Luka 18 - Naaŋmen Nɔpaalaa Gane

Pɔgekoɔre Ane Nɔmboore Sɛredire Sekpɔgre

¹ A Yeezu pãã da lɔɔ la sekpɔgre ko ba a kyaare ne lɛ a naŋ seŋ ka ba maŋ puoro tegitegilɛ a kyɛ ta wa yoɔrɔ nuuri.

² O da yelee la, “Sɛredire kaŋ la da be teŋɛ kaŋ poɔ, a ba zoro Naaŋmen bee a eŋnɛ nensaalba.

³ Pɔgekoɔre kaŋ meŋ da be la a teŋɛ na poɔ, a da maŋ waana a sɛredire na zie a yele, ‘Vɛŋ ka N nyɛ sɛredi soŋ a kyaare ne N dɔndɔmɔ.’

⁴ A sɛredire da zagrɛɛ la ka a te kɔɔre, kyɛ a puoriŋ ka o da teɛre a yeli ko o meŋɛ, ‘Aneazaa ka N ba zoro Naaŋmen bee a eŋnɛ neɛzaa,

⁵ kyɛ a pɔge ŋa naŋ waana dɔɔnɔ ma zuiŋ, N na bo la bo-soŋ ko o, ka o ta la waana dɔɔnɔ ma a wa e ka N te yɛ.’ ”

⁶ Ka a Daana yeli, “Yɛ kyɛlle woŋ lɛ a nɔmboore sɛredire ŋa naŋ yeli.

⁷ Yɛ teɛre ka Naaŋmen koŋ bo bo-soŋ ko a O neŋkaa-irri naŋ ŋmeɛrɛ kpɛlle korɔ O, ŋmenaa ane tensogɔ be? O na kɔɔre la yaga kyɛ wa soŋ ba be?

⁸ Maa yeli ko yɛ, O na bo la bo-soŋ ko ba wieouŋ zaa. Aneazaa, ka a Nensaala Bie wa leɛ wa, O na nyɛ la yeldeebo deme a teŋɛzu kyɛ?”

A Farazii Ne Zuyɔɔ Derɛ Sekpɔgre

⁹ A Yeezu da la lɔɔ la sekpɔgre ŋa ko a noba mine naŋ da de bamenne di ka ba waa la nemmenne, a pãã da gyegre ba taaba.

¹⁰ “Noba bayi la da gaa a Naaŋmen die ka ba te puori. Kaŋ da waa la Farazii, kyɛ ka a kaŋ waa zuyɔɔ-derɛ.

¹¹ A Farazii da arɛɛ la a puoro ŋaa, ‘Naaŋmen, N puoro fo la bareka ne N naŋ ba waa ŋa N nensaaltaaba: naŋ waa nannyigri, fafareba, moɔrɔ toma noba, bee waa ŋa a zuyɔɔ-derɛ ŋa naŋ te are a kyɛ.

¹² N maŋ leŋ la noɔre gbɛre boyi daa gbuli zaa poɔ. A maŋ poŋ N boma ziiri pie, a iri a ziyeni tere.’

¹³ Kyɛ a zuyɔɔ-derɛ eŋ da te are la tɔɔre zaa a ba sage ka o doɔ o zu kaa sazu, kyɛ da gbɛlɛ o nuuri a yele, ‘Naaŋmen, zo N nembaaloŋ, maa yelbe-erɛ!’

¹⁴ Maa yeli ko yɛ, a zuyɔɔ-derɛ ŋa da leɛ kuli la o yiri ane mennoŋ kpoŋ a gaŋ a Farazii na, bonso, banaŋ zaa naŋ zɛgrɛ bamenne, ba na sigri ba la, kyɛ banaŋ zaa naŋ sigre bamenne meŋ ba na zɛge ba la ka ba do.”

Yeezu Naŋ Ko Bibiiri Maaloo

¹⁵ Noba da taa la ba bibiiri gba waana ne a Yeezu zie ka O seene ba. Kyɛ a potuuribo naŋ da nyɛ a lɛ, ba da nyare la a noba zu, ka ba ta erɛ a lɛ.

¹⁶ Kyɛ a Yeezu da boɔle la a bibiiri kyɛ yeli, “Yɛ bare a bibiiri ka ba wa N zie, yɛ ta pigi ba sori, bonso, a bama taaba la so a Naaŋmen naaloŋ.

¹⁷ Yelmeŋɛ ka N yele korɔ yɛ, neɛzaa naŋ ba sage de a Naaŋmen naaloŋ aŋa bibile, o soba daŋ koŋ kpɛ a naaloŋ poɔ.”

Nabondaana Kaŋ Yɛlɛ

¹⁸ Naa kaŋ da wa soore la a Yeezu, “Wulwulsoŋ, boŋ ka N na e a nyɛ nyɔvore naŋ ba taa baaroo?”

¹⁹ Ka a Yeezu soore o, “Bonso ka fo boɔlɔ ma nenvelaa? Neɛzaa ba waa velaa ka Naaŋmen yoŋ naane.

