Luka 23 - Naaŋmen Nɔpaalaa Gane

Ba Naŋ Taa Yeezu Wa Ne Pilato Zie

¹ Lɛ la ka a noba zaa da iri lantaa, a taa Yeezu gaa ne Pilato zie.

² A noba da piili ŋmaara la yɛlɛ dɔglɔ Yeezu, a yele, “Te nyɛ la a dɔɔ ŋa ka O saana a teŋɛ. O ba sagra ka te yɔɔ zuyɔɔ ko a Naa Siiza, kyɛ yele ka Ona la a Mɛzaaya, a Naa.”

³ Lɛ la ka Pilato soore a Yeezu, “Fõõ la a Gyuumine Naa be?” Ka a Yeezu yeli sɔge, “Fõõ la yeli a lɛ.”

⁴ A Pilato pãã leɛ yeli ko la a Naaŋmen bagmaalkare ane a noba, “Maa eŋ ba nyɛ a dɔɔ ŋa yelsaanaa.”

⁵ Kyɛ ka a noba maaleŋ yeli, “O toɔrɔ la a noba eŋnɛ taa ne a O kannoo a Gyudiya paaloŋ zaa poɔ, a yi a Galili teŋɛ O naŋ da piili a wa te tɔ a kyɛ.”

Ba Naŋ Wa Ne Yeezu A Hɛrɔde Zie

⁶ A Pilato naŋ da woŋ a lɛ o da soorɛɛ la ka a dɔɔ e la Galili neɛ.

⁷ O naŋ da wa baŋ ka Hɛrɔde paaloŋ neɛ la, o da eɛɛ la ka ba taa O gaa ne a Hɛrɔde zie. A Hɛrɔde da be la a Gyɛruzɛlɛm poɔ a lɛ saŋ.

⁸ A Hɛrɔde naŋ da wa nyɛ a Yeezu, O poɔ da pɛlɛɛ la yaga, bonso, o da woŋ la a O yɛlɛ ka a kɔɔre, a da boɔrɔ ka o nyɛ O ka O toŋ a toŋkpeɛne na mine ka o meŋ nyɛ.

⁹ A Hɛrɔde da soore la a Yeezu yɛlɛ yaga te kɔɔre kyɛ O da ba yeli yeli zaa sɔge o.

¹⁰ A Naaŋmen bagmaalkare ane a Naaŋmen bege wulwulibo da be la a be a toɔrɔ vũũ eŋnɛ.

¹¹ A Hɛrɔde ne a o sogyɛre gba da dɛge la a Yeezu yaga, a e O la. A de kpar-kpoŋ su O, kyɛ e ka ba leɛ taa O gaa ne a Pilato zie.

¹² A yi a lɛ daare gɛrɛ, Hɛrɔde ne Pilato naŋ da ba noma da leɛ e la bamine.

A Yeezu Kũũ Sɛrɛɛ Yɛlɛ

¹³ A Pilato pãã da boɔle la a Naaŋmen bagmaalkare ane a noba lantaa,

¹⁴ a yeli ko ba, “Yɛ taa la a dɔɔ ŋa wa ne n zie, a yeli ka O dɔɔnɔ la a noba. N peɛre O la yɛ niŋesogɔ kyɛ N ba nyɛ O yelsaanaa zaa.

¹⁵ Hɛrɔde meŋ da ba nyɛ O yelsaanaa zaa lɛnso ka O e ka ba leɛ taa O wa ne a te zie. Serɛzaa, a dɔɔ ŋa ba taa yelsaanaa zaa naŋ seŋ ne kũũ.

¹⁶ Azuiŋ, N na e la ka ba feɛ O kyɛ de O bare.” [

¹⁷ A Ista tigri saŋ naŋ da maŋ wa tara, a da maŋ fere la ka Pilato iri a nempɔgre kaŋ bare.]

¹⁸ A noba zaa pãã da laŋ la taa a kyeere yaga zaa, “Yɛ ko a dɔɔ ŋa! Kyɛ iri Baraba ko te!”

¹⁹ (Ba da pɔge la a Baraba ŋa, o naŋ da dɔ̃ɔ̃ a teŋɛ kyɛ ko noba zuiŋ.)

²⁰ A Pilato naŋ da boɔrɔ ka o iri a Yeezu bare zuiŋ, o da la yelee yɛlɛ ko a noba;

²¹ kyɛ ka a noba da naŋ kyeerɛ yele, “Kpa O dagaraa zu, kpa O dagaraa zu!”

²² A Pilato laboreŋ soore la a noba a gbɛre bota soba, “Wola, boŋ yeli faa ka O e? Maa eŋ ba nyɛ O yelsaanaa zaa naŋ seŋ ka ba ko O. N na e la ka ba feɛ O kyɛ bare O.”

²³ Kyɛ a noba da ba sage kyɛ yele ne nimizeɛ zaa ane kɔkɔkpeɛne ka ba kpa O dagaraa zu. A noba gɔmɔ da do gaŋ la a Pilato deni.

²⁴ Lɛ la ka a Pilato da fãã kyɛ tere noɔre ka ba e seŋ ba naŋ boɔrɔ lɛ.

²⁵ A Pilato da iri la a neɛ na ba naŋ boɔrɔ a bare. A neɛ ŋa la ka ba da pɔge nempagdie tendɔ̃ɔ̃ ane o neŋko zuiŋ kyɛ da de a Yeezu ko ba aŋa lɛ ba naŋ boɔrɔ.

Ba Naŋ Kpa Yeezu Dagaraa Zu

²⁶ Ba naŋ da taa a Yeezu gɛrɛ ne, ba te tuori la dɔɔ kaŋ ka o yi weɛ waana. A dɔɔ ŋa da yi la Saarin, ka o yuori di Saamon. Ba da nyɔge o la a e ka o tuo a dagaraa tuuro ne a Yeezu.

²⁷ Nembeɛoŋ da tuuro O la, ka pɔgeba da poɔ a kono gbɛlɛ nuuri a Yeezu zuiŋ.

²⁸ Kyɛ Yeezu da leɛ kaa ba la a yele, “Gyɛruzɛlɛm pɔgeyaare, yɛ ta kono maa zuiŋ, kyɛ yɛ kono yɛmenne ane yɛ biiri yɛlɛ.

²⁹ Bonso, a bebie waana la ka ba na yeli, ‘Pɔg-ɔɛ ane pɔgeba naŋ daŋ ba dɔge biiri, ane berɛ biiri naŋ daŋ ba ɛnne nyɛ la maaloo.’

³⁰ A noba pãã na piili yele korɔ la a taŋkponni, ‘Yɛ le dɔgle te zu,’ kyɛ yeli ko a tambilii, ‘Yɛ pɔge te.’

³¹ Ka ba naŋ wa erɛ damaara ŋaa, wola ka ba na e a dakuoni?”

³² Ba da taa la noba mine bayi naŋ e nenfaare, a poɔ a Yeezu eŋɛ a na te kpa a dagaraa zu.

³³ Ba naŋ da wa te ta a zie na ba naŋ boɔlɔ Zukoɔre, ba da kpa la a Yeezu dagaraa zu ane a nenfaare na bayi, kaŋ a O duluŋ seŋ, kaŋ meŋ a O gɔɔ seŋ. [

³⁴ Lɛ la ka a Yeezu da yeli, “N Saa, di suuri ko ba, bonso, ba ba baŋ bonna ba naŋ erɛ.” Ba da de la a Yeezu bonsuuri ŋmɛ gbaŋ a poŋ taa.]

³⁵ Ka a noba da are a be kaara, kyɛ ka a nembɛrɛ da erɛ O laara a yele, “O faa la ba mine, O pãã faa O meŋɛ, ka O naŋ wa waa a Mɛzaaya, a Naaŋmen neŋkaa-iraa!”

³⁶ A sogyɛre meŋ da e O la la, a taa dããmiiruŋ mine a wa ko O,

³⁷ a yele, “Ka fõõ wa waa a Gyuumine Naa, faa fo meŋɛ wɛ!”

³⁸ Ba da sɛge la sɛgre a O zu sogɔŋ, “A Gyuumine Naa La A Ŋa.”

