Matio Gane 27 - Naaŋmen Nɔpaalaa Gane

Ba Naŋ Taa Yeezu Wa Ne Pilato Zie

¹ Zie naŋ da wa nyaa, a Naaŋmen bagmaalkare ane a teŋɛ nembɛrɛ zaa da laŋ la taa a bo sori na ba naŋ na tu a bɔ yɛlɛ dɔgle a Yeezu a toɔ̃ ko O.

² Ba da leŋ la a Yeezu a taa O gaa te ko Pilato naŋ da waa a paaloŋ na gɔbena.

Gyudase Naŋ Leŋ O meŋɛ Daseelɛ

³ A Gyudase na naŋ da iri a Yeezu tere naŋ da wa nyɛ ka ba di la a Yeezu sɛrɛɛ a yeli ka O lee la ka a seŋ ka ba ko O, o da leɛ la o teɛroŋ a taa a warbie lezare ne pie wa ko a Naaŋmen bagmaalkare ane a nembɛrɛ.

⁴ O da yelee la, “N e la yelbieri ne N naŋ iri neɛ naŋ ba baŋ yeli tere ka ba ko.” Ka a noba leɛ yeli ko o, “Ana te boŋ yeli la bebe. Taa fo yɛlɛ.”

⁵ O naŋ da wa lɔɔ a warbie bare a Naaŋmen die poɔ, o da yi gaa te leŋ la o meŋɛ daseelɛ.

⁶ Ka a Naaŋmen bagmaalkare nyɔge a warbie de kyɛ yeli, “A libie ama ba seŋ ka te de a eŋ a libie daga poɔ, a naŋ e zẽẽ libie zuiŋ.”

⁷ Ba naŋ da wa nyɛ taa baare, ba zaa da sagɛɛ la ka ba de a libie da ne a dogmeɛrɛ weɛ, ka ba na uuno ne saama.

⁸ A ŋaa zuiŋ la ka ba boɔlɔ a weɛ ŋa Zẽẽ Weɛ a naŋ wa te tɔ zenɛ.

⁹ A ŋaa da eɛɛ la ka ka a Ŋmen-yelmanna Gyɛremaaya naŋ da yeli lɛ na tu a tuubu, “Ba da de la a warbie lezare ne pie na, naŋ da waa a soba na daaroŋ, a lɛ a Izerayɛl noba mine naŋ da sage ka a e O daaroŋ,

¹⁰ ka ba de da ne a dogmeɛrɛ weɛ, aŋa lɛ a Daana naŋ da yeli ka N e.”

Pilato Naŋ Soore A Yeezu Soorebie

¹¹ A Yeezu da are la a gɔbena niŋesogɔ, ka a gɔbena soore O, “Fõõ la a Gyuumine Naa be?” Ka a Yeezu yeli ko o, “Fõõ la yeli a lɛ.”

¹² Kyɛ a Naaŋmen bagmaalkare ane a nembɛrɛ naŋ da de yɛlɛ duori ne a Yeezu, O da ba yeli yelzaa sɔge ba.

¹³ Lɛ la ka a Pilato yeli ko O, “Fo ba woŋ a saanaa ba naŋ duoro fo seŋ lɛ be?”

¹⁴ Kyɛ a Yeezu da ba yeli yelzaa sɔge o, ka a lɛ da e a gɔbena nɔmaa yaga zaa.

A Baraba Bee Yeezu Baroo Yɛlɛ

¹⁵ A tigri saŋ a gɔbena da maŋ iri la a nempɔgre kaŋ a noba naŋ boɔrɔ bare.

¹⁶ A saŋ na ba da taa la bawono kaŋ a nempagdie poɔ ka ba boɔlɔ Yeezu Baraba.

¹⁷ Ba naŋ da wa lantaa baare, Pilato da soore ba la, “Aŋ la ka yɛ boɔrɔ ka N iri bare, Yeezu Baraba bee a Yeezu na ba naŋ boɔlɔ a Mɛzaaya?”

¹⁸ Bonso a Pilato da nyɛɛ la ka nyuuri la da so ka ba nyɔge a Yeezu wa tere.

¹⁹ A Pilato naŋ da naŋ zeŋ a sɛredi kogi zu la ka o pɔge da toŋ neɛ o zie a yeli ko o, “Ta wa de fo nu eŋnɛ a dɔɔ ŋa naŋ ba baŋ yeli yɛlɛ poɔ, bonso, N di la dɔgɛɛ yaga zenɛ n zannoo poɔ a O yɛlɛ eŋɛ.”

²⁰ Kyɛ a Naaŋmen bagmaalkare ane a nembɛrɛ da tɔ la a noba zaa eŋ ka ba sɔre a Pilato ka o iri Baraba bare kyɛ e ka ba ko a Yeezu.

²¹ A gɔbena da laboreŋ soore ba la, “A bama bayi, buo la ka yɛ boɔrɔ ka N iri ko yɛ?” Ka a noba yeli, “Baraba.”

²² Ka a Pilato soore ba, “Boŋ ka N pãã na e ne a Yeezu ba naŋ boɔlɔ a Mɛzaaya?” Ka a noba zaa yeli, “Vɛŋ ka ba kpa O dagaraa zu.”

