Luka 19 - Naaŋmen Nɔpaalaa Gane

Yeezu Ne Zakiyo Yɛlɛ

¹ A Yeezu da te kpɛ la Gyɛreko teŋɛ a tɔlɔ gɛrɛ.

² A Zuyɔɔ derɛ neŋkpoŋ kaŋ naŋ da waa bondaana ka o yuori di Zakiyo da be la a teŋɛ na poɔ.

³ O da moɔrɔ la ka o nyɛ neɛ na Yeezu naŋ waa, kyɛ a noba naŋ da waa yaga zuiŋ, o da kontoɔ̃ nyɛ O, bonso, o da waa la nen-ŋmaa.

⁴ Lɛ la ka o da de weɛ a zo gaa te do teɛ kaŋ banaŋ boɔlɔ sekamɔ, a na nyɛ a Yeezu, bonso, O da waana ka O tu a be tɔle.

⁵ A Yeezu naŋ da wa te ta a zie na, O da gbole kaa la a teɛ zu, kyɛ yeli ko o, “Zakiyo, sigi wa wieouŋ zaa, bonso, N na gaŋ la fo yiri zenɛ.”

⁶ O da sigi la wieouŋ zaa kyɛ ka o poɔ da pɛle ne o naŋ na tuori de a Yeezu.

⁷ A noba na zaa naŋ da nyɛ a lɛ da piili ŋmoonɔ la yɛlɛ, a yele, “A dɔɔ ŋa gaa te kpɛ la yelbe-erɛ yiri ka o na taa o saanoŋ.”

⁸ A Zakiyo da iri are la a be a kyɛ yeli ko a Daana, “Daana, nyɛ N na de la n boma poŋ ziiri ayi, a de a ziyeni ko nembaalba, kyɛ ka maa da finni neɛzaa bon, N na yɔɔ la o soba gbɛre bonaare.”

⁹ Lɛ la ka a Yeezu yeli ko o, “Zenɛ, faabo wa la a yiri ŋa poɔ, bonso, a dɔɔ ŋa meŋ waa la a Aboraham bie kaŋ.

¹⁰ Bonso, a Nensaala Bie waɛ la ka O bɔ kyɛ faa banaŋ naŋ bɔre.”

A Warbie Pie Sekpɔgre

¹¹ A noba naŋ da kyɛllɛ a yɛlɛ, Yeezu da lɔɔ la sekpɔgre, bonso, O da peɛlɛ la a Gyɛruzɛlɛm teŋɛ, kyɛ ka a noba da teɛrɛ ka a Naaŋmen naaloŋ na deɛ sãã la a daadaalɛ.

¹² Lɛ la ka O da yeli, “Neŋyuori kaŋ la da gaa tentɔɔre kaŋ ka o te di naaloŋ kyɛ pãã leɛ kuli wa.

¹³ O da boɔle la o gbaŋgbaare pie, a ko ba kanzaa warbi-yeni yeni, kyɛ yeli ko ba, ‘Yɛ de te yɛrɛ ne te ta saŋ na N naŋ na leɛ wa.’

¹⁴ Kyɛ a o teŋɛ deme da ba nɔŋ o yɛlɛ, ka ba pãã da toŋ noba ka ba te yeli ko o, ‘Te ba boɔrɔ a dɔɔ ŋa ka o e te naa.’

¹⁵ O naŋ da te di a naaloŋ a leɛ kuli wa, o da boɔle la a o gbaŋgbaare na zaa o naŋ da ko a libie, ka o na nyɛ awola tɔnɔ banaŋ toŋ nyɛ.

¹⁶ A dɛndɛŋ soba da yi waɛ la, a wa yeli, ‘Daana, a fo warbiri yi la warbie pie tɔnɔ dɔgle o zu.’

¹⁷ Ka o yeli ko o, ‘Garebanyɛ, gbaŋgba-bivelaa la fo! Fo naŋ taa yelmeŋɛ ne a bonfee zu kaabo, te kaara tenne pie zu.’

¹⁸ Ka a ayi soba meŋ wa yeli, ‘Daana, a fo warbiri yi la warbie anuu tɔnɔ dɔgle o zu.’

¹⁹ Ka o yeli ko o, ‘A fo meŋ, te kaara tenne anuu zu.’

²⁰ Lɛ la ka a kaŋ na meŋ wa yeli, ‘Daana, nyɛ, a fo warbiri la ka N de vili ne pɛne biŋ fo,

²¹ bonso, N zoro la fo dabeɛ̃, fo naŋ waa nimikuoŋaa soba zuiŋ. Fo maŋ derɛ la boma fo naŋ ba so, a derɛ weɛ boma fo naŋ ba bore.’

²² Ka a naa da yeli ko o, ‘Fõõ gbaŋgba-bifaa ŋa, a fo meŋɛ noɔre yelbie la ka N na de di ne fo sɛrɛɛ. Fo naŋ pãã baŋ ka N e la nimikuoŋaa soba, a maŋ derɛ boma N naŋ ba so, a derɛ weɛ boma N naŋ ba bore,

²³ bonso ka fo ba de a n libiri te biŋ baŋgye poɔ? Ka maa da wa leɛ kuli wa, ka N da wa de n bon ane o tɔnɔ.’

²⁴ O pãã da yeli ko la a banaŋ naŋ are a be, ‘Yɛ nyɔge a warbiri de o zie a ko a onaŋ naŋ taa a warbie pie na.’

