Luka 7 - Naaŋmen Nɔpaalaa Gane

Yeezu Naŋ Saŋ Sogyɛre Kɔɔ Neŋkpoŋ Tontonɔ

¹ A Yeezu naŋ da wa yeli O yɛlɛ zaa ko a noba ka ba woŋ baare, O da kpɛ la a Kapanum teŋɛ poɔ.

² Sogyɛre kɔɔ neŋkpoŋ kaŋ naŋ da be a teŋɛ na poɔ da taa la o gbaŋgbaa kaŋ o naŋ taa o yɛlɛ yaga zaa, ka o da beɛrɛ a te tɔgle kũũ.

³ A sogyɛre neŋkpoŋ ŋa naŋ da wa woŋ a Yeezu yɛlɛ, o da toŋ la a Gyuumine nembɛrɛ mine a Yeezu zie, ka ba te sɔre O ka O wa saŋ a o gbaŋgbaa.

⁴ Ba naŋ da wa a Yeezu zie, ba da sɔre O la yaga zaa, a yele, “O sereŋ seŋ ne a la ka fo e a ŋaa ko o,

⁵ bonso, o nɔŋ la a te noba, kyɛ ona meŋ la mɛ a te puoruudie ko te.”

⁶ Ka a Yeezu ne ba da gaa, kyɛ O naŋ da wa te peɛlɛ a yiri, a sogyɛre kɔɔ neŋkpoŋ da toŋ la o bamine ka ba te yeli ko a Yeezu, “Daana, ta dɔgre fo meŋɛ, bonso, N ba seŋ ne ka fo wa kpɛ N yiri poɔ;

⁷ a lɛnso ka N da ba teɛre ka N wa fo zie. Kyɛ deɛ yeli a yelbiri yoŋ, a vɛŋ ka N gbaŋgbaa nyɛ o sammo.

⁸ Bonso, maa meŋɛ taa la nembɛrɛ N naŋ be ba puliŋ, ka N meŋ taa a sogyɛre mine ka ba be N puliŋ. Ka maa yeli ko kaŋ, ‘Gaa kyɛ’, o maŋ gaa la, a la yeli ko kaŋ, ‘Wa’, ka o wa, a la yeli ko N gbaŋgbaa, ‘E yeli ŋa’, ka o e.”

⁹ A Yeezu naŋ da woŋ a ŋaa, O noɔre da maaɛ la, ka O leɛ yeli ko a noba naŋ tuuro O, “Maa yeli ko yɛ, N daŋ ba nyɛ a yeldeebo ŋa tɔ a Izerayɛl poɔ.”

¹⁰ A banaŋ ba naŋ da toŋ, naŋ da leɛ gaa a yiri, ba da te nyɛ la a baala ka o nyɛ laafeɛ.

Yeezu Naŋ Seŋ Pɔgekoɔre Kaŋ Bidɔɔ Kũũ Poɔ

¹¹ A lɛ puoriŋ, Yeezu da gaa la teŋɛ kaŋ yuori naŋ di Nayine; ka O potuuribo ane neŋyaga da tuuro O.

¹² O naŋ da wa te tara a teŋɛ dendɔre noɔre la ka kũũ kaŋ la lɛ ka ba tuo wa yire ne. A kũũ ŋa da la o ma bidɔɔ yeni yoŋ. A teŋɛ noba yaga da be la a kopɔge ŋa zie.

¹³ A Daana naŋ da nyɛ a kopɔge, nembaaloŋ da kpɛ O la ka O yeli ko o, “Ta kono.”

¹⁴ Lɛ la ka O da tage ta kyɛ de O nu seene ne a kũũ daga, ka a noba naŋ tuo a kũũ leɛ are. Ka Yeezu yeli, “Pɔlbile, maa yeli ko fo, vaa-iri!”

¹⁵ A kũũ da iri zeŋɛɛ la a piili yele yɛlɛ, ka a Yeezu da de o ko o ma.

¹⁶ Dabeɛ̃ da kpɛ la a noba zaa, ka ba ire Naaŋmen yuori a yele, “Ŋmen-yelmanna kpoŋ yi la a te poɔ!” kyɛ ka “Naaŋmen kaa O noba ane nimibaaloŋ.”

¹⁷ A O yɛlɛ ŋa da yaare la a Gyudiya paaloŋ zaa ane a tenne zaa naŋ ŋmaagyili o.

Gyɔɔn Bati Naŋ Toŋ O Potuuribo Yeezu Zie

¹⁸ A Gyɔɔn potuuribo da manne la a yɛlɛ ama zaa ko o. Lɛ la ka o boɔle o potuuribo bayi

¹⁹ a toŋ ba ka ba gaa te soore a Daana, “Fõõ la a neɛ na naŋ na wa, bee te naŋ kyɛllɛ kaŋ?”

²⁰ A noba naŋ da wa a Yeezu zie, da wa yelee la, “Gyɔɔn Bati la toŋ te a fo zie, ka te wa soore fo, ‘Fõõ la a neɛ na naŋ waana, bee te naŋ kyɛllɛ neŋyuo?’ ”

²¹ A Yeezu deɛ da saŋ la noba yaga ba baaloŋ, ba woloŋ, a kyɛ digi sefaare bare, ka zɔnne yaga nimie da yuori ka ba nyɛrɛ.

²² Ka a Yeezu da yeli sɔge ba, “Yɛ gaa te yeli ko a Gyɔɔn bonna yɛ naŋ nyɛ kyɛ woŋ: a zɔnne nyɛrɛ la, ka a gbɛrɛɛ kyɛnɛ, ka kɔnne nyɛ ba sammo, ka a wonni wono, ka a kuuni leɛrɛ ire, kyɛ ka ba moɔle a Ŋmen-yelnoore ko a nandemee.

²³ Kyɛ soba na zaa naŋ ba bonnɔ ma nyɛ la maaloo.”

²⁴ A Gyɔɔn noba o naŋ da toŋ naŋ da wa leɛ gaa baare, Yeezu da piili yele la a Gyɔɔn yɛlɛ korɔ a nembeɛoŋ, “Boŋ la ka yɛ da yi gaa a wɛgyɛŋ poɔ ka yɛ te nyɛ? Kantɛroo saseɛ naŋ fuuro ka o lɛŋnɛ la be?

²⁵ Ka boŋ mɔɔ la ka yɛ pãã da yi gaa ka yɛ te nyɛ? Neɛ kaŋ naŋ su nabi-kparre la be? Yɛ nyɛ, banaŋ naŋ suuro nabi-kparre kyɛ dire boŋkãã, kpeɛrɛ la nayie poore.

²⁶ Ka boŋ pãã la ka yɛ da yi gaa ka yɛ te nyɛ? Ŋmen-yelmanna be? Õõ, maa yeli ko yɛ, O gba gaŋ la Ŋmen-yelmanna.

²⁷ A soba ŋa yɛlɛ la ka ba da sɛge: ‘Nyɛ, N tonɔ la N tontonɔ ka o de fo weɛ, o naŋ na nare a fo sori bare fo.’

²⁸ Maa yeli ko yɛ, a pɔgeba bidɔgre zaa poɔ, kanzaa ba kyebe naŋ e kpoŋ gaŋ a Gyɔɔn; kyɛ neɛ naŋ e bile a Naaŋmen naaloŋ poɔ gaŋ la a Gyɔɔn.”

²⁹ (A noba zaa naŋ da woŋ a ŋaa, a de ne a zuyɔɔ-derebɛ, da nyɛɛ la ka ba tu la a Naaŋmen mennoŋ sori, bonso, ba da de la a Gyɔɔn suobu.

³⁰ Kyɛ a Faraziimine ane a bege baŋnema naŋ da ba sage ka ba de a Gyɔɔn suobu da wuli ka ba zagre la Naaŋmen poboɔbo naŋ kyaare ne bamenne.)

³¹ “Boŋ ka N pãã na de manne ne lɛ a zenɛ noba naŋ waa?

³² Ba waa ŋa bibiiri naŋ zeŋ daa poɔ a boɔlɔ taa a yele: ‘Te ŋmɛ la seɛre eŋ yɛ, ka yɛ ba seɛ; ka te ŋmaa kolaŋne ko yɛ, ka yɛ ba sɔge.’

³³ Bonso, Gyɔɔn Bati da waɛ la, a ba dire diibu bee a nyuuro dãã, ka yɛ yeli, ‘O taa la sefaa’;

³⁴ ka a Nensaala Bie meŋ wa, a dire kyɛ nyuuro, ka yɛ la yeli, ‘Nyɛ, O waa la digbogbo soba ane dããnyubugro, a waa zuyɔɔ-derebɛ ane yelbe-erebɛ ba!’

³⁵ Anealɛzaa, a yɛŋ bibiiri maŋ wuli ka yɛŋ taa la yelmeŋɛ.”

Pɔge Kaŋ Naŋ Nyɛ O Yelbebe Sudi

³⁶ A Faraziimine kaŋ da boɔle la Yeezu ka O wa o yiri ka ba di bondirii, ka a Yeezu da gaa te zeŋ a o yiri poɔ ka O di.

³⁷ Pɔg-gyɛnterɛ kaŋ da be la a teŋɛ poɔ. O naŋ da wa woŋ ka Yeezu wa la a Farazii kaŋ yiri ka O di boma, o da taa la kãã nyunoɔ mine wa ne.

³⁸ O da wa are la a Yeezu puori a peɛle O gbɛɛ, a kono ŋmaara nentaŋ ka a lere a Yeezu gbɛɛ zu, ka o de o zukɔɔloŋ meelɛ ne a nentaŋ. Lɛ la ka o da moorɔ a Yeezu gbɛɛ kyɛ soɔrɔ ne kããsoŋ.

³⁹ A Farazii na naŋ da boɔle a Yeezu naŋ da nyɛ a lɛ, o da teɛre la o poɔŋ, “Ka a dɔɔ ŋa da waa Ŋmen-yelmanna, O da na baŋ la neɛ na naŋ la a pɔge ŋa naŋ toɔrɔ O; ka o waa la yelbe-erɛ.”

⁴⁰ A Yeezu da yeli ko o la, “Saamon, N taa la yeli kaŋ ka N yeli ko fo.” Ka Saamon leɛ yeli sɔge, “Wulwullo, yele.”

⁴¹ “Dɔɔ kaŋ naŋ da maŋ pɛŋnɛ noba libie la ka noba bayi mine da di o sane; kaŋ da di la o warbie kɔɔraanuu sane, ka kaŋ meŋ di warbie lezaayi ne pie sane.

⁴² Kyɛ ba naŋ da kontoɔ̃ yɔɔ zuiŋ, a dɔɔ da bare la ba zaa bayi sama ko ba. A sandiribe bama bayi, buo soba la na nɔŋ a dɔɔ ŋa gaŋ o tɔ?”

⁴³ Ka a Saamon yeli sɔge, “N teɛre ka a soba na sane naŋ da e kpoŋ.” Ka a Yeezu yeli ko o, “A yelmeŋɛ la a lɛ ka fo yeli.”

⁴⁴ Lɛ la ka a Yeezu leɛ kyaare a pɔge kyɛ yeli ko a Saamon, “Fo nyɛ la a pɔge ŋa? N wa la fo yiri, fo ba ko ma koɔ̃ ka N pɛge N gbɛɛ, kyɛ a pɔge ŋa pɛge la N gbɛɛ ne o nentaŋ, a meele a ne o zukɔɔloŋ.

⁴⁵ Fo ba moore ma, kyɛ a yi a saŋ N naŋ wa kpɛ a kyɛ o ba bare N mooroo.

⁴⁶ Fo ba sɔ N zu ne kããsoŋ, kyɛ o sɔ la N gbɛɛ ane kããsoŋ nyunoɔ.

⁴⁷ Azuiŋ, maa yele korɔ fo, a o yelbebe naŋ da e yaga nyɛ la sudi; lɛnso ka o wuli nɔmmo kpoŋ. Kyɛ soba na yelbebe naŋ ba e yaga ka o nyɛ sudi, nɔmmo maŋ e la fẽẽ.”

⁴⁸ Lɛ la ka a Yeezu yeli ko a pɔge, “A fo yelbebe nyɛ la sudi.”

⁴⁹ Kyɛ a banaŋ naŋ da be a diibu zie ne a Yeezu da piili yele la ba pooreŋ, “Aŋ la a ŋa, a gba dire noba yelbebe suuri korɔ ba?”

⁵⁰ Ka a Yeezu yeli ko a pɔge, “A fo yeldeebo faa fo la; gɛrɛ ne emmaaroŋ.”