷ A yi a saŋ na poɔ, Yeezu pãã da piili moɔlɔ la a Ŋmen-yelnoore a yele, “Yɛ leɛ yɛ eebo yi yɛ yelbebe poɔ, bonso, a tenvelaa naaloŋ peɛlɛɛ la.”

Yeezu Naŋ Boɔle O Dɛndɛŋ Potuuribo

¹⁸ A Yeezu naŋ da kyɛnɛ a Galili mane noɔreŋ, O da nyɛ la yɔɔmine bayi, Saamon, ka o yuori kaŋ meŋ da di Piita ane o yɔɔ Anduru, ka ba lɔɔrɔ ba zonkyogri a mane poɔ, bonso, ba da waa la zonnyɔgrebɔ.

¹⁹ Ka O yeli ba, “Yɛ wa tuuro ma, N na e la ka yɛ leɛ nyɔgrɔ nensaalba aŋa zoma.”

²⁰ A daadaalɛ ka ba deɛ bare ba zonkyogri kyɛ iri tuuro O.

²¹ O naŋ da yi a be gɛrɛ, O da la nyɛ la yɔɔmine bayi, Gyimisi ane o yɔɔ Gyɔɔn, naŋ waa Zɛbɛdii bidɔbɔ. Ba ne a ba saa da be la ba gbori poɔ a liire ba zonkyogri, ka O da boɔle ba.

²² A daadaalɛ ka ba da bare a ba saa ne a gbori kyɛ iri te tuuro O.

Yeezu Naŋ Kanne Kyɛ Saŋ Neŋyaga

²³ Yeezu da yɔ la a Galili paaloŋ zaa, a kanna noba ba puoruuderi pooreŋ, kyɛ manna a tenvelaa naaloŋ yelnoore korɔ ba kyɛ saŋna a noba baaloŋ boorɔ zaa.

²⁴ Lɛ la ka a Yeezu yɛlɛ da yaare a Seeriya paaloŋ zaa, ka ba da taa ba baalba zaa wa ne a O zie. Banaŋ naŋ da beɛrɛ baaloŋ boorɔ zaa, banaŋ naŋ da taa woloŋ, banaŋ naŋ da taa sefaare, banaŋ naŋ da lere kunkunni ane banaŋ naŋ da gbɛre, ka a Yeezu da saŋ ba zaa.

²⁵ Ka noba yaga da yi Galili, Dekapoli, Gyɛruzɛlɛm, Gyudiya ane Gyɔɔdan maŋgaŋne a wa tuuro O.