Marko Gane 2 - Naaŋmen Nɔpaalaa Gane

Yeezu Naŋ Saŋ Gbɛre Kaŋ

¹ Beri mine naŋ da wa tɔle puoriŋ, Yeezu da leɛ gaa la Kapanum teŋɛ ka a noba da woŋ ka O leɛ kuli waɛ la.

² A lɛ la ka neŋyaga da wa lantaa a be, a fogle taa a ba taa gbɛɛ bimmu zie a te laŋ ne a yiri dendɔre, kyɛ ka a Yeezu da moɔlɔ a Naaŋmen yelbiri korɔ ba.

³ Lɛ la ka noba mine da taa dɔɔ kaŋ eŋɛ naŋ kpi waana ne O zie ka noba banaare tuo o.

⁴ A noba naŋ da waa yaga a fogle a zie zaa, ka ba kontoɔ̃ taa a baala ta ne a Yeezu zie zuiŋ, ba da do la a peɛzu a te ŋmaa sulee, a de a dɔɔ ne a boŋganaa turi a sulee noɔre ka o sigi te ta benee a Yeezu naŋ zeŋ a die poɔ.

⁵ A Yeezu naŋ da wa nyɛ a noba yeldeebo naŋ seŋ lɛ, O da yeli ko la a dɔɔ baala, “N bidɔɔ, a fo yelbebe nyɛ la sudi.”

⁶ A Naaŋmen bege wulwulibo mine naŋ da zeŋ a be da ŋmeɛrɛ la ba gyɛŋ a yele:

⁷ “Bonso ka a neɛ ŋa soba yele yɛlɛ ŋaa? O to la Naaŋmen! Nembuo la na toɔ̃ di yelbebe suuri ka Naaŋmen yoŋ naane?”

⁸ A daadaalɛ ka a Yeezu da baŋ ka ba da teɛrɛ la a yɛlɛ ama ba pooreŋ, ka O soore ba, “Bonso ka yɛ taa a teɛrɛ ama taaba?

⁹ A ama buo yeluu la e mɔlɔ, N naŋ na yeli ko a dɔɔ baala, ‘A fo yelbebe nyɛ la sudi,’ bee ka N yeli, ‘Iri de a fo boŋganaa gɛrɛ’?

¹⁰ Kyɛ N na e la ka yɛ baŋ ka a Nensaala Bie taa la kpeɛ̃õ a teŋɛzu kyɛ ka O di yelbebe suuri ko noba”; a Yeezu pãã da yeli ko la a dɔɔ baala:

¹¹ “N yele korɔ fo la, iri are, de fo boŋganaa a kulo.”

¹² A daadaalɛ ka a dɔɔ baala deɛ iri de o boŋganaa tuo a kyɛnɛ a noba zaa niŋeŋ, ka ba zaa nɔɛ da maa ka ba danna Naaŋmen a yele, “Te daŋ ba nyɛ a yeli ŋa tɔ zaa!”

Yeezu Naŋ Boɔle Levi

¹³ A Yeezu da leɛ yi gaa la a mane noɔre, ka neŋyaga da wa ŋmaagyili O ka O da kanne ba.

¹⁴ O naŋ da kyɛnɛ gɛrɛ, O da nyɛ la Levi, a Alfeo bidɔɔ ka o zeŋ zuyɔɔ die poɔ, ka O yeli ko o, “Iri tuuro ma.” Ka o vaa-iri a tuuro O.

¹⁵ A Yeezu naŋ da wa zeŋ a Levi yiri poɔ a dire bondirii, a zuyɔɔ-derebɛ ane yelbe-erebɛ yaga da wa laŋ ne O la ne O potuuribo. Bonso noba yaga da tuuro O la.

