Luka 17 - Naaŋmen Nɔpaalaa Gane

A Yeezu Yelyelii Mine

¹ Yeezu da yeli ko la O potuuribo, “A ferɛɛ la ka gbɛŋmɛ leebu saŋ wa, kyɛ zubie soba la neɛ na zaa zie anaŋ na tu wa!

² Ka banaŋ da de neɛre kuuri leŋ yagle o soba kɔkɔreŋ, a de o lɔɔ eŋ mane poɔ, anaŋ da na seɛ ko o gaŋ o naŋ na e ka a bibiiri bama kanzaa ŋmɛ gbɛre le.

³ Yɛ gu yɛmenne velaa! Ka a yɛ kaŋ wa sãã yeli, yɛ wuli o a o saanaa, ka o naŋ wa sage, ka yɛ di suuri ko o.

⁴ Ka a soba ŋa ne o zu wa e fo faa gbɛre boyopoi bebi-yeni poɔ, kyɛ leɛ wa fo zie gbɛre boyopoi a wa yeli, ‘N sããɛ la’, a ferɛɛ la ka fo di suuri ko o.”

Yeldeebo Yɛlɛ

⁵ Apostoliimine da yeli ko la a Daana, “E ka a te yeldeebo la do saa poɔ!”

⁶ Ka a Daana leɛ yeli sɔge, “Ka yɛnee da taa yeldeebo ka o seŋ mɔbiri, yɛ da na toɔ̃ yeli ko la teɛ ŋa, ‘Voɔ, a te ba mane poɔ’, kyɛ o na sage la yɛ noɔre.”

⁷ “A yɛ buo soba la na yeli ko o gbaŋgbaa naŋ yi koɔbo bee peere kyeemo zie wa, ‘Wa kyɛ wieouŋ zaa, a wa zeŋ di diibu’?

⁸ Ŋaa mɔɔ naane ka o na yeli ko o, ‘Maale zimaane diibu ko ma, a de fo bondirii maaloo kparoo su, a kyɛllɛ ma ka N wa di kyɛ nyu baare, kyɛ a puoriŋ, ka fo meŋ pãã di kyɛ nyu’?

⁹ Fo maŋ puori la a gbaŋgbaa bareka ne o naŋ sage a fo noɔre be?

¹⁰ Lɛ meŋ ne o zu, ka yɛnee wa toŋ a anaŋ ba naŋ ko yɛ noɔre ka yɛ toŋ, yɛ yeli, ‘Te waa la gbaŋgbaare naŋ ba taa tɔnɔ. A te feroo toma la ka te toŋ!’ ”

Yeezu Naŋ Saŋ Kɔŋkɔnne Pie

¹¹ A Yeezu naŋ da be a sobiriŋ gɛrɛ Gyɛruzɛlɛm, O da tu la Galili ne Samareya kpakyaga.

¹² O naŋ da wa te kpɛ tembile kaŋ poɔ, kɔnne pie mine da tuori o la, a te are tɔɔre zaa,

¹³ a boɔlɔ gboligboli yele, “Daana Yeezu, zo te nembaaloŋ!”

¹⁴ O naŋ da wa te nyɛ ba, O da yeli ko ba la, “Yɛ gaa te de yɛmenne wuli a Naaŋmen bagmaale nembɛrɛ.” Ba naŋ da gɛrɛ la ka a ba kɔnnoŋ deɛ baare.

¹⁵ A ba kaŋ naŋ da nyɛ ka a o kɔnnoŋ baarɛɛ la, o da leɛ waɛ la a puuro Naaŋmen gboligboli lɛ.

¹⁶ O da wa le vɔgle la muro a Yeezu puliŋ a puori O bareka. A dɔɔ da waa la Samareya neɛ.

¹⁷ Lɛ la ka Yeezu da soore o, “Noba pie naane da nyɛ ba sammo be? Kyɛ a ba bawae na bɛ?

¹⁸ Ka lɛ ba kanzaa ba leɛ wa ka o wa iri Naaŋmen yuori ka a saana ŋa yoŋ naane?”

