Korinti 8 - Naaŋmen Nɔpaalaa Gane

Kiristabie Kyɔɔtaare Teroo

¹ Yɔɔmine, te boɔrɔ la ka yɛ baŋ a garaaseɛ a Naaŋmen naŋ da ko a Masedoniya puoruu laŋne noba.

² Bonso a saŋ na ba naŋ da be dɔgroŋ kpoŋ poɔ, a ba kyelloo naŋ e kpoŋ kyɛ ka ba da ba taa ka a seŋ, ba da naŋ yuo la ba nuuri a tere kyɔɔtaare yaga.

³ Bonso, N na baŋ di la danseɛ ka ba da tere ne la ba poɔ zaa a seŋ ba faŋ, a gba tere gaŋ ba faŋ naŋ seŋ lɛ.

⁴ Ba da lɔɔ la nu a sɔrɔ te nimizeɛ zaa ka te sage ka ba meŋ poɔ a nensonne tonteroo toma ŋa poɔ.

⁵ Ba da e gaŋ la lɛ te naŋ da teɛrɛ; ba da de la bamenne a daŋ ko a Daana, kyɛ a Naaŋmen poboɔbo zuiŋ, ba pãã da de la bamenne ko te meŋ,

⁶ ka ka te na toɔ̃ sɔre a Tiitu ka o naŋ faa piili a toma ŋa, ka o na baare toŋ a nɔmmo toma o naŋ da tonɔ yɛ poɔ.

⁷ Pampana ŋa, yɛ naŋ duoro zu yelzaa poɔ: yeldeebo poɔ, yɛlɛ yeluu poɔ, yelbammo poɔ ane a yɛ enne naŋ kyerɛ yaga zaa ane a nɔmmo yɛ naŋ taa ne te. Lɛnso ka te boɔrɔ ka yɛ meŋ duoro zu a nɔmmo toma ŋa poɔ.

⁸ N ba yele a ŋaa ka a e noɔre ka N terɛ, kyɛ N tegrɛ la a na nyɛ a yɛ nɔmmo naŋ waa meŋɛ seŋ lɛ, a de manne ne lɛ ba mine naŋ moɔnɔ nimiri seŋ.

⁹ Bonso, yɛ baŋ la a te Daana Yeezu Kirista nɔmmo toma, aneazaa ka O da waa la bondaana, kyɛ O da leɛ la nandaana a yɛ zuiŋ, ka a O nandaanoŋ zuiŋ, ka yɛ na leɛ bondaanema.

¹⁰ A yeli ŋa poɔ n teɛroŋ la ka N yele korɔ yɛ: a na veɛlɛ la ka ka a yɛ banaŋ naŋ deyɛŋ piili, ka a ta e ka yɛ e yeli kaŋ yoŋ, kyɛ a seŋ ka yɛ nɔnɔ ka yɛ e yeli kaŋ.

¹¹ Pampana ŋa, yɛ baare toŋ a toma ka a lɛ na vɛŋ ka yɛ eŋɛ kyeroo ne a baaraa sentaa a seŋ yɛ naŋ taa seŋ lɛ.

¹² Bonso, ka yɛnee nare ka yɛ tere, Naaŋmen na sage de la a yɛ kyɔɔtaa a seŋ bon yɛ naŋ taa ka yɛ tere; a ba e bon neɛ naŋ ba taa eŋɛ.

¹³ N ba yele wullo ka yɛ soŋ a yɛ taaba kyɛ ka a ferɛ yɛ, kyɛ yeli sentaa zuiŋ la ka N boɔrɔ ka

¹⁴ yɛ de a yɛ pampana boŋgorre soŋ ne ba, a ba nandaanoŋ poɔ, ka a ba boŋgorre na toɔ̃ ta yɛ, a yɛ nandaanoŋ poɔ, ka a lɛ na vɛŋ ka yɛ zaa sentaa.

¹⁵ Aŋa ba naŋ sɛge lɛ: “A soba na naŋ taa yaga koŋ taa ka a gore, ka soba na meŋ naŋ taa belaa koŋ fãã bonzaa.”

Ba Naŋ Ko Tiitu Garebanyɛ

¹⁶ Naaŋmen seŋ ne la ameseɛrɛ puoruu ne O naŋ eŋ a Tiitu sukyiri poɔ a nɔmmo na tɔ maa meŋɛ naŋ taa kyaare ne yɛ.

¹⁷ Bonso, o da ba sage a te sɔroo yoŋ, kyɛ o eŋɛ naŋ kyerɛ te zuo zuiŋ, o waana la a yɛ zie ne o meŋɛ poboɔbo.

¹⁸ Te tonɔ o la ane a yɔɔ kaŋ naŋ taa yuori a puoruu laŋne yie deme zaa zie ne a o Ŋmen-yelnoore moɔlɔ.

¹⁹ A lɛ yoŋ naane, kyɛ a puoruu laŋne yie la kaa-iri o ka te zaa tu a sori a tonɔ a nɔmmo toma ŋa te naŋ tonɔ a Daana puubu eŋɛ, kyɛ wuli te meŋ poteɛre sonne.

²⁰ Te ba boɔrɔ ka neɛzaa de saanaa ko te ne a nɔmmo toma ŋa te naŋ tonɔ,

²¹ bonso, te ba boɔrɔ ka te toŋ soŋ a Daana niŋesogɔ yoŋ, kyɛ te boɔrɔ la a lɛ nensaalba meŋ niŋesogɔ.

²² Te tonɔ ba la ane a te yɔɔ te naŋ tegre o kaa gbɛɛ yaga a nyɛ ka o taa nimizeɛ yɛlɛ yaga poɔ. Pampana ŋa o taa la nimizeɛ yaga gaŋ a koroŋ na, bonso, o dɛle yɛ la yaga zaa.

²³ A Tiitu eŋ, o waa la n tutɔ ane n tonton-tɔsoba a yɛ tonteroo poɔ. A te yɔɔmine eŋ waa la a puoruu laŋne yie tontonema, a e puubu ko a Kirista.

²⁴ Azuiŋ, a puoruu laŋne yie niŋesogɔ, yɛ wuli ba ka yɛ sereŋ nɔnɔ ba la kyɛ wuli ba bon naŋ so ka te wullo temenne a yɛ zuiŋ.