Marko Gane 1 - Naaŋmen Nɔpaalaa Gane

A Gyɔɔn Bati Naŋ Moɔle A Yeezu Waabo Yɛlɛ

¹ A Naaŋmen Bie, Yeezu Kirista yelnoore piiluu.

² Aŋa lɛ ba naŋ sɛge a Ŋmen-yelmanna Azaaya gane poɔ: “Nyɛ, N tonɔ la n tontonɔ ka o de fo weɛ, O naŋ na nare a fo sori;

³ kɔkɔre kaŋ ŋmeɛrɛ la kpɛlle a wɛgyɛŋ poɔ: ‘Nare a Daana sori, maale O sobie ka a tori,’ ”

⁴ A Gyɔɔn Bati da wa yi la a wɛgyɛŋ poɔ, a moɔlɔ a Naaŋmen yelbiri ka noba leɛ ba eebo a de suobu ka ba yelbebe nyɛ sudi.

⁵ A Gyudiya tembilii noba zaa ane a Gyɛruzɛlɛm teŋɛ deme zaa da yire gɛrɛ la a Gyɔɔn zie, a kyiire ba yelbebe kyɛ ka o da korɔ ba suobu a Gyɔɔdan baa poɔ.

⁶ A Gyɔɔn da su la bontaŋ kɔɔloŋ kparoo kyɛ da seɛ gane kpagre o seɛŋ, a da ɔɔrɔ sobo kyɛ dire tammalaara.

⁷ O da moɔlɔ la a Ŋmen-yelnoore a yele, “Neɛ naŋ taa kpeɛ̃õ yaga gaŋ ma na tu la n puoriŋ wa, N gba ba seŋ ka N zuuni lori O nɔɔteɛ mie.

⁸ N ko yɛ la suobu ne koɔ̃; kyɛ Ona na ko yɛ la suobu ne a Vooroŋ Soŋ.”

A Yeezu Suobu Deebo Yɛlɛ

⁹ A beri na poɔ, Yeezu da yi la Naazɛrɛ naŋ be Galili paaloŋ a wa ka Gyɔɔn ko O suobu a Gyɔɔdan baa poɔ.

¹⁰ A Yeezu naŋ da wa yire a koɔ̃ poɔ, O da nyɛ la a saluoni ka o yuo ka a Vooroŋ Soŋ sigi wa aŋa ŋmanee a wa dɔɔ O zu.

¹¹ Ka kɔkɔre kaŋ da yi sazu a yele, “Fõõ la N Bidɔɔ, N Poyɛŋ Bie; fõõ la ka N poɔ pɛle ne yaga zaa.”

A Yeezu Enyaabo Yɛlɛ

¹² A daadaalɛ ka a Vooroŋ Soŋ de a Yeezu te kpɛ ne a wɛgyɛŋ poɔ.

¹³ O da be la a wɛgyɛŋ poɔ beri lezaayi, ka Setaana da wa e O nyɛ. O da laŋ kpeɛrɛ ne la a wɛdonne; ka a malekere da kaara O zie.

Yeezu Naŋ Piili O Toma A Galili Paaloŋ Poɔ

¹⁴ Ba naŋ da wa nyɔge a Gyɔɔn eŋ a nempagdie poɔ, a lɛ puoriŋ, Yeezu da wa la Galili poɔ a wa moɔlɔ a Ŋmen-yelnoore,

¹⁵ a yele, “A saŋ taɛ la, ka a Naaŋmen naaloŋ peɛle, yɛ leɛ yɛ eebo, a sage de a Ŋmen-yelnoore.”

Yeezu Naŋ Boɔle O Dɛndɛŋ Potuuribo

¹⁶ A Yeezu naŋ da wa kyɛnɛ a Galili Mane noɔreŋ, O da nyɛ la Saamon ne o yɔɔ Anduru ka ba lɔɔrɔ ba zonkyogri a mane poɔ; bonso, ba da waa la zonnyɔgrebɔ.

¹⁷ Ka a Yeezu da yeli ko ba, “Yɛ wa tuuro ma, N na e la ka yɛ leɛ nyɔgrɔ nensaalba aŋa zoma.”

¹⁸ A daadaalɛ ka ba deɛ bare a ba zonkyogri kyɛ tuuro O.

¹⁹ O naŋ da la kyɛŋ tɔle belaa la ka O nyɛ Zɛbɛdii bidɔbɔ Gyimisi ane o yɔɔ Gyɔɔn, ka ba be ba gbori poɔ a liire ba zonkyogri.

²⁰ A daadaalɛ ka Yeezu boɔle ba; ka ba da bare a ba saa Zɛbɛdii ne a tontonema a gbori poɔ kyɛ wa tuuro a Yeezu gɛrɛ.

Dɔɔ Kaŋ Naŋ Taa Sefaa Yɛlɛ

²¹ Ba da gaa la Kapanum; a pɛnnoo bebiri daare naŋ da wa ta, O da kpɛ la a puoruudie a te kanne noba.

²² A noba nɔɛ da maaɛ la ane a O kannoo, bonso, O da kanna ba la aŋa neɛ naŋ taa kpeɛ̃õ. A O kannoo da ba waa ŋa a Naaŋmen bege wulwulibo kannoo.

²³ A lɛ poɔ, dɔɔ kaŋ naŋ da taa sefaa da be la a puoruudie poɔ,

²⁴ a da ŋmɛ kpɛlle a yele, “Boŋ ka fo boɔrɔ ka fo e te, Yeezu naŋ yi Naazɛrɛ? Fo waɛ la ka fo wa sãã te be? N baŋ la neɛ na fo naŋ waa, fõõ la a Naaŋmen Nensoŋ na.”

²⁵ Ka a Yeezu da tanne o a yele, “Bare gɔnne kyɛ wa yi a dɔɔ eŋɛ!”

²⁶ Ka a sefaa e ka a dɔɔ iri gyemɛ, a kyeerɛ ne kɔkɔkpeɛŋaa kyɛ wa yi a dɔɔ eŋɛ.

²⁷ A noba zaa nɔɛ da maaɛ la, ka ba soorɔ taa, “Boŋ yeli la ŋa? Wuli paalaa naŋ taa kpeɛ̃õ! O gba maŋ ko la sefaare noɔre, ka a tu a lɛ.”

²⁸ Wieouŋ lɛ ka a Yeezu yɛlɛ da yaare a Galili paaloŋ zaa.

Yeezu Naŋ Saŋ Baalba Yaga Saamon Yiri Poɔ

²⁹ A Yeezu ne a O potuuribo naŋ da wa yi a puoruudie poɔ, ba da gaa te kpɛ la Saamon ane o yɔɔ Anduru yiri. Gyimisi ane Gyɔɔn meŋ da poɔ la a ba poɔ.

³⁰ A Saamon deɛmpɔge da gaŋɛɛ la ne entole, ka ba da yeli o yɛlɛ ko a Yeezu.

³¹ Ka a Yeezu da te nyɔge o nu ka o iri. Lɛ la ka a entole da bare o, kyɛ ka o iri piili kaara ba zie.

³² A zimaane na, ŋmenaa naŋ da wa te kpeɛrɛ, ba da taa la ba baalba ane banaŋ naŋ da taa sefaare wa ne a Yeezu zie.

³³ Ka a teŋɛ noba zaa da wa gbiŋ a Saamon yiri dendɔreŋ.

³⁴ Ka a Yeezu da saŋ noba yaga naŋ da beɛrɛ baaloŋ boorɔ zaa, kyɛ digi sefaare yaga bare. A Yeezu da ba sage ka a sefaare yeli yelzaa, bonso, a da baŋ O la.

Yeezu Naŋ Yɔ Kanna Galili Poɔ

³⁵ A baguo saŋ, zie naŋ da naŋ ba vɛle sɛre, a Yeezu da iri gaa la zie kaŋ O yoŋ a te puori.

³⁶ Ka Saamon ane a o taaba da yi yɔ boɔrɔ O.

³⁷ Ba naŋ da wa te nyɛ O, ba da yeli ko O la, “A noba zaa yɔ boɔrɔ fo la.”

³⁸ Ka a Yeezu yeli sɔge ba, “Yɛ e ka te gaa a tenne na naŋ peɛle ka N te moɔle a yelbiri a be meŋ. Bonso, a lɛ zuiŋ la ka N wa.”

³⁹ A lɛ la ka a Yeezu da yɔ a Galili paaloŋ zaa a moɔlɔ a yelbiri ba puoruuderi poore kyɛ digre sefaare bara.

Yeezu Naŋ Saŋ Kɔŋkɔŋ Kaŋ

⁴⁰ Kɔŋkɔŋ kaŋ da wa la a Yeezu zie, a wa gbi dumo kyɛ sɔre O a yele, “Ka fõõ wa boɔrɔ, fo na toɔ̃ saŋ ma la.”

⁴¹ Nembaaloŋ da kpɛ la a Yeezu yaga, ka O da teɛ O nu a seene a dɔɔ, kyɛ yeli ko o, “N boɔrɔ la, nyɛ laafeɛ!”

⁴² A daadaalɛ ka a dɔɔ kɔnnoŋ da baare, kyɛ ka o da leɛ neŋkpeɛŋaa.

⁴³ A Yeezu naŋ da wa kpãã o yaga zaa baare, O da yeli ko o la:

⁴⁴ “Baŋ ne a, a ta wa yele yelzaa korɔ neɛzaa, kyɛ gaa te de fo meŋɛ wuli a Naaŋmen bagmaale wederɛ, a kyɛ pãã tere a kyɔɔtaare na a Moozul naŋ biŋ noɔre ka ba maŋ tere, ka a e danseɛ ba zie ka fo sereŋ nyɛ la sammo.” A daadaalɛ ka O da bare o ka o gɛrɛ.

⁴⁵ Kyɛ a dɔɔ da yi te moɔle la a yɛlɛ, a ŋmɛ a yaare zie zaa. A yɛlɛ naŋ da yaare yaga zuiŋ, a Yeezu da koŋ la toɔ̃ gaa teŋɛ zaa ka a noba ba baŋ ne O yɛlɛ. A Yeezu da be la a tembilii poore kyɛ ka noba da yire ziiri zaa waana O zie.