Marko Gane 13 - Naaŋmen Nɔpaalaa Gane

Yeezu Naŋ Yeli A Naaŋmen Die Sããmo Yɛlɛ

¹ A Yeezu naŋ da wa yi a Naaŋmen die poɔ, a O potuuro kaŋ da yeli ko O la, “Wulwullo, nyɛ a kubo naŋ waa bɛrɛ seŋ lɛ, ka a yie meŋ waa kponni seŋ!”

² Lɛ la ka a Yeezu soore o, “Fo nyɛ la a yibɛrɛ ama? Ba koŋ bare kusi-yenaa zaa ka o dɔgle o tɔ zu; a zaa pabo ka ba na daa lɔɔ.”

³ A Yeezu naŋ da wa zeŋ a Oliva Taŋzu a tori a Naaŋmen die la ka Piita, Gyimisi, Gyɔɔn ane Anduru yoŋ da wa O zie a wa soore O:

⁴ “Yeli ko te, boŋ saŋ la ka a ama na e, ane boŋ yelmannaa la ka te na nyɛ kyɛ baŋ ka a ama zaa waana la ka a e?”

⁵ Lɛ la ka a Yeezu piili yele korɔ ba, “Yɛ gu yɛmenne velaa ka neɛzaa ta wa bɛlle yɛ.

⁶ Noba yaga na wa la N yuori eŋɛ a wa yele, ‘Maa la O!’ Kyɛ bɛlle noba yaga ka ba bɔre.

⁷ Ka yɛnee wa wono zɔɔre yɛlɛ ane zɔɔre yɛlɛ ba naŋ hunno yele, yɛ ta wa vɛŋ ka dabeɛ̃ kpɛ yɛ. A ferɛɛ la ka a ama zaa e, kyɛ ka a teŋɛ naŋ koŋ baare sɛre.

⁸ Bonso, paaloŋ na iri zɔɔrɔ ne la o tɔ paaloŋ, ka naaloŋ ŋa noba iri zɔɔrɔ ne naaloŋ kaŋ noba. A teŋɛ na gbigri la ziiri yaga, kyɛ ka kɔŋkpoŋ le. Kyɛ a ama zaa na waa seŋ ŋa pɔg-poɔ naŋ ta dɔgebo ka a o poɔ piili beɛrɛ.”

Dɔgroŋ Naŋ Waana Yɛlɛ

⁹ “Kyɛ yɛnee, yɛ gu yɛmenne velaa, bonso, ba na de yɛ la ko a sɛrediribe; ba na ŋmɛ yɛ la a puoruuderi pooreŋ; kyɛ taa yɛ gaa ne a gɔbena ane namine niŋesogɔ N zuiŋ, ka a e danseɛ ba zie.

¹⁰ Kyɛ a ferɛɛ la ka ba daŋ moɔle a Ŋmen-yelnoore a tenne zaa poore.

¹¹ Ka ba naŋ wa taa yɛ gaa ne sɛrɛɛdiibu zie, yɛ ta vɛŋ ka a ferɛ yɛ ne bonna yɛ naŋ na yeli; kyɛ yɛ yeli yɛlɛ na zaa ba naŋ na ko yɛ a saŋ na poɔ, bonso, a ba e ka yɛnee la na yele a yɛlɛ, kyɛ a Vooroŋ Soŋ la.

¹² Yɔɔ na maŋ iri la o yɔɔ tere ka ba ko, ka saa iri o bie tere ka ba ko. Biiri na kyiiri la ba dɔgreba a vɛŋ ka ba ko ba.

¹³ A noba zaa na kyiiri yɛ la N zuiŋ. Kyɛ soba na zaa naŋ na di kannyiri te ta a baaroo saŋ, na nyɛ la faabo.”

A Kyiiruŋ Kpoŋ Kpoŋ Yɛlɛ

¹⁴ “Kyɛ ka yɛnee wa nyɛ a kyiiruŋ kpoŋ kpoŋ ka o be a Naaŋmen die zisoŋ poɔ kyɛ ka a ba seŋ ka o bebe, (vɛŋ ka a neɛ naŋ sɔrɔ a gane baŋ a tɛgɛ), a ferɛɛ la ka banaŋ naŋ be Gyudiya paaloŋ zo kpɛ a tanne poore.

¹⁵ Soba na zaa naŋ be peɛzu ta la leɛ sigi bee a kpɛ die poɔ ka o de bonzaa yi ne.

¹⁶ Soba na zaa naŋ be weɛ poɔ ta wa leɛ kulo ka o te de kparoo.

¹⁷ Pɔgpoore ane banaŋ naŋ taa biiri ka ba ɛnnɛ a bebie na poɔ yuori la we!

¹⁸ Yɛ puoro ka a ta wa erɛ a sakyɔre saŋ.

¹⁹ Bonso, a beri na poɔ dɔgɛɛ ba naŋ daŋ ba nyɛ o tɔ a yi a tendaa piiluu Naaŋmen naŋ da iri a wa ta zenɛ, bee a daŋ na la nyɛ a dɔgɛɛ ŋa tɔ, na wa la.

²⁰ Ka a Daana da ba ŋmaa a bebie ama kyɛlɛɛ bare, nensaala zaa da kontoɔ̃ nyɛ faabo. Kyɛ a noba na O naŋ kaa-iri zuiŋ, O ŋmaa la a bebie ama mine bare.

²¹ Kyɛ ka neɛzaa wa yeli ko yɛ a saŋ na poɔ, ‘Nyɛ! A Mɛzaaya la kyɛ!’ bee, ‘Nyɛ! O be la kyɛ!’ Yɛ ta sage de.

²² Kaŋwaa mɛzaaya mine ane kaŋwaa Ŋmen-yelmanneba na wa la, a erɛ yelwulii kyɛ tonɔ toŋkpeɛne ka ba bɛlle noba ka ba tuli, ka ba naŋ na toɔ̃, ba na e la ka a neŋkaa-irri meŋ gba tuli.

²³ Kyɛ yɛ gu yɛmenne velaa, N daŋ yeli la a yɛlɛ zaa ko yɛ.”

A Nensaala Bie Waabo Yɛlɛ

²⁴ “Kyɛ a beri na poɔ, a dɔgɛɛ ŋa puoriŋ, a ŋmenaa na ligi la, ka a kyuu meŋ veɛloŋ koŋ kyaane,

²⁵ ka a ŋmarbie na yire sazu pɔrɔ lere, kyɛ ka ba na zɛŋ a sazu boŋkpeɛne zaa.

²⁶ Ba pãã na nyɛ la ‘a Nensaala Bie ka O yi a sagama poɔ waana’ ne kpeɛ̃õ ane puubu.

²⁷ O pãã na toŋ la O malekere a teŋɛzu lamboe anaare zaa ane a teŋɛ pare te tɔ a sazu baaroo zie, ka ba te boɔle O neŋkaa-irri zaa lantaa.”

A Kaŋkaŋteɛ Yelwulaa

²⁸ “Yɛ zanne yɛŋ yi a kaŋkanteɛ sekpɔgre poɔ: ka o ulli-pɔrɔ wa te bɔrɔ vaare yɛ maŋ baŋ ka sẽɛ kpeɛrɛ la.

²⁹ A lɛ ne o zu, ka yɛnee wa nyɛ a yɛlɛ ama ka a erɛ yɛ baŋ ka a Nensaala Bie waabo saŋ peɛlɛɛ la, a gba be a dendɔreŋ.

³⁰ Yelmeŋɛ zaa ka N yele korɔ yɛ, a zenɛ noba boorɔ ŋa koŋ kpi baare sɛre kyɛ ka a yɛlɛ ama zaa e.

³¹ Sazu ne teŋɛ na wa tɔle gaa la, kyɛ a N yelbie koŋ baŋ tɔle gaa togitogi.”

Neɛzaa Ba Baŋ A Bebiri Bee A Saŋ

³² “Kyɛ neɛzaa ba baŋ a bebiri bee a saŋ a Nensaala Bie naŋ na wa. A tenvelaa malekere bee a Bidɔɔ meŋ gba ba baŋ a saŋ, ka a Saa yoŋ naane.

³³ Yɛ gu yɛmenne velaa, a ta gbire; bonso, yɛ ba baŋ a wagre na a saŋ naŋ na ta.

³⁴ A waa seŋ ŋa dɔɔ naŋ yi ka o tu sori, a pãã de o yiri zu kaabo eŋ o gbaŋgbaare nuuriŋ, ka kanzaa taa o toma. Kyɛ ka o yeli ko a dendɔ-guuro, guuro a dendɔre velaa.

³⁵ Azuiŋ, yɛ ta wa gbire, bonso, yɛ ba baŋ daare na a yidandɔɔ naŋ na wa, ka zimaane la bee, ka tensogpozentaa la bee, ka nɔdaa kommo saŋ la bee, ka zinyaane la,

³⁶ ka lɛ naane o na uri wa nyɛ yɛ la ka yɛ gbire.

³⁷ Kyɛ a yɛlɛ N naŋ yeli ko yɛ, a ne a zu la ka N yeli ko ba zaa: Yɛ ta gbire.”