³⁹ A nenfaare na kaŋ ba naŋ da kpa a dagaraa zu meŋ da erɛ la a Yeezu laara a yele, “Fo ba waa a Mɛzaaya be? Faa fo meŋɛ ane te meŋ wɛ!”

⁴⁰ Ka a nenfaa kaŋ na soba nyare a o tɔsoba na zu a yele, “Ka lɛ fo ba zoro Naaŋmen, fõõ ne a dɔɔ ŋa dɔgroŋ naŋ waa yeni?

⁴¹ Tenee eŋ seŋ ne la a dɔgroŋ ŋa, bonso, te nyɛrɛ la dɔgroŋ na te meŋɛ naŋ bɔ, kyɛ a dɔɔ ŋa eŋ ba e yeli faa zaa.”

⁴² Lɛ la ka o pãã yeli, “Yeezu, ta inni n yɛlɛ, ka fõõ wa kpɛ a fo naaloŋ poɔ.”

⁴³ Ka a Yeezu yeli sɔge o, “Serɛzaa ka N yele korɔ fo, a zenɛ ŋa, fõõ ne ma na laŋ la taa a tenvelaa poɔ.”

A Yeezu Kũũ Yɛlɛ

⁴⁴ A naŋ da wa peɛlɛ a ŋmenaa pozentaa, ligruŋ da pɔge la a tendaa zaa, a te ta ŋmenaa gbelli ata saŋ,

⁴⁵ ka a ŋmenaa da ligi, kyɛ ka a Naaŋmen die patiisa da kyeɛ̃, a poŋ ziiri ayi.

⁴⁶ A Yeezu pãã da kyeere la yaga zaa a yeli, “N Saa, fo nuuriŋ la ka N de N vooroŋ eŋ.” O naŋ da yeli a ŋaa la ka O da ŋmaa vooroŋ.

⁴⁷ A sogyɛre kɔɔ neŋkpoŋ naŋ da nyɛ lɛ a yɛlɛ zaa naŋ e, o da iri la Naaŋmen yuori a yele, “Serɛzaa, a dɔɔ ŋa da ba sãã yeli zaa.”

⁴⁸ A noba zaa naŋ da wa ka ba nyɛ a Yeezu dagaraa kpaabo, naŋ wa nyɛ a lɛ zaa naŋ e, ba da leɛ kuli ne la nuyoɔre.

⁴⁹ Kyɛ a Yeezu nembaŋne ane a pɔgeba na zaa naŋ da tuuro O a yi a Gyudiya paaloŋ poɔ, da te are la tɔɔre zaa kyɛ kaara a yɛlɛ ama.

A Yeezu Ũũmu Yɛlɛ

⁵⁰ A Gyuumine neŋkpoŋ kaŋ naŋ da waa nensoŋ kyɛ e nemmeŋɛ, ka o yuori da di Yuzɛb,

⁵¹ eŋ da ba sage ne a ba poteɛrɛ ane a ba yel-erre kyaare ne a Yeezu koobo. A dɔɔ ŋa da yi la a Gyuumine teŋɛ kaŋ yuori naŋ di Aremateya, a da kyɛllɛ ka o nyɛ a Naaŋmen naaloŋ.

⁵² A dɔɔ ŋa da gaa la a Pilato zie a te sɔre ka o ko o a Yeezu eŋɛ.

⁵³ Lɛ la ka o da yage a Yeezu eŋɛ, a de pɛmpelaa pilli page ne O, a gaa te ũũ yaa kaŋ ba naŋ nyɛ piiri zu, ka ba daŋ ba ũũ neɛzaa o poɔ sɛre.

⁵⁴ A da e la a Naroo bebiri daare, kyɛ ka a pɛnnoo bebiri da piili.

⁵⁵ A pɔgeba na naŋ da tu a Yeezu yi a Galili wa, da tu gaa te nyɛ la O ũũmu zie ane lɛ ba naŋ gaale O a bogi poɔ.

⁵⁶ Ba pãã da leɛ kulee la a te nare turaali ane kãã-nyunoɔ. Ba da pɛnnɛɛ la a pɛnnoo bebiri daare a seŋ lɛ a Naaŋmen nɔɛ naŋ biŋ.