²³ Ka a Pilato leɛ soore ba, “Wola, boŋ yelfaa ka O e?” Ka ba la tanne ne kɔkɔkpeɛne yaga zaa a yele, “Vɛŋ ka ba kpa O dagaraa zu!”

Pilato Naŋ De A Yeezu Tere Ka Ba Te Kpa Dagaraa Zu

²⁴ A Pilato naŋ da wa nyɛ ka o ba taa lɛ zaa o naŋ na e, kyɛ ka dɔɔne da piili ka o kpɛ a noba poɔ, O da de la koɔ̃ pɛge o nuuri a noba niŋesogɔ, a yele, “N ba baŋ yelzaa a dɔɔ ŋa kũũ eŋɛ; yɛ taa yɛ yɛlɛ.”

²⁵ Lɛ la ka a noba zaa pabo laŋ yeli, “Ka a Yeezu zẽẽ do te ne te biiri.”

²⁶ Lɛ ka a Pilato iri Baraba ko ba, kyɛ e ka ba feɛ a Yeezu, kyɛ pãã de O ko ba ka ba te kpa O dagaraa zu.

A Sogyɛre Naŋ E Yeezu La

²⁷ Lɛ la ka a gɔbena sogyɛre pãã da de a Yeezu kpɛ ne a gɔbena zage poɔ, a boɔle ba taaba zaa ka ba wa ŋmaagyili O.

²⁸ Ba da nyɔge la a Yeezu kparoo yage bare, kyɛ de kpareze-kpoŋ kaŋ a su O.

²⁹ A lɛ puoriŋ ba da de la goore ŋmeɛle maale ne zupili a de vɔgle O zu. Kyɛ de mupilaa eŋ O nuduluŋ poɔ, kyɛ pãã maŋ gbi dumo O niŋeŋ a erɛ O laara, a yele, “Yaane, Gyuumine Naa!”

³⁰ Ba da toore la nentaare waare O, kyɛ de mupilaa ŋmɛ ne O zu.

³¹ Ba naŋ da wa e O la baare, ba da yage la a kpareze-kpoŋ na bare kyɛ de O meŋɛ kparoo a leɛ su O. A pãã da taa O gaa ne ka ba te kpa O dagaraa zu.

Ba Naŋ Kpa Yeezu Dagaraa Zu

³² Ba naŋ da wa yi kyɛnɛ gɛrɛ, ba da tuori la dɔɔ kaŋ naŋ yi Saarin, ka ba boɔlɔ Saamon, ka ba da fere o ka o tuo a Yeezu dagaraa.

³³ Ba naŋ da wa te ta zie kaŋ ba naŋ boɔlɔ Golgota (a Golgota tɛgɛ la Zukoɔre Zie)

³⁴ a noba da de la tĩĩ naŋ na e ka O eŋɛ dare a pulli ne dãã a de ko a Yeezu ka O nyu, kyɛ O naŋ da wa lɛnne a nyɛ, O da zagrɛɛ la ka O nyu.

³⁵ Ba naŋ da wa kpa O a dagaraa zu baare, ba da de la O kparre ŋmɛ gbaŋ a poŋ taa;

³⁶ kyɛ pãã da zeŋ a be guuro O.

³⁷ A O zusogɔŋ, a dagaraa zu, ba da sɛge la O yelsaanaa, “Yeezu A Gyuumine Naa La A Ŋa.”

³⁸ Ba da kpa la fafareba mine bayi ne a Yeezu, kaŋ a O duluŋ seŋ, kaŋ meŋ O gɔɔ seŋ.

³⁹ Noba naŋ da waana tɔlɔ, da toorɔ O la kyɛ gɔgrɔ ba zuri,

⁴⁰ kyɛ yele, “Fõõ naŋ yeli ka fo na toɔ̃ ŋmore la a Naaŋmen die, kyɛ la leɛ mɛ o beri ata poɔ, faa fo meŋɛ wɛ! Ka Fõõ wa waa Naaŋmen Bie, wa sigi a dagaraa zu.”

⁴¹ A lɛ ne o zu ka a Naaŋmen bagmaalkare a laŋne a Naaŋmen bege wulwulibo ane a nembɛrɛ meŋ da erɛ O laara a yele:

⁴² “O faa la ba mine, kyɛ kontoɔ̃ faa O meŋɛ. Ka O naŋ wa sereŋ waa a Izerayɛl deme Naa, vɛŋ ka O wa sigi a dagaraa zu pampana ŋa, kyɛ ka te sage de O yɛlɛ.

⁴³ O dɛle la Naaŋmen, O e ka a Naaŋmen wa faa O a pampana ŋa zaa, ka O naŋ wa boɔrɔ, bonso, O yelee la, ‘N waa la Naaŋmen Bie.’ ”

⁴⁴ A lɛ ne o zu ka a fafareba na ba naŋ da laŋ ne O kpa a dagarre zu meŋ da to O zoma.

A Yeezu Kũũ Yɛlɛ

⁴⁵ A ŋmenaa naŋ wa do pozentaa gɛrɛ, ligruŋ da luri pɔge la a tendaa zaa, a te ta a ŋmenaa gbelli ata saŋ.