²⁰ Fo baŋ la a Naaŋmen nɔɛ, ‘Ta toŋ moɔrɔ toma; Ta ko neɛ; Ta zu bon; Ta dire danse-zirii; Eŋnɛ fo saa ne fo ma.’ ”

²¹ Ka a naa yeli sɔge, “N tuuro la a nɔɛ ama zaa a yi n biiluŋ saŋ a wa te ta zenɛ.”

²² A Yeezu naŋ da woŋ a ŋaa, O da yeli ko la a dɔɔ, “Yelyeni kaŋ la kyɛre ka fo ba taa. Koɔre a boma na zaa fo naŋ taa, a de a libie poŋ nembaalba kyɛ fo na taa la naboma a tenvelaa poɔ, kyɛ pãã wa tuuro ma.”

²³ Kyɛ a dɔɔ naŋ da wa woŋ a ŋaa, o poɔ da sãã la yaga, bonso, o da e la bondaa-kpoŋ.

²⁴ Yeezu da leɛ kaa la a dɔɔ kyɛ yeli, “A na waa la tuo yaga ko bondaanema ka ba kpɛ a Naaŋmen naaloŋ!

²⁵ Serɛzaa, a e la mɔlɔ ka bontaŋ tu fumini voɔre yi a gaŋ bondaana naŋ na kpɛ a Naaŋmen naaloŋ.”

²⁶ A banaŋ naŋ da woŋ a lɛ da yelee la, “Ka anaŋ waa lɛ, nembuo la na toɔ̃ nyɛ faabo?”

²⁷ Ka Yeezu yeli sɔge, “Yeli naŋ koŋ baŋ nyɛ eebo nensaala zie, maŋ nyɛ la eebo Naaŋmen zie.”

²⁸ Lɛ la ka Piita yeli, “Nyɛ, te bare la te yie kyɛ wa tuuro fo.”

²⁹ Ka Yeezu yeli ko ba, “Yelmeŋɛ ka N yele korɔ yɛ, neɛzaa naŋ bare o yiri bee o pɔgɔ, bee o yɔɔmine, bee o saa ne o ma, bee o biiri, a Naaŋmen naaloŋ zuiŋ,

³⁰ o soba na leɛ nyɛ la a boma ama ka a gaŋ a anaŋ o naŋ bare a teŋɛzu kyɛ, a kyɛ naŋ nyɛ nyɔvore naŋ ba taa baaroo a o kũũ puoriŋ.”

Yeezu Naŋ Yeli O Kũũ Ane O Leɛ-iruu Yɛlɛ A Gbɛre Bota Soba

³¹ A Yeezu pãã da de la a O potuuribo pie ne bayi gyɛŋ yi ne puori a te yeli ko ba, “Yɛ nyɛ, te duoro gɛrɛ la Gyɛruzɛlɛm, ka a yɛlɛ anaŋ zaa a Ŋmen-yelmanneba naŋ sɛge a kyaare ne a Nensaala Bie na tu a tuubu.

³² Ba na de O la eŋ a Nemboore-yobo nuuriŋ, ka ba e O la, a to O zoma, kyɛ toore nentaare waare O.

³³ Ka ba naŋ wa feɛ O baare, ba na ko O la, kyɛ a beri ata daare ka O leɛ-iri.”

³⁴ Kyɛ a potuuribo da ba baŋ a yɛlɛ ama zaa tɛgɛ. Serɛzaa, a yɛlɛ a Yeezu naŋ da yeli da ba sãã weliweli ko ba, ka ba pãã da ba baŋ a tɛgɛ.

Yeezu Naŋ Saŋ Zɔŋ Kaŋ

³⁵ A Yeezu naŋ da wa te peɛle a Gyɛreko teŋɛ, dɔɔ zɔŋ kaŋ da zeŋ la a sobiri noɔre a sɔrɔ boma.

³⁶ O naŋ da woŋ a nembeɛoŋ naŋ wa tɔlɔ la ka o soore bonna naŋ erɛ.

³⁷ Ka ba da yeli ko o, “A Yeezu naŋ yi Naazɛrɛ la wa tɔlɔ.”

³⁸ Lɛ la ka o deɛ kyeere yaga zaa, a yele, “Yeezu, Davil Bidɔɔ, zo N nembaaloŋ!”

³⁹ Ka a banaŋ naŋ da de weɛ tanne o ka o bare gɔmɔ. Kyɛ lɛ ka o pãã da la kyeere yaga gba, “Davil Bidɔɔ, zo N nembaaloŋ!”

⁴⁰ A Yeezu da tɛge arɛɛ la kyɛ e ka ba taa a dɔɔ zɔŋ wa ne a O zie. Kyɛ o naŋ da wa te peɛle a Yeezu la ka O soore o:

⁴¹ “Boŋ ka fo boɔrɔ ka N e ko fo?” Ka o yeli, “Daana, e ka N leɛ nyɛrɛ.”

⁴² Ka Yeezu yeli ko o, “Leɛ nyɛrɛ, a fo yeldeebo faa fo la.”

⁴³ A tɔntɔbaalɛ ka o deɛ nyɛrɛ a tuuro a Yeezu, a ire Naaŋmen yuori, ka a noba na zaa naŋ da nyɛ a lɛ, da danna Naaŋmen.