¹⁹ Ka a Yeezu pãã yeli ko o, “Vaa-iri a gɛrɛ a fo gaabo zie, a fo yeldeebo saŋ fo la.”

A Naaŋmen Naaloŋ Waabo Yɛlɛ

²⁰ Saŋ kaŋ a Faraziimine da soore la a Yeezu wagre na a Naaŋmen naaloŋ naŋ na wa, ka O yeli sɔge ba, “A Naaŋmen naaloŋ ba waana ne yɛlɛ yɛ naŋ na baŋ nyɛ;

²¹ bee ka ba na toɔ̃ yeli, ‘Yɛ nyɛ o ka o be kyɛ!’ bee ‘Ona la be kyɛ!’ Bonso, a Naaŋmen naaloŋ be la yɛ zie serɛzaa.”

²² Lɛ la ka a Yeezu da yeli ko a O potuuribo, “A bebie tara la, ka yɛ na boɔrɔ ka yɛ nyɛ a Nensaala Bie bebie na kaŋ, kyɛ yɛ koŋ nyɛ o.

²³ Ba na yeli ko yɛ la, ‘Yɛ nyɛ o kyɛ’ bee ‘yɛ nyɛ o zie ŋa.’ Yɛ ta wa gɛrɛ be bee a boɔrɔ o.

²⁴ Aŋa lɛ saa naŋ maŋ nyegre filɔɔ a kyaane a saluoni zaa a yi lambori ŋa a wa te gaa lambori ŋa, lɛ ka a Nensaala Bie na waa a O waabo saŋ.

²⁵ Kyɛ O na daŋ nyɛ la dɔgɛɛ yaga, ka a zenɛ noba zagre O bare.

²⁶ Aŋa lɛ anaŋ da waa a Nowa saŋ, lɛ meŋ ne o zu ka a na waa a Nensaala Bie bebie saŋ.

²⁷ Ba da dire la kyɛ nyuuro, ka dɔbɔ derɛ pɔgeba, ka pɔgeba kulo serebɛ, a te ta a bebiri na daare a Nowa naŋ kpɛ a gbori ka kɔmpiiri da ŋmɛ, a ko a noba zaa.

²⁸ Aŋa lɛ a naŋ da waa a Lɔte saŋ na, ka noba da dire kyɛ nyuuro, a daara kyɛ koɔrɔ boma, a borɔ weɛ boma kyɛ meɛrɛ yie,

²⁹ kyɛ a bebiri na a Lɔte naŋ da wa yi a Sodom teŋɛ poɔ, vũũ ane gyirimuri da yi la sazu a mi aŋa saa a di ba zaa ko.

³⁰ Lɛ ka a na waa a bebiri na daare a Nensaala Bie naŋ na de O meŋɛ wuli.

³¹ A lɛ daare, neɛzaa naŋ be peɛzu, kyɛ ka o boma be a die poɔ, ba la seŋ ka o sigi wa de a boma kanzaa a die poɔ. A lɛ meŋ la ka neɛ naŋ be weɛ poɔ ta la leɛ kuli wa yiri.

³² Yɛ teɛre a Lɔte pɔge yɛlɛ.

³³ Banaŋ zaa naŋ boɔrɔ ka ba faa bamenne nyɔvoɛ, na kɔŋ a la, kyɛ ka banaŋ naŋ na kɔŋ ba nyɔvoɛ na taa la ba nyɔvoɛ.

³⁴ Maa yele korɔ yɛ, a tensogɔ na daare, noba bayi na laŋ gaŋ la gado yenaa zu, ka ba wa taa kaŋ gaa ne kyɛ bare kaŋ.

³⁵ Pɔgebɔ bayi na laŋ ɛrɛ la zɔŋ, ka ba wa taa kaŋ gaa ne kyɛ bare kaŋ.” [

³⁶ Noba bayi na be la weɛ poɔ, ka ba wa taa kaŋ gaa ne kyɛ bare kaŋ.]

³⁷ Lɛ la ka a O potuuribo soore O, “Daana, yeŋ la ka a na e?” Ka a Yeezu yeli ko ba, “Benee poɔroŋ naŋ be, be la ka gyugmo meŋ maŋ lantaa.”