⁴⁶ A naŋ da wa ta ŋa ŋmenaa gbelli ata saŋ, Yeezu da ŋmɛ la kpɛlle yaga zaa a yele, “Eli Eli lema sabatani?” A yeluu ŋa tɛgɛ la, “N Naaŋmen, N Naaŋmen, bonso, ka fo gyɛ ma bare?”

⁴⁷ A noba mine naŋ da are a be a woŋ a lɛ, da yelee la, “Elaagya la ka a dɔɔ ŋa boɔlɔ.”

⁴⁸ Lɛ la ka ba kaŋ da zo a paretɛloŋ lɛ a te de lɔrɔ naŋ nyu dããmiiruŋ paale o zaa, a kyage daa eŋɛ a wa turi O ka O nyu.

⁴⁹ Kyɛ ka ba mine yeli, “Yɛ vɛŋ ka te kyɛlle nyɛ ka a Elaagya na wa faa O la be.”

⁵⁰ Lɛ la ka a Yeezu laboreŋ ŋmɛ kpɛlle ne kɔkɔkpeɛŋaa, kyɛ ŋmaa vooroŋ.

⁵¹ A paretɛloŋ na poɔ, a Naaŋmen die patiisa deɛ da kyeɛ̃ la ziiri ayi, a yi o zu a kyɛ sigi te tɔ o pareŋ, kyɛ ka a teŋɛ da gbigri, ka piiri puro wɛlɛ.

⁵² A yaare meŋ da yuoree la ka a nensonne na naŋ da kpi leɛ-iri a kuuni poɔ.

⁵³ Ba naŋ da wa yi a yaare poɔ, a Yeezu kũũ leɛ-iruu puoriŋ, ba da gaa te kpɛ la a teŋkpoŋ poɔ ka neŋyaga da nyɛ ba.

⁵⁴ A sogyɛre kɔɔ neŋkpoŋ ane banaŋ naŋ da be o zie guuro a Yeezu, naŋ da nyɛ a teŋɛ naŋ gbigri ane a yɛlɛ zaa naŋ e, dabeɛ̃ da kpɛ ba la yaga, ka ba yeli, “Serɛzaa, a dɔɔ ŋa da waa la Naaŋmen Bie.”

⁵⁵ Pɔgeba yaga meŋ da be la a be, a da te are tɔɔre zaa kyɛ kaara. Ba da tu la a Yeezu a yi Galili, a da soŋnɔ O.

⁵⁶ A pɔgeba mine naŋ da poɔ ba poɔ la, Mareya Magdalina, ane Mareya, Gyimisi ne Yuzɛb ma, ane a Zɛbɛdii biiri ma.

A Yeezu Ũũmu Yɛlɛ

⁵⁷ Zie naŋ da wa te maa, dɔɔ bondaana kaŋ naŋ yi Aremateya, ka o yuori di Yuzɛb, o meŋ da waa la a Yeezu potuuro kaŋ.

⁵⁸ O da gaa la a Pilato zie a te sɔre ka o de a Yeezu eŋɛ ko o. Lɛ la ka a Pilato da tere noɔre ka ba de a Yeezu eŋɛ a ko o.

⁵⁹ A Yuzɛb pãã da de la pɛmpelaa a pilli ne a Yeezu eŋɛ,

⁶⁰ a de O te ũũ o meŋɛ ya-paalaa poɔ o naŋ nyɛ piiri zu. A pãã billi kukpoŋ pɔge a yaa noɔre kyɛ leɛ gɛrɛ.

⁶¹ Mareya Magdalina ane a o yo-tɔ Mareya da be la a be, a zeŋ tori a yaa niŋe.

A Yeezu Yaa Guguribo

⁶² Zie naŋ da wa nyaa, a pɛnnoo bebiri yɛlɛ Naroo naŋ da wa tɔle, a Naaŋmen bagmaalkare ane a Faraziimine da laŋ la taa a Pilato yiri poɔ,

⁶³ a yeli, “Neŋkpoŋ, te leɛ-teɛre la a yeli na a zirŋmaara ŋa naŋ da yeli O vore saŋ, ‘N na leɛ-iri yi la a kuuni poɔ a beri ata puoriŋ.’

⁶⁴ Azuiŋ, e ka ba te gu a yaa velaa, a te ta a beri ata daare, ka lɛ naane, a O potuuribo na te zu iri O la a yaa poɔ, kyɛ yeli ko a noba, ‘O leɛ-iri yi la a kũũ poɔ,’ ka a puori bɛllɛ ŋa pãã na waa faa yaga gaŋ a dɛndɛŋ bɛllɛ na.”

⁶⁵ Ka Pilato yeli ko ba, “Yɛ taa la sogyɛre ka ba e guguribo, yɛ gaa te e ka ba gu a zie velaa a seŋ lɛ yɛ naŋ na toɔ̃.”

⁶⁶ Lɛ la ka ba gaa ne a guguribo, a te bɛ a kuuri naŋ furi a yaa noɔreŋ, kyɛ e ka a noba gu a zie velaa.