Matio Gane 14 - Naaŋmen Nɔpaalaa Gane

Gyɔɔn Bati Kũũ Yɛlɛ

¹ A saŋ na poɔ, a Hɛrɔde naŋ da e a Galili naa da woŋ la a Yeezu yɛlɛ;

² a da yeli ko o tontonema, “A Gyɔɔn Bati la a ŋa, ba eɛɛ la ka o leɛ-iri yi a kũũ poɔ, lɛnso ka o toɔ̃ tonɔ a toŋkpeɛne ama.”

³ A Hɛrɔde da eɛɛ la ka ba nyɔge a Gyɔɔn leŋ eŋ nempagdie poɔ a o yɔɔ Filipi pɔge Hɛrɔdeya yɛlɛ zuiŋ,

⁴ bonso, Gyɔɔn da maŋ yele korɔ o la, “A ba tu sori ka fo de a fo yɔɔ pɔge.”

⁵ Aneazaa ka Hɛrɔde da boɔrɔ la ka o ko a Gyɔɔn, kyɛ o da zoro la a noba dabeɛ̃, bonso, ba da sage ka a Gyɔɔn waa la Ŋmen-yelmanna.

⁶ Kyɛ a Hɛrɔde dɔgebo bebiri tigri naŋ da wa ta, a Hɛrɔdeya pɔgeyaa da yi wa seɛɛ la a noba niŋesogɔŋ, ka Hɛrɔde poɔ da pɛle

⁷ yaga zaa, ka o da eŋ noɔre, a pɔ ka bonna zaa a pɔgsarlee naŋ na sɔre, o na ko o la.

⁸ Ka a pɔgsarlee ma Hɛrɔdeya yeli ka o te yeli ko a Hɛrɔde, “Ŋmaa a Gyɔɔn Bati zu eŋ laa poɔ ko ma.”

⁹ A naa poɔ da sããɛ la yaga, kyɛ a poɔbo o naŋ da pɔ ane a saama vi zuiŋ, o da tere la noɔre ka ba e a lɛ.

¹⁰ O da toŋɛɛ la ka ba te ŋmaa a Gyɔɔn zu a nempagdie poɔ a wa ne.

¹¹ Ba da de la a zu eŋ laa poɔ a wa ko a pɔgsarlee, ka o de te ko o ma.

¹² A Gyɔɔn potuuribo da wa de la a o eŋɛ te ũũ, kyɛ gaa te ko Yeezu a duoro.

Yeezu Naŋ Ko Noba Turi Anuu Bondirii Ka Ba Di

¹³ A Yeezu naŋ da wa woŋ a Gyɔɔn kũũ yɛlɛ, O da yi la be kpɛ gbori gaa zie kaŋ a te bebe O yoŋ. Kyɛ a nembeɛoŋ naŋ da wa woŋ O yɛlɛ, ba da yi la a tenne poore a kyɛŋ beɛre gaa O zie.

¹⁴ O naŋ da wa ta a mane noɔre, O da nyɛ la nembeɛoŋ ka ba nembaaloŋ kpɛ O yaga, ka O da saŋ a ba baalba.

¹⁵ Zie naŋ da wa maa, a O potuuribo da wa la O zie a wa yeli, “A zie ŋa e la dalempoɔ kyɛ ka saŋ meŋ faa, bare a noba ka ba gaa a tenne poore a te da bondirii.”

¹⁶ Ka a Yeezu leɛ yeli ko ba, “A ba fere ka ba gaa; yɛ bɔ bonkaŋ ko ba ka ba di.”

¹⁷ Ka ba yeli ko O, “Te ba taa bonzaa kyɛ, ka boroboro anuu ane zoma ayi mine yoŋ naane.”

¹⁸ Ka a Yeezu yeli, “Yɛ de a wa ko ma.”

¹⁹ Lɛ la ka a Yeezu pãã da e ka a noba zeŋ a moɔ zu. O naŋ wa de a boroboro anuu ane a zombilii ayi, O da gbole kaa la sazu, a maale a boroboro, kyɛ nyɔge ŋmaa, a de ko a potuuribo, ka a potuuribo meŋ de poŋ ko a noba.

²⁰ A noba zaa da di tegɛɛ la, kyɛ ka a potuuribo da wuo a boŋkpaa paale pɛre pie ne ayi.

²¹ A noba zaa naŋ da di a bondirii da ta la dɔbɔ turi anuu, kyɛ ka ba da ba sɔre a pɔgeba ane a bibiiri poɔ.

Yeezu Naŋ Kyɛŋ Koɔ̃ Zu

²² Tɔntɔbaalɛ, a Yeezu da eɛɛ la ka O potuuribo kpɛ a gbori a de weɛ ŋmaa a mane gaa a konkoori na kaŋ kyɛ ka O da bare a noba.

²³ O naŋ da wa bare a nembeɛoŋ baare, O da te do la taŋ kaŋ zu O yoŋ ka O te puori. Zie naŋ da wa maa O da be la a be O yoŋ.

²⁴ Kyɛ a saŋ ŋa poɔ, kɔmmie da iri ŋmɛ la a gbori ka o kpɛ a mane gaa tɔɔre zaa, bonso, a saseɛ da tuoro ba la.

²⁵ Zie naŋ wa nyaa bagu-pipi, a Yeezu da kyɛnɛ la a koɔ̃ zu a waana ba zie.

²⁶ Kyɛ a potuuribo naŋ da wa nyɛ O ka O kyɛnɛ a koɔ̃ zu, dabeɛ̃ da kpɛ ba la yaga, ka ba yele, “Nenseɛ la!” Ka ba da ŋmeɛrɛ dabeɛ̃ kpɛlle.

²⁷ A daadaalɛ, ka Yeezu yeli yɛlɛ ko ba, a yeli, “Yɛ nyɔge yɛmenne, maa la; yɛ ta zoro dabeɛ̃!”

²⁸ Ka Piita yeli sɔge O, “Daana ka fõõ wa la, ko ma noɔre ka N yi kyɛŋ a koɔ̃ zu a wa fo zie.”

²⁹ Ka a Yeezu yeli ko o, “Wa.” Ka a Piita yi a gbori poɔ a kyɛnɛ a koɔ̃ zu gɛrɛ a Yeezu zie.

³⁰ Kyɛ a Piita naŋ da wa nyɛ a sasekpeɛŋaa naŋ fuuro, dabeɛ̃ da kpɛ o la ka o da piili linne a koɔ̃ poɔ. Lɛ la ka o da ŋmɛ kpɛlle a yeli, “Daana, faa ma!”

³¹ Ka Yeezu talle te nyɔge o nu wieouŋ lɛ kyɛ yeli ko o, “Fõõ yelde-fẽẽ soba, bonso, ka fo bonnɔ?”

³² Ba naŋ wa te kpɛ a gbori la, ka a saseɛ da ŋmaa.

³³ A banaŋ naŋ da be a gbori poɔ da puori O la kyɛ yele, “Yelmeŋɛ zaa, fo waa la a Naaŋmen Bie.”

Yeezu Naŋ Saŋ Baalba Gyɛnesarɛ Teŋɛ Poɔ

³⁴ Ba naŋ da ŋmaa a mane do, ba da wa la Gyɛnesarɛ teŋɛ.

³⁵ A teŋɛ noba naŋ da wa baŋ ka Yeezu la, ba da toŋ yeli la ba noba zaa a paaloŋ poɔ ka ba taa a ba baalba zaa wa ne a Yeezu zie,

³⁶ a wa sɔre O ka ka ba na deɛ seene O kparoo nɔzoɔrɔ yoŋ. A baalba na zaa naŋ da seene a O kparoo da nyɛ la sammo.