Matio Gane 23 - Naaŋmen Nɔpaalaa Gane

Yeezu Naŋ Zagre A Naaŋmen Bege Wulwulibo Ane A Faraziimine Yɛlɛ

¹ Lɛ la ka Yeezu da yeli ko a noba ane a O potuuribo:

² “A Naaŋmen bege wulwulibo ane a Faraziimine la leɛre a Moozul zu;

³ azuiŋ, yɛ tuuro a ba wuluu kyɛ erɛ a lɛ zaa ba naŋ wullo yɛ, kyɛ ta tɔglɔ ba eebo, bonso, ba ba tuuro bamenne wuluu.

⁴ Ba maŋ leŋ la tuotegrɛ a zɛle dɔgle a noba bɔgŋmama zuri, kyɛ bamenne koŋ sage de nubiri seene ne a tuobu.

⁵ Ba maŋ erɛ la ba yɛlɛ zaa ka ka noba na nyɛ; bonso, ba maŋ e la ka a Naaŋmen sɛgebie ba naŋ leŋ ba gberi e bɛrɛ, kyɛ ka ba kparre nɔzoɔrɔ waa wogri.

⁶ Ba maŋ nɔŋ ka ba zenɛ a nembɛrɛ zenziiri a tige ziiri kyɛ zenɛ kog-veɛle zu a puoruuderiŋ,

⁷ kyɛ ka noba puoro ba a dare poore ne gyeremɛ, a nɔŋ ka noba boɔlɔ ba Wulwulibo.

⁸ Kyɛ a ba seŋ ka ba boɔlɔ yɛ “Wulwulibo” bonso, wulwullo yenaa la ka yɛ taa, kyɛ ka yɛ zaa waa zanzannema.

⁹ Yɛ ta boɔlɔ neɛzaa yɛ saa a teŋɛzu kyɛ, bonso, Saa yenaa yoŋ ka yɛ taa; ona la be a tenvelaa poɔ.

¹⁰ Bee a ba seŋ ka ba boɔlɔ yɛ wulwulibo; bonso, wulwullo yenaa yoŋ la ka yɛ taa, ona la a Mɛzaaya.

¹¹ A yɛ poɔ neŋkpoŋ na waa la yɛ zaa tontonɔ.

¹² Banaŋ zaa naŋ duoro bamenne, ba na sigri ba la, kyɛ banaŋ zaa meŋ naŋ sigri bamenne, ba na duori ba la.”

¹³ “Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Bonso, yɛ lare la noba bare yeŋeŋ ka ba ta kpɛ a tenvelaa naaloŋ. Yɛ menne ba kpeɛrɛ kyɛ ba la sage ka noba naŋ boɔrɔ ka ba kpɛ be meŋ kpɛ.

¹⁴ [Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ fa la pɔg-kɔbɔ yie wieouŋ lɛ, kyɛ maŋ puori kɔɔre yaga zaa, ka noba nyɛ a na teɛrɛ ka yɛ waa la nemmenne. A ŋaa zuiŋ yɛ dɔgroŋ na waa la kpoŋ.]

¹⁵ Yɛ yuori la we, yɛnee Naaŋmen begɛ wulwulibo, ane Faraziimine, yɛnee bampuori-kombampoɔ mine! Yɛ maŋ ŋmaa la mama a lɔnne tatenne, neŋyenaa eŋɛ ka yɛ te leɛre o eŋ yɛ ŋmen puoruu poɔ. Kyɛ ka o naŋ wa kpɛ a yɛ ŋmen puoruu baare, yɛ maŋ e o la ka o seŋ dazugovũũ kpeɛbo gbɛre boyi gaŋ yɛ.”

¹⁶ “Yɛ yuori la we, yɛnee zɔnne naŋ tagra zɔnne, yɛ maŋ yeli la, ‘Soba na zaa naŋ pɔ ne a Naaŋmen die, pɔraa zaa ba dɔgle o zu, kyɛ soba na zaa naŋ pɔ ne a salema naŋ be a Naaŋmen die poɔ, ka a pɔraa na do o la.’

¹⁷ Yɛnee zɔndambolo ŋa! Buo la kpoŋ, a salema bee a Naaŋmen die naŋ e ka a salema leɛ bonsoŋ?

¹⁸ Ka yɛ yeli, ‘Soba na zaa naŋ pɔ a Naaŋmen bagmaalkuuri, pɔraa zaa ba dɔgle o zu, kyɛ soba na zaa naŋ pɔ ne a kyɔɔtaare boma naŋ biŋ a Naaŋmen bagmaalkuuri zu, a pɔraa na do la o soba.’

¹⁹ Nyɛ yɛ zɔnnoŋ naŋ seŋ lɛ! A buo soba la kpoŋ, a kyɔɔtaare boma bee a Naaŋmen bagmaalkuuri naŋ vɛŋ ka a boma leɛ kyɔɔta-soŋ?

²⁰ Azuiŋ soba na zaa naŋ pɔ ne a Naaŋmen bagmaalkuuri pɔ laŋne la a kyɔɔtaare naŋ biŋ o zu;

²¹ ka soba na zaa meŋ naŋ pɔ ne a Naaŋmen die, pɔ laŋne a soba na naŋ kpeɛrɛ a Naaŋmen die poɔ,

²² ka soba na zaa meŋ naŋ pɔ ne tenvelaa, pɔ ne a Naaŋmen naaloŋ kogo a laŋne a soba na naŋ zeŋ o zu.”

²³ “Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ iri la yɛ ziiri pie ŋmen kyɔɔtaare, nyɛremaanyuu, zama ane badoge, kyɛ bare a begɛ na naŋ e nimizeɛ yaga: bo-soŋ, nyonono ane yeldeebo. A yɛlɛ ama la ka a da seŋ ka yɛ nyɔge kpeɛŋaa, kyɛ ta bare a anaŋ meŋ.

²⁴ Yɛnee zɔnne naŋ tagra zɔnne! Yɛ maŋ sele la naazoɔ bare yɛ bonnyuuri poɔ kyɛ vɔlɔ bontaŋ!”

²⁵ “Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ pɛge la a ŋmanlee ane a laa puori, kyɛ ka a poore kpɛ dɛge, a paale ne bombɔ-gaŋne ane finnuu.

²⁶ Yɛnee Faraziimine naŋ zɔŋ! Yɛ maŋ daŋ pɛge a ŋmanlee ane a laa poore sɛre lɛ la ka a puori meŋ pãã na veɛlɛ.”

²⁷ “Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ waa seŋ ŋa yaare ba naŋ mɛ, ka a pɛle, a sãã velaa a yeŋeŋ kyɛ ka a poore kpɛ te paale ne kɔbɔ, a ɔlle a zaa ne dɛgre boorɔ zaa.

²⁸ Lɛ ka yɛ meŋ waa; a sãã ŋa nemmenne noba niŋeŋ, kyɛ ka yɛ poore kpɛ paale ne faaloŋ ane koŋwoŋyɛlɛ.”

²⁹ “Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ mɛ la a Ŋmen-yelmanneba yaare, kyɛ maale a nemmenne yaare, a eŋ a peɛmɛ ka a veɛlɛ,

³⁰ kyɛ ka yɛ yeli, ‘Ka tenee da bebe a te sããkommine saŋ na, te da koŋ ko a Ŋmen-yelmanneba aŋa ba naŋ da e a lɛ.’

³¹ A lɛ yɛ di la danseɛ kyaare ne yɛmenne ka yɛ waa la a banaŋ naŋ ko a Ŋmen-yelmanneba boorɔ.

³² Yɛ moɔ nimiri a baare toŋ a toma a yɛ sããkommine naŋ da piili.

³³ Yɛnee weere ane dompane boorɔ! Wola ka yɛ na e a zo bale a dazugovũũ poɔ kpeɛbo?

³⁴ Azuiŋ, N toŋ la Ŋmen-yelmanneba, bambaŋnema ane a begɛ wulwulibo yɛ zie. Yɛ na ko la ba mine, a kpa ba mine dagaraa zu, kyɛ feɛ ba mine a yɛ puoruuderi poore, kyɛ digi ba yɔ ne tenne,

³⁵ ka a nemmenne na zaa ba naŋ ko zẽẽ a teŋɛzu kyɛ na do yɛ. A yi a nemmeŋɛ Abɛl a te tɔ Zakareya, a Barakiya bidɔɔ. Ona la ka yɛ da ko a Naaŋmen dieŋ, a zisoŋ ane a Naaŋmen bagmaalkuuri kpakyagaŋ.

³⁶ Yelmeŋɛ zaa ka N yele korɔ yɛ, a yɛlɛ ama zaa na do la a zenɛ noba zu.”

Yeezu Naŋ Koŋ A Gyɛruzɛlɛm Teŋɛ Yɛlɛ

³⁷ “Gyɛruzɛlɛm, Gyɛruzɛlɛm, a teŋkpoŋ na naŋ maŋ ko a Ŋmen-yelmanneba, kyɛ za a noba na Naaŋmen naŋ toŋ fo zie ne kubo! Gbɛre bowola ka N da boɔrɔ ka N laŋ a fo biiri taa, aŋa nɔnyaaŋaa naŋ maŋ laŋ o bilii taa a uuni lɛ, kyɛ ka fo da ba sagra!

³⁸ Nyɛ, ba bare la a fo yiri ko fo ka o leɛ dabori.

³⁹ Maa yeli ko fo, fo koŋ la nyɛ Ma, kyɛ te ta saŋ na fo naŋ yeli, ‘Soba na naŋ waana a Daana yuori eŋɛ nyɛ la maaloo.’ ”