²⁵ (Ka a noba yeli ko o, ‘Daana, o taa la warbie pie wɛ!’)

²⁶ ‘Maa yeli ko yɛ! banaŋ naŋ taa, ba na la ko ba la amine poɔ. Kyɛ banaŋ naŋ ba taa, ba na de la a fẽẽ na gba banaŋ taa yi ba zie.

²⁷ Kyɛ a n dɔndɔnne bama naŋ da ba boɔrɔ ka N e a ba naa, yɛ taa ba wa ne kyɛ, a wa ko ba N niŋesogɔ.’ ”

Yeezu Naŋ Kpɛ Gyɛruzɛlɛm Poɔ Ane Gandaaloŋ

²⁸ A Yeezu naŋ da wa yeli a ŋaa baare, O da de la weɛ gɛrɛ Gyɛruzɛlɛm.

²⁹ O naŋ da wa te peɛlɛ Bɛtefage ane Bɛtani, a zie na banaŋ boɔlɔ Oliva Taŋ, O da toŋ la O potuuribo bayi,

³⁰ a yele, “Yɛ gaa a tembile na naŋ be yɛ niŋesogɔ. Ka yɛnee wa te kpeɛrɛ a teŋɛ poɔ, yɛ na nyɛ la boŋlee kaŋ banaŋ leŋ ka neɛzaa daŋ ba zɔŋ o. Yɛ lori o taa wa ne kyɛ.

³¹ Ka neɛzaa wa soore yɛ, ‘Bonso ka yɛ loro a boŋ?’ yɛ deɛ yeli ŋaa, ‘A Daana la boɔrɔ o.’ ”

³² Lɛ la ka a banaŋ O naŋ da toŋ da gaa te nyɛ ka a yɛlɛ waa seŋ O naŋ da yeli ko ba lɛ.

³³ Ba naŋ da wa te loro a boŋ la ka a o demee soore ba, “Bonso ka yɛ wa loro a boŋ?”

³⁴ Ka ba da yeli, “A Daana la boɔrɔ o.”

³⁵ Ba pãã da taa la a boŋ a wa ko a Yeezu. Ba naŋ da wa de ba bonsuuri pare a boŋ zu baare, ba da eɛɛ la ka a Yeezu do zeŋ o zu.

³⁶ O naŋ da wa zɔŋ a boŋ gɛrɛ la ka noba da de ba bonsuuri yɛre a sobiri zu.

³⁷ O naŋ da wa te tara a sobiri na naŋ yi a Oliva Taŋ sigre na, a O potuuribo zaa da piili puuro la Naaŋmen ne kyelloo ane kɔkɔkpeɛne a kyaare ne a toŋkpeɛne na zaa ba naŋ nyɛ,

³⁸ a yele: “A naa na naŋ waana a Daana yuori eŋɛ nyɛ la maaloo! Ka maaroŋ be tenvelaa poɔ, kyɛ ka puubu do a sazu tɔɔre zaa!”

³⁹ A Faraziimine naŋ da be a noba poɔ da yeli ko la a Yeezu, “Wulwullo, yeli a fo potuuribo ka ba bare gɔmɔ.”

⁴⁰ Ka Yeezu yeli sɔge, “Maa yeli ko yɛ, ka ba naŋ bare gɔnne, a kubo na la leɛre la ba zu a kyaara.”

Yeezu Naŋ Koŋ Gyɛruzɛlɛm Yɛlɛ

⁴¹ A Yeezu naŋ da wa te tara a teŋkpoŋ, O da ŋma la nentaŋ a teŋɛ zuiŋ,

⁴² a yele, “Ka fõõ gba da baŋ bonna naŋ na ko fo emmaaroŋ a zenɛ bebiri! Kyɛ a ba sãã ka fo na nyɛ.

⁴³ Serɛzaa, a bebie waana la ka fo dɔndɔnne na wa ŋmaagyili fo, a fo lamboe zaa, a feere fo.

⁴⁴ Ba na ŋmore fo la lɔɔ teŋɛ a laŋ ne a fo biiri zaa naŋ be fo poɔ. Ba koŋ bare kuuri zaa ka o dɔgle o tɔ zu, bonso, fo da ba kyɛlle a saŋ na Naaŋmen naŋ wa ka O faa fo.”

Yeezu Naŋ Digi Yɛreyɛrebɛ Bare A Naaŋmen Die Poɔ

⁴⁵ Lɛ la ka a Yeezu da te kpɛ a Naaŋmen die poɔ, a da piili digre a yɛreyɛrebɛ ka ba yi,

⁴⁶ kyɛ ka o yeli, “Ba sɛgɛɛ la: ‘A N yiri na e la puoruuzie’; kyɛ ka yɛ e ka o leɛ nannyig-kpeɛne sɔgloozie.”

⁴⁷ Bebiri zaa, a Yeezu da maŋ kanna la a Naaŋmen die poɔ. A Naaŋmen bagmaalkare ane a Naaŋmen bege wulwulibo ane a wederebɛ da boɔrɛɛ sori na ba naŋ na tu kyɛ ko O.

⁴⁸ Kyɛ ba da ba nyɛ lɛ zaa ba naŋ na e, bonso, a noba zaa da iri la ba yɛŋ eŋ a Yeezu kannoo ba naŋ da woŋ.