¹⁶ A Naaŋmen bege wulwulibo mine naŋ da waa Faraziimine, naŋ da wa nyɛ a Yeezu naŋ laŋ dire ne yelbe-erebɛ ane a zuyɔɔ-derebɛ, ba da soore la a O potuuribo, “Bonso ka O laŋ dire ne zuyɔɔ-derebɛ ane yelbe-erebɛ?”

¹⁷ A Yeezu naŋ da wa woŋ a lɛ, O da yeli ko ba la, “Banaŋ naŋ taa laafeɛ ba boɔrɔ tegetegrɛ, kyɛ banaŋ naŋ ba taa laafeɛ la boɔrɔ tegetegrɛ; N ba wa ka N boɔle a nemmenne, N waɛ la ka N boɔle a yelbe-erebɛ.”

Ba Naŋ Soore Nɔleŋ Yɛlɛ

¹⁸ A Gyɔɔn potuuribo ane a Faraziimine da lennee noɔre, ka noba mine da wa soore a Yeezu, “Bonso ka Gyɔɔn potuuribo ane a Faraziimine potuuribo maŋ leŋ noɔre kyɛ ka a fo potuuribo ba maŋ leŋ noɔre?”

¹⁹ Ka a Yeezu yeli ko ba, “Yɛ teɛre ka pɔgde tigri saama na toɔ̃ leŋ la noɔre saŋ na a pɔgpaalaa serɛ naŋ be ba zie be? Ka a pɔgpaalaa serɛ naŋ wa kyɛnɛ be ba zie, ba kontoɔ̃ leŋ noɔre.

²⁰ A beri waana la ka ba na de a pɔgpaalaa serɛ yi ba zie, a lɛ puoriŋ la ka ba pãã na lenne noɔre.”

²¹ “Neɛzaa ba derɛ pɛmpaalaa liire ne kpar-koraa; ka o naŋ e a lɛ, a pɛmpaalaa na kyeɛ̃ yi la a pɛnkoraa eŋɛ ka a voɔre yɛlle gaŋ a kyeɛ̃-koraa na.

²² Kyɛ neɛzaa ba maŋ de dããpaala eŋ dããwo-korɔ poɔ, ka o naŋ e a lɛ, a dããpaala na e la ka a dããwo-korɔ puri, ka a dãã ne a woore zaa wɛ. Kyɛ ba maŋ de la dããpaala eŋ dããwo-paala poɔ.”

A Pɛnnoo Bebiri Yɛlɛ

²³ A pɛnnoo bebiri kaŋ daare, Yeezu da kyɛnɛ la a te tu kyi weɛ poɔ. Ba naŋ da kyɛnɛ gɛrɛ, a O potuuribo da piili ŋmaara la a kazuri mine.

²⁴ Ka a Faraziimine soore O, “Nyɛ, bonso ka ba erɛ yeli naŋ ba seŋ ka ba e a pɛnnoo bebiri daare?”

²⁵ Ka a Yeezu leɛ soore ba, “Yɛ mɔɔ daŋ ba sɔre a gane poɔ nyɛ lɛnɛɛ Davil ne o potuuribo naŋ da e, saŋ na kɔŋ naŋ da kpɛ ba, ka ba da boɔrɔ bondirii be?

²⁶ O da kpɛ la a Naaŋmen yiri poɔ, a saŋ na Abeata naŋ da waa a Naaŋmen bagmaalkare neŋkpoŋ, a te de a Boroboro Na Ba Naŋ De Ko Naaŋmen, a ɔɔ kyɛ de a mine ko a o noba, kyɛ ka neɛzaa da ba taa sori ka o ɔɔ a, ka a Naaŋmen bagmaalkare neŋkpoŋ yoŋ naane.”

²⁷ Lɛ la ka a Yeezu pãã da yeli ko ba, “Naaŋmen maale la a pɛnnoo bebiri nensaala zuiŋ, O ba maale nensaala a pɛnnoo bebiri zuiŋ;

²⁸ azuiŋ a Nensaala Bie la a pɛnnoo bebiri daana.”