Luka 12 - Naaŋmen Nɔpaalaa Gane

Yeezu Naŋ Kpãã Bampuori-kombampoɔ Mine

¹ A noba naŋ da wa lantaa a te ta ŋa turi ne dɔglɔ, a neɛrɛ taa gbɛɛ la ka Yeezu da piili yele korɔ a O potuuribo, “Yɛ gu yɛmenne velaa a yi a Faraziimine gagarre yɛlɛ poɔ. A ba bampuori-kombampoɔ yɛlɛ la ka N yele.

² Bonzaa ba kyebe naŋ pɔge a koŋ yuo, kyɛ ka yelsɔglaa zaa meŋ ba kyebe ka noba koŋ baŋ.

³ Azuiŋ yelzaa fo naŋ yeli ligruŋ poɔ na yi la kyaane poɔ ka ba woŋ, ka yelzaa fo naŋ waale yeli die poɔ, noba na moɔle a la piiri zu.

Neɛ Na A Naŋ Seŋ Ka Yɛ Zoro

⁴ N bamine, maa yele korɔ yɛ, yɛ ta zoro banaŋ naŋ maŋ ko a eŋɛ kyɛ ba la taa faŋ na e bonzaa a puoriŋ.

⁵ Ka N wuli yɛ neɛ na a naŋ seŋ ka yɛ zoro: Yɛ zoro a neɛ naŋ maŋ wa ko baare kyɛ la taa a faŋ a na eŋ o soba dazugovũũ poɔ. Yelmeŋɛ zaa, yɛ zoro a neɛ ŋa!

⁶ Warbie ayi naane ka ba maŋ koɔre daviime anuu be? Kyɛ Naaŋmen ba inne a kanzaa yɛlɛ.

⁷ A yɛ zukɔɔloŋ zaa gba noɔre ka ba sɔre. Yɛ ta zoro dabeɛ̃, bonso, yɛ gaŋ la a daviime.

⁸ Maa yeli ko yɛ! Neɛzaa naŋ sage de N yɛlɛ noba niŋesogɔ, a Nensaala Bie meŋ na sage de o la a Naaŋmen malekere niŋesogɔ.

⁹ Kyɛ soba na zaa naŋ zagre ma bare noba niŋesogɔ, N meŋ na zagre o la bare Naaŋmen malekere niŋesogɔ.

¹⁰ Neɛ na zaa naŋ yeli yelfaa zaa kyaare ne a Nensaala Bie, ba na di la suuri ko o. Kyɛ neɛ na zaa naŋ yeli yelfaa zaa kyaare ne a Vooroŋ Soŋ ba koŋ di suuri ko o.

¹¹ Ka ba naŋ wa taa yɛ kpɛ ne a puoruuderi ka ba di yɛ sɛrɛɛ, bee a gaa ne yɛ a namine ane a teŋɛ nembɛrɛ zie, yɛ ta miine ne lɛ yɛ naŋ na yeli faa yɛmenne, bee bon yɛ naŋ na yeli sɔge ba.

¹² Bonso, a Vooroŋ Soŋ na wuli yɛ la bonna yɛ naŋ na yeli a saŋ na poɔ.”

A Bondaa-damboli Sekpɔgre

¹³ Neɛ kaŋ naŋ da be a noba poɔ da yeli ko la a Yeezu, “Wulwullo, vɛŋ ka N yɔɔ e ka te poŋ a te gbandi-boma.”

¹⁴ Ka a Yeezu yeli ko o, “N ba, aŋ la biŋ ma ka N e a yɛ sɛredire bee a yɛ bompono?”

¹⁵ Ka O yeli ko ba, “Yɛ gu yɛmenne velaa a yi bombɔ yaga eŋɛ, bonso, nensaala nyɔvore ba kye o bontaa yaga poɔ.”

¹⁶ Lɛ la ka a Yeezu pãã da lɔɔ sekpɔgre ko ba, “Bondaana kaŋ weɛ boma da maale la yaga.

¹⁷ Ka o pãã teɛre o poɔŋ, ‘Boŋ ka N na e, N naŋ ba taa zie a na biŋ a weɛ boma?’

¹⁸ Lɛ la ka o pãã da yeli, ‘Ŋaa ka N na e. N na ŋmɛre la N bugri ane katanne bare kyɛ leɛ mɛ bonkponni a de a bombie ane n boma eŋ.’

¹⁹ N pãã na yeli ko la N meŋɛ, ‘ “Fo nyɛ la boma yaga naŋ na ta yuomo korɔ korɔ. Ta ferɛ fo meŋɛ, dire kyɛ nyuuro a kyɛ taa popeɛloŋ.” ’

²⁰ Kyɛ ka Naaŋmen yeli ko a dɔɔ, ‘Damboli ŋa! A tensogɔ ŋa zaa ka N na de a fo nyɔvore. Ka a boma fo naŋ nare biŋ, aŋ pãã na so a?’

²¹ Lɛ ka a na waa ko banaŋ naŋ boɔrɔ a teŋɛzu naboma korɔ bamenne, kyɛ ka a bontaa ba kyaare ne Naaŋmen.”

Yɛ Ta Kyerɛ

²² A Yeezu da yeli ko la O potuuribo, “Azuiŋ N yele korɔ yɛ la, yɛ ta vɛŋ ka yɛ nyɔvore yɛlɛ dɔɔnɔ yɛ, bon yɛ naŋ na di, bee ka bonsuuri yɛlɛ dɔɔnɔ yɛ.

²³ Bonso, nyɔvore gaŋ la bondiraa, ka a eŋɛ meŋ gaŋ bonsuuraa.

²⁴ Yɛ leɛ kaa nyɛ a galeŋgaare, a ba maŋ bore bee a kyɛ boma, a ba taa boma bimmu zie bee bugri, kyɛ Naaŋmen maŋ guoli a la. Yɛ ba taa tɔnɔ gaŋ a nuuli yaga zaa!

²⁵ A yɛ buo soba la na kyerɛ, ka a lɛ vɛŋ ka gogo yeni la dɔgle a o yuomo zu?

²⁶ Ka yɛnee koŋ baŋ e a yeli fẽẽ ŋa, bonso ka yɛ kyerɛ a anaŋ naŋ kyɛre eŋɛ?

²⁷ Yɛ nyɛ a baa pɛmpɛllɛ naŋ maŋ baara lɛ, a ba tonɔ toma bee a wuoro pɛmɛ, kyɛ anealɛzaa, N yele korɔ yɛ la, haali gba Solomɔn ne o naaloŋ veɛloŋ zaa, o daŋ ba su bonsuuri ka a veɛlɛ seŋ ama kanzaa.

²⁸ Kyɛ ka Naaŋmen pãã kaara a weɛ moɔ zu seŋ ŋaa, anaŋ are zenɛ, ka zie wa nyaana ka a kpɛ vũũ, bonso, ka O koŋ kaara yɛ zu gaŋ lɛ, yɛnee yelde-fẽẽ deme!

²⁹ Yɛ ta dɔɔnɔ yɛmenne, bee a kyerɛ bon yɛ naŋ na di bee a nyu.

³⁰ Bonso a teŋɛzu noba la maŋ yɔ zoro boɔrɔ a boma ama zaa, kyɛ a yɛ Saa Naaŋmen baŋ ka yɛ boɔrɔ la a boma ama.

³¹ Yɛ moɔ nimiri boɔrɔ a Naaŋmen naaloŋ, kyɛ O na ko yɛ la a boma na zaa yɛ naŋ boɔrɔ.”

³² “N noba, yɛ ta zoro dabeɛ̃, bonso, a yɛ Saa Naaŋmen poboɔbo la ka O ko yɛ a O naaloŋ.

³³ Yɛ koɔre yɛ boma a de a libie ko nembaalba. Yɛ maale libi-woore na naŋ koŋ sãã ko yɛmenne, a boɔrɔ tenvelaa naboma naŋ ba baara, be ka nannyige zaa kontoɔ̃ wa zu a, ka danduli zaa kontoɔ̃ di a.

³⁴ Bonso, zie na fo naboma naŋ be, be ka fo sukyiri meŋ na be.”

Gbaŋgbaare Naŋ Kyele

³⁵ “Yɛ nare gu a toma, kyɛ kyɔŋ yɛ fentelɛ.

³⁶ Yɛ waa ŋa noba naŋ kyɛllɛ ba daana ka o leɛ yi pɔgebeɛle zie wa, ka ba na yuo a dendɔre wieouŋ lɛ ko o, ka o naŋ deɛ wa kpaare a pane.

³⁷ A gbaŋgbaare banaŋ ba daana naŋ wa nyɛ ba ka ba ba gbiri nyɛ la maaloo. Yelmeŋɛ ka N yele korɔ yɛ, o na nare la o meŋɛ, a e ka ba zeŋ ka o ko ba bondirii.

³⁸ Ka o naŋ wa tensogpozentaa bee zinyaane saŋ a wa nyɛ a gbaŋgbaare ka ba be nimiri, ba nyɛ la maaloo.

³⁹ Kyɛ yɛ baŋ ka, ka yidandɔɔ da baŋ saŋ na a nannyige naŋ na wa o yiri, o da koŋ sage ka ba kɔɔ a o yiri kpɛ.

⁴⁰ Yɛ meŋ nare yɛmenne, bonso, a Nensaala Bie na wa la a saŋ na yɛ naŋ ba teɛre ka O na wa la.”

Gbaŋgba-bivelaa Bee Gbaŋgba-bifaa Yɛlɛ

⁴¹ Piita da soore la Yeezu, “Daana, fo lɔɔ la a sekpɔgre ŋa ko te bee neɛzaa la ka fo lɔɔ tere?”

⁴² Ka a Daana yeli sɔge, “Aŋ pãã la a tontonɔ na naŋ waa meŋɛ kyɛ baŋ yɛŋ, ka a o daana na e ka o kaara o yiri zu, a na maŋ korɔ o yideme bondirii a terebo saŋ?

⁴³ A gbaŋgbaa na o daana naŋ na leɛ kulo waana a wa nyɛ o ka o tonɔ nyɛ la maaloo.

⁴⁴ Serɛzaa ka N yele korɔ yɛ, a o daana na e la ka o kaara o boma zaa zu.

⁴⁵ Kyɛ ka a gbaŋgbaa wa yeli ko o meŋɛ, ‘N daana kɔɔrɛɛ waabo’, kyɛ pãã piili ŋmeɛrɛ a o gbaŋgba-taaba, a dɔbɔ ane a pɔgeba zaa, kyɛ di boma a nyu dãã te kuoli.

⁴⁶ A gbaŋgbaa ŋa daana na wa uri o la a daare na o naŋ ba nare ane gogo na o naŋ ba baŋ. A gbaŋgbaa ŋa daana na wa kyɛ o la ŋmaare puropuro kyɛ de o eŋ a nenfaare poɔ.

⁴⁷ A gbaŋgbaa na naŋ baŋ bonna a o daana naŋ boɔrɔ, kyɛ ba nare o meŋɛ bee a e a lɛ naŋ seŋ, na nyɛ la ŋmeɛroŋ yaga.

⁴⁸ Kyɛ a gbaŋgbaa na naŋ ba baŋ a kyɛ e yɛlɛ naŋ seŋ ka ba ŋmɛ o, na nyɛ la ŋmeɛroŋ belaa lɛ. Neɛzaa ba naŋ ko bon-yaga, ba na boɔrɔ la bon-yaga yi o zie. Neɛzaa ba naŋ de yɛlɛ yaga eŋ o nuuriŋ, ba na boɔrɔ la eroŋ yaga yi o zie.”

Yeezu Naŋ Wa Ne Kyataa

⁴⁹ “N waɛ la ka N mare vũũ eŋ a teŋɛzu, a da berɛ ŋa a vũũ da nyɔge dire la.

⁵⁰ N taa la suobu a na so N meŋɛ, kyɛ N be la toɔrɔ poɔ ka anaŋ ba wa te e baare!

⁵¹ Yɛ teɛre ka maaroŋ la ka N wa ne a teŋɛzu be? Ai, maa yeli yɛ, kyataa la ka N wa ne!

⁵² A yi ŋaa gɛrɛ noba banuu naŋ kpeɛrɛ yi-yeni poɔ na kya la taa ziiri ayi, ka ba bata laŋ noɔre a zɔɔrɔ ne a ba bayi, ka a ba bayi meŋ zɔɔrɔ ne a ba bata.

⁵³ Ba na kya la taa: Saa na zɔɔrɔ ne la o bie ka bie meŋ zɔɔrɔ ne o saa, ma na zɔɔrɔ ne la o pɔgeyaa ka pɔgeyaa meŋ zɔɔrɔ ne o ma, pɔge na zɔɔrɔ ne la o naapɔge ka naapɔge zɔɔrɔ ne o serɛ ma.”

Yɛ Baŋ A Saŋ

⁵⁴ A Yeezu da la yeli ko la a noba, “Ka yɛnee wa nyɛ zunzugri ka o wa iri a gɛrɛ sapare, yɛ maŋ yeli la daadaalɛ, ‘Saa na wa la’; ka a sereŋ e a lɛ.

⁵⁵ Ka yɛnee wa nyɛ saseɛ ka o fuuro a yi sapare nudoloŋ seŋ seŋ waana, yɛ maŋ yeli la, ‘A zie na tole la, a donɔ’; ka a sereŋ waa a lɛ.

⁵⁶ Yɛnee bampuori-kombampoɔ mine! Yɛ maŋ toɔ̃ kaa la a teŋɛ ane a saluoni kyɛ baŋ lɛ a zie naŋ na waa, kyɛ bonso ka yɛ ba toɔ̃ baŋ a zenɛ bebie yɛlɛ eŋ?”

Leɛ Maale Taa Yɛlɛ

⁵⁷ “Ka boŋ la so ka yɛ kontoɔ̃ gyɛle yɛmenne nyɛ lɛ a naŋ seŋ ne?

⁵⁸ Ka neɛ wa taa fo gɛrɛ ne sɛrɛɛdiibu zie, e aneɛ ka yɛ leɛ maale a yɛlɛ a sobiriŋ. Ka lɛ naane, o na tage fo la gaa ne a sɛredire zie, ka a sɛredire de fo ko a polisiri ka ba pɔge fo.

⁵⁹ Maa yele korɔ fo, fo koŋ yi a nempagdie poɔ a te ta lɛ saŋ fo naŋ yɔɔ a sane zaa baare.”