Marko Gane 6 - Naaŋmen Nɔpaalaa Gane

Ba Naŋ Zagre Yeezu Naazɛrɛ Poɔ

¹ A Yeezu da yi la a be a wa O meŋɛ teŋɛ poɔ, ka a O potuuribo da tu O wa.

² A pɛnnoo bebiri daare a Yeezu da piili kanna la a puoruudie poɔ. Noba yaga naŋ da be a be a woŋ a O kannoo nɔɛ da maaɛ la ka ba yele, “Yeŋ ka a dɔɔ ŋa pɔge a yɛlɛ ama zaa? Boŋ yɛmbammo la ŋa ka ba de ko O? Yɛ nyɛ a O nuuri naŋ tonɔ toŋkpeɛne lɛ!

³ Aŋa naane a kapenta, a Mareya bie be? A O yɔɔmine naane Gyimisi, Yuzɛb, Gyudase ane Saamon be? Te ne a o yɔɔpuuli zaa naane be a kyɛ be?” Ka ba suuri da iri ne O.

⁴ Lɛ la ka a Yeezu da yeli ko ba, “Ŋmen-yelmanneba maŋ nyɛ la emmo zie zaa ka bamenne teŋɛ poɔ ane bamenne noba zie naane ka ba ba taa emmo.”

⁵ O da ba toɔ̃ toŋ toŋkpeɛŋaa zaa a be, ka a naŋ ba e O naŋ da de O nuuri pare baalba bawola mine eŋɛ ka ba da nyɛ ba sammo yoŋ naane.

⁶ Kyɛ O noɔre da maaɛ la ne ba naŋ ba taa yeldeebo. Lɛ la ka a Yeezu da yɔ yoɔrɔ a tembilii zaa poore, a kanna a noba.

A Potuuribo Pie Ne Bayi Tonnoɔre

⁷ O da boɔle la a O potuuribo pie ne bayi a da piili tonɔ ba bayi bayi, a ko ba kpeɛ̃õ sefaare zu.

⁸ O da kpãã ba la ka ba ta wa derɛ bonzaa a ba sori kyɛmmo poɔ, ka daŋgbale yoŋ naane. Ka ba ta wa derɛ bondirii, bee woɔ, bee libie eŋnɛ ba kɔɛ poore;

⁹ kyɛ ba eŋ nɔɔteɛ, a kyɛ ta wa derɛ kparre ayi suuro dɔglɔ taa.

¹⁰ O da yeli ko ba la, “Zie zaa yɛ naŋ wa ta a te kpɛ yiri kanzaa poɔ, yɛ kpeɛrɛ a be a te ta saŋ na yɛ naŋ na yi a be.

¹¹ Ka teŋɛ zaa ba wa de yɛ saanoŋ kyɛ zagre ka ba kyɛlle woŋ a yɛ kannoo, ka yɛnee wa yire a be yɛ piŋ a yɛ gbɛɛ uuruŋ bare ka a e danseɛ do ba.”

¹² A lɛ la ka ba da yi moɔle ka neɛzaa leɛ o eebo a yi o yelbebe poɔ.

¹³ Ba da digi la sefaare yaga ka a yi, kyɛ sɔ baalba yaga kããsoŋ ka ba da nyɛ sammo.

Gyɔɔn Bati Kũũ Yɛlɛ

¹⁴ A Yeezu yuori da yaare la a zie zaa a te kpɛ Naa Hɛrɔde naŋ da e Galili teŋɛ naa tobo. A noba mine da yelee la, “Gyɔɔn Bati la leɛ yi a kuuni poɔ, lɛnso ka o taa a kpeɛ̃õ a tonɔ ne a toma ama.”

¹⁵ Kyɛ ka ba mine meŋ yeli, “Elaagya la.” Ka ba mine meŋ naŋ yeli, “O waa la Ŋmen-yelmanna, aŋa a dakoroŋ Ŋmen-yelmanna na kaŋ.”

¹⁶ Kyɛ a Hɛrɔde naŋ da woŋ a yɛlɛ ama, O da yelee la, “A Gyɔɔn na zu N naŋ da ŋmaa la ka ba e ka o leɛ-iri yi a kuuni poɔ.”

¹⁷ A Hɛrɔde meŋɛ la da toŋ noba ka ba te nyɔge a Gyɔɔn, a leŋ o, a kyɛ de o te eŋ nempagdie poɔ. Bonso a Hɛrɔde da faa la o yɔɔ Filipi pɔge yuori naŋ da di Hɛrɔdeya a yi o zie. A pɔge ŋa yɛlɛ zuiŋ la ka a Hɛrɔde da nyɔge a Gyɔɔn page.

¹⁸ Bonso, a Gyɔɔn da maŋ yele korɔ la a Hɛrɔde, “A ba tu sori ka fo faa a fo yɔɔ pɔge ka o leɛ fo pɔge.”

¹⁹ A yeli ŋa zuiŋ, a Hɛrɔdeya da taa la a Gyɔɔn ne dɔŋ, a boɔrɔ sori ka o ko o, kyɛ da kontoɔ̃,

²⁰ bonso, a Hɛrɔde da zoro la a Gyɔɔn dabeɛ̃, o naŋ da baŋ ka o waa la nemmeŋɛ, a e neɛ naŋ ba taa faaloŋ zaa. A Hɛrɔde da guuro o la velaa ka ka yelzaa ta wa e o. Ka a Hɛrɔde wa woŋ a Gyɔɔn kannoo o yɛŋ da maŋ gyɛre la, kyɛ anealɛzaa o da maŋ nɔŋ ka o kyɛllɛ a Gyɔɔn kannoo.

²¹ A Hɛrɔdeya pãã da nyɛ la sori, saŋ na a Hɛrɔde dɔgebo bebiri naŋ da wa ta ka o maale tigri a boɔle o tontonema nembɛrɛ, ane a sogyɛre nembɛrɛ ane a Galili teŋɛ wederebɛ.

²² A Hɛrɔdeya pɔgeyaa da yi wa seɛ la a noba niŋesogɔ, ka a Hɛrɔde ne a saama zaa poore da pɛle ka a naa yeli ko a pɔgsarlee, “Sɔre bonzaa fo naŋ boɔrɔ n zie, N na ko fo la.”

²³ O da pɔ ne la o poɔ zaa a yeli, “Bonzaa fo naŋ sɔre, N na ko fo la, haali gba ka n napaaloŋ kyɛlee la.”

²⁴ Lɛ la ka a pɔgsarlee da zo yi gaa te soore o ma a yeli, “N sɔre boŋ a naa zie?” Ka a o ma yeli sɔge, “A Gyɔɔn Bati zu.”

²⁵ A daadaalɛ ka a pɔgsarlee leɛ ŋmore kpɛ a naa zie a te yeli ko o, “N boɔrɔ la ka fo ko ma Gyɔɔn Bati zu laa poɔ pampana ŋa.”

²⁶ A naa poɔ da sãã la yaga, kyɛ a noɔre o naŋ da pɔ ane a saama zaa zuiŋ, o da ba boɔrɔ ka o mɔŋ a pɔgsarlee a Gyɔɔn zu.

²⁷ A daadaalɛ ka o toŋ a sogyɛ kaŋ naŋ maŋ guuro o ka o te ŋmaa a Gyɔɔn zu wa ne. Ka a sogyɛ gaa te ŋmaa a Gyɔɔn zu a nempagdie poɔ,

²⁸ a de o eŋ laa poɔ a wa ne a wa de ko a pɔgsarlee. Lɛ la ka a pɔgsarlee meŋ leɛ taa te ko a o ma.

²⁹ A Gyɔɔn Bati potuuribo naŋ da wa woŋ ka ba ko o la, ba da wa de la a o eŋɛ te ũũ.

Yeezu Naŋ Ko Noba Turi Anuu Bondirii Ka Ba Di

³⁰ Apostoliimine da wa laŋ la taa a Yeezu zie a manne ko O toma na zaa ba naŋ toŋ ane a kannoo ba naŋ kanne a noba.

³¹ Noba yaga da waana la ba zie kyɛ leɛrɛ gɛrɛ, a zuiŋ a Yeezu ne O potuuribo da ba taa vuo a na di bonzaa. Lɛ la ka a Yeezu yeli ko a O potuuribo, “Yɛ e ka te gaa a wɛgyɛŋ poɔ te yoŋ a te pɛnne belaa.”

³² Lɛ la ka ba kpɛ gbori a gaa zie neɛzaa naŋ ba kye.

³³ Noba yaga da nyɛ ba la ba naŋ gɛrɛ ka ba da baŋ ka ba na la. Lɛ la ka ba da yi a tenne zaa a zo ne gbɛɛ a te daŋ ba ta a zie na ba naŋ da gɛrɛ.

³⁴ A Yeezu naŋ da wa ta a mane noɔre, O da nyɛ la nembeɛoŋ, ka ba nembaaloŋ da kpɛ O, bonso, ba da waa ŋa peere naŋ ba taa kyeenɛ; ka O da piili kanna ba yɛlɛ yaga.

³⁵ Saŋ naŋ da wa te faa, a O potuuribo da wa yeli ko O la, “A zie ŋa e la zie yiri zaa naŋ ba peɛle kyɛ ka saŋ meŋ faa;

³⁶ bare a noba ka ba gaa a tenne naŋ peɛle a te da bondirii di.”

³⁷ Kyɛ ka a Yeezu yeli sɔge ba, “Yɛ bɔ bonkaŋ ko ba ka ba di.” Ka a potuuribo da soore O, “Te mɔɔ na de la yuoni gbuli san-yɔɔ te da ne bondirii a wa ko ba ka ba di be?”

³⁸ Ka a Yeezu soore ba, “Boroboro awola la ka yɛ taa? Yɛ te kaa nyɛ.” Ba naŋ wa te kaa nyɛ la ka ba da yeli, “Boroboro anuu ane zoma ayi la bebe.”

³⁹ Lɛ la ka a Yeezu da yeli ko a potuuribo ka ba e ka a noba zeŋ gbulo gbulo a mɔmaara zu.

⁴⁰ Lɛ la ka a noba da zeŋ a gbulo gbulo ka ba mine ta kɔɔ, ba mine meŋ lezaayi ne pie.

⁴¹ A Yeezu naŋ da wa de a boroboro anuu ane a zoma ayi, O da gbole kaa la sazu a puori, kyɛ maale a kyɛ nyɔge a boroboro ŋmaare, a de ko a O potuuribo ka ba de poŋ ko a noba, kyɛ la de a zoma ayi meŋ poŋ ko ba.

⁴² Ka a noba zaa da di tege;

⁴³ kyɛ ka ba da wuo a boŋkpaa ka a pa pɛre pie ne ayi.

⁴⁴ A noba naŋ da ɔɔ a boroboro da waa la dɔbɔ turi anuu.

Yeezu Naŋ Kyɛŋ Koɔ̃ Zu

⁴⁵ A daadaalɛ ka a Yeezu da e ka a O potuuribo kpɛ gbori a de O weɛ a ŋmaara a mane gɛrɛ a Bɛsaada lambori, kyɛ ka O na bare a noba sori ka ba kuli.

⁴⁶ O naŋ da wa eŋ a noba sori baare, O da leɛ do la taŋ kaŋ zu ka O te puori.

⁴⁷ Zie naŋ da wa te maa, a gbori da be la a mane sogɔŋ, kyɛ ka a Yeezu yoŋ da naŋ be a dondoli zu.

⁴⁸ O naŋ da wa nyɛ ka a O potuuribo moɔrɔ ne la a gbori a koɔ̃ zu, sasekpeɛŋaa naŋ da fuuro tuoro ba zuiŋ, a Yeezu da iri kyɛnɛ la a koɔ̃ zu a gɛrɛ ba zie bagu-pipi saŋ, a wa e ŋa O naŋ zuoro ba bara.

⁴⁹ Kyɛ ba naŋ da wa nyɛ O ka O kyɛnɛ a koɔ̃ zu, ba da teɛre ka nenseɛ la, ka ba da ŋmeɛrɛ kpɛlle yaga zaa;

⁵⁰ bonso, ba zaa da nyɛ O la ka dabeɛ̃ da kpɛ ba yaga zaa. Kyɛ wieouŋ lɛ ka a Yeezu yeli ko ba, “Yɛ nyɔge yɛmenne, maa la, yɛ ta zoro dabeɛ̃.”

⁵¹ Lɛ la ka O pãã te do kpɛ a ba gbori poɔ, ka a saseɛ da ŋmaa. A potuuribo nɔɛ zaa da maaɛ la,

⁵² bonso, ba da ba baŋ a boroboro na yɛlɛ tɛgɛ, a ba sukyie naŋ da dare zuiŋ.

Yeezu Naŋ Saŋ Baalba Gyɛnesarɛ Teŋɛ Poɔ

⁵³ Ba naŋ da wa ŋmaa a mane wa a Gyɛnesarɛ teŋɛ lambori, ba da leŋ la a gbori a be.

⁵⁴ Ba naŋ da wa yi a gbori poɔ, noba da nyɛ ba la a baŋ a Yeezu wieouŋ lɛ,

⁵⁵ ka ba da zoro yire a paaloŋ lamboe zaa a piili tuoro ba baalba ane pama a waana ne a Yeezu zie, benee zaa ba naŋ woŋ ka a Yeezu na tu la a be tɔle.

⁵⁶ A ziiri na zaa Yeezu naŋ da gaa, a tembilii bee a teŋkponni, bee wɛre poore, ba da maŋ taa la a baalba a wa biŋ ba dare poore, a kyɛ sɔre O ka O vɛŋ ka ba seene O kparoo nɔzoɔrɔ yoŋ; ka a baalba na zaa naŋ da seene O da nyɛ ba sammo.