Marko Gane 3 - Naaŋmen Nɔpaalaa Gane

Dɔɔ Kpaŋkpaŋkũũ Kaŋ Yɛlɛ

¹ A Yeezu da la wa kpɛ la a puoruudie poɔ, ka dɔɔ kaŋ da bebe ka o nu kaŋ da kpi.

² A noba da kaara la ka ba nyɛ ka a Yeezu na saŋ la a dɔɔ ŋa a pɛnnoo bebiri daare, ka ba na toɔ̃ nyɛ saanaa tuo O.

³ Ka a Yeezu da yeli ko a dɔɔ nu kũũ, “Yi wa kyɛ.”

⁴ Lɛ la ka O soore ba, “A tu la sori ka neɛ toŋ tonsoŋ bee a toŋ tonfaa a pɛnnoo bebiri daare, a faa neɛ nyɔvore bee a iri neɛ nyɔvore?” Ka ba zaa da taŋ ba nɔɛ.

⁵ Ka a Yeezu da kaa ba wa gyeere ne suuri, kyɛ ka O poɔ da sãã ne lɛ ba sukyie naŋ dare, ka O yeli ko a dɔɔ nu kũũ, “Teɛ a fo kpaŋkpane.” Ka o teɛ a o kpaŋkpane ka o deɛ leɛ kpaŋkpaŋkpeɛŋaa.

⁶ Ka a Faraziimine da yi a daadaalɛ ka ba ne a Hɛrɔde noba da te bo nyɛ sori ba naŋ na tu kyɛ ko a Yeezu.

Neŋyaga Naŋ Da Be A Mane Noɔreŋ

⁷ A Yeezu ne O potuuribo da yi gaa la a mane noɔre, ka nembeɛoŋ naŋ yi Galili teŋɛ da tu O.

⁸ A noba naŋ da wa woŋ a O toma yɛlɛ zuiŋ ba yaga da yi la Gyudiya, Gyɛruzɛlɛm, Idumeya paaloŋ ane a Gyɔɔdan man-gaŋne paaloŋ zaa, ka ba mine yi tenne naŋ peɛle Taaya ane Sedɔŋ, ka ba zaa da wa O zie.

⁹ A Yeezu da yeli ko la a O potuuribo ka ba nare gbori ka o peɛle ka O kpɛ ka a nembeɛoŋ ta wa fogle O ŋmore;

¹⁰ bonso, O da saŋ la baalba yaga, azuiŋ banaŋ zaa naŋ da waa baalba da fefegrɛ la a boɔrɔ ka ba seene O.

¹¹ Ka a sefaare wa nyɛ O zaa, a maŋ le vɔgle la O niŋesogɔ, kyɛ kyeerɛ yele, “Fõõ la a Naaŋmen Bie!”

¹² Kyɛ a Yeezu da maŋ tanne a la ka a ta vɛŋ ka ba baŋ neɛ na O naŋ waa.

Yeezu Naŋ Kaa-iri A Potuuribo Pie Ne Bayi

¹³ A Yeezu da do la taŋzu kyɛ boɔle a banaŋ O naŋ da boɔrɔ ka ba wa O zie.

¹⁴ O da kaa-iri la ba pie ne bayi, a da boɔlɔ ba apostoliimine, ka ba na be O zie ka O toŋ ba ka ba yi te moɔle a Ŋmen-yelnoore,

¹⁵ a taa kpeɛ̃õ digre ne sefaare bara.

¹⁶ A pie ne bayi na O naŋ da boɔle la bama; Saamon (ona la ka O da pore o yuori ka Piita);

¹⁷ Gyimisi ane o yɔɔ Gyɔɔn, a Zɛbɛdii bidɔbɔ, (ba na la ka a Yeezu da pore ba yuori ka Boɔnage, a yuori tɛgɛ la “Saa Biiri”);

¹⁸ ane Anduru, ane Filipi, Batolomi, Matio, Tɔmaase ane Gyimisi a Alfeo bidɔɔ, Tadiyo, Saamon a Zɛlɔte,

¹⁹ ane Gyudase Ezekarɔte, a onaŋ naŋ da yi a Yeezu puori.

Yeezu Ane Bɛlezɛbu Yɛlɛ

²⁰ Lɛ la ka Yeezu da leɛ kuli yiri; ka a nembeɛoŋ la maaleŋ wa lantaa, ka O ne a O potuuribo da ba taa aroo na di diibu.

²¹ A O yideme naŋ da wa woŋ a lɛ, ba da yi gaaɛ la ka ba te taa O gaa ne yiri, bonso, a noba da yele la, “O yaara la.”

²² A Naaŋmen bege wulwulibo mine naŋ da yi Gyɛruzɛlɛm wa, da yelee la, “O taa la Bɛlezɛbu, a sefaare zaa naa, ona la ko O a kpeɛ̃õ ka O digre ne a sefaare bara.”

²³ Ka a Yeezu da boɔle ba wa ne O zie, a wa lɔɔ sekpɔgɔ ko ba, “Wola ka Setaana na toɔ̃ digi Setaana bare?

²⁴ Ka naaloŋ wa kyataa a leɛ zɔɔrɔ ne o meŋɛ, a naaloŋ na na le la.

²⁵ Ka yiri zaa deme meŋ wa kyataa a zɔɔrɔ ne bamenne, a yiri na na le la.

²⁶ Ka Setaana wa iri leɛ zɔɔrɔ ne o meŋɛ, o koŋ baŋ are, kyɛ a o baaroo taɛ la.

²⁷ Neɛzaa kontoɔ̃ kpɛ gandaa yiri a te fa o boma, ka o naŋ ba daŋ leŋ a gandaa sɛre. A lɛ puoriŋ la ka o sereŋ na toɔ̃ ŋma a gandaa yiri.”

²⁸ “Yelmeŋɛ ka N yele korɔ yɛ, nensaalba yelbebe zaa na nyɛ la sudi, ane zoma na zaa ba naŋ to Naaŋmen;

²⁹ kyɛ neɛ na zaa naŋ to a Vooroŋ Soŋ zone koŋ nyɛ yelbebe sudi togitogi, kyɛ o na taa la yelbieri saanaa naŋ ba taa baaroo”;

³⁰ bonso ba da yelee la, “O taa la sefaa.”

Noba Na Naŋ Sereŋ E A Yeezu Noba

³¹ Lɛ la ka a Yeezu ma ane o yɔɔmine da wa are yeŋ poɔ kyɛ toŋ ka ba kpɛ te boɔle O.

³² Neŋyaga da zeŋ ŋmaagyili O la, ka ba yeli ko O, “Fo ma ne fo yɔɔmine ne fo yɔɔpuuli are la yeŋ poɔ a soorɔ fo yɛlɛ.”

³³ Ka O yeli sɔge ba, “Nembuo la N ma ane N yɔɔmine?”

³⁴ O naŋ da wa kaa a noba naŋ zeŋ ŋmaagyili O, O da yelee la, “N ma ane N yɔɔmine la bama naŋ zeŋ kyɛ!

³⁵ Soba na zaa naŋ erɛ Naaŋmen poboɔbo waa la N yɔɔ ane N yɔɔpuulee ane N ma.”