Korinti 5 - Naaŋmen Nɔpaalaa Gane

¹ Te baŋ ka a teŋɛzu sege na poɔ te naŋ kpeɛrɛ, ka o naŋ wa sãã, te taa la kpɛzie naŋ yi Naaŋmen zie. Yiri nensaala nuuri naŋ ba mɛ, ka o be tenvelaa poɔ tegitegilɛ.

² Te kono hiine la a sege ŋa poɔ, a boɔrɔ ka ba pilli te ne a tenvelaa kpɛzie.

³ Serɛzaa, ka tenee wa yage o bare, te koŋ taa eŋkpoŋkpoli.

⁴ Te naŋ naŋ kyɛnɛ be a sege ŋa poɔ, te maŋ kono hiine la a te woore poɔ. Bonso, te ba boɔrɔ ka te taa eŋkpoŋkpoli, kyɛ te naŋ boɔrɔ la ka te maaleŋ su boma, ka boma naŋ ba kpiire na vɔle boma naŋ kpiire.

⁵ A soba na naŋ nare te a yeli ŋa eŋɛ la Naaŋmen. Ona la ko te a Vooroŋ Soŋ ka O waa bommannaa naŋ wuli ka O na ko te la.

⁶ Lɛnso te ba bonnɔ togitogi zaa. Aneazaa ka te baŋ ka ka tenee wa kpeɛrɛ a eŋɛŋ, te waa la tɔɔre ne a Daana,

⁷ bonso, yeldeebo la ka te kyɛnɛ ne, a ba e yɛlɛ te naŋ nyɛrɛ.

⁸ Õõ, te ba bonnɔ togitogi zaa, kyɛ te da na nɔnɔ la ka te yi kyɛ bare a eŋɛ ŋa kyɛ gaa yiri a te kpeɛrɛ ne Daana.

⁹ Azuiŋ, ka te kpeɛrɛ la a te eŋɛ yiri ŋa poɔ bee ka te kpeɛrɛ ne la a Daana, a yelkpoŋ zaa la ka te pɛle O poɔ.

¹⁰ Bonso, a ferɛɛ la ka te zaa are a Kirista sɛredi kogo niŋesogɔ ka O di te sɛrɛɛ ka te kanzaa nyɛ o san-yɔɔ, ka velaa bee ka faa la, a kyaare ne bon o naŋ e ne a o eŋɛ.

A Yeezu Kirista Naŋ E Ka Te Ne Naaŋmen Leɛ Maale Taa

¹¹ Te naŋ baŋ a Daana dabeɛ̃ zoobu zuiŋ, te moɔrɔ la ka te e ka noba sage de. Naaŋmen baŋ te la velaa zaa, kyɛ N teɛre ka yɛ meŋ baŋ te la ne yɛ poore zaa.

¹² Te ba laboreŋ korɔ temenne garebanyɛ yɛ zie, kyɛ te boɔrɔ la ka te ko yɛ vuo ka yɛ duoro yɛmenne te zuiŋ, ka yɛ na toɔ̃ maŋ nyɛ yɛlɛ yeli sɔge a banaŋ naŋ maŋ duoro bamenne ne noba arezie kyɛ ba kaara ba sukyie.

¹³ Ka tenee wa erɛ yɛlɛ aŋa noba zu naŋ ba kyebe, Naaŋmen zuiŋ la; ka tenee wa erɛ yɛmbaŋ yɛlɛ, yɛ zuiŋ la.

¹⁴ A Kirista nɔmmo la teɛ te taa, bonso, te ba bonnɔ togitogi ka neŋyeni la da kpi ko a noba zaa, azuiŋ a noba zaa kpie la.

¹⁵ O da kpie la ko a noba zaa ka ka a banaŋ naŋ voorɔ koŋ la voorɔ bamenne eŋɛ, kyɛ ba na voorɔ la korɔ a soba na naŋ da kpi kyɛ leɛ-iri a kuuni poɔ.

¹⁶ Azuiŋ, a yi ŋaa kyɛ gɛrɛ, te koŋ la kaa neɛzaa nensaaloŋ poɔ. Aneazaa ka te da baŋ la a Kirista nensaaloŋ poɔ, te ba la baŋ O a lɛ ne o zu.

¹⁷ Azuiŋ ka neɛzaa wa be a Kirista poɔ, a o soba leɛ la nempaalaa. Bonzaa naŋ waa boŋkoraa tɔle gaaɛ la kyɛ ka bonzaa leɛ bompaalaa!

¹⁸ Naaŋmen zie la ka a ama zaa yi, Ona la tu a Kirista zie a maale te ne O yɛlɛ ka a leɛ noma, kyɛ de a leɛ maale taa tonnoɔre ko te.

¹⁹ A tɛgɛ la, Naaŋmen da tu la a Kirista zie kyɛ maale O ne a andonɛɛ yɛlɛ ka a leɛ noma, a bare a ba saanaa ka a baare kyɛ de a leɛ maale taa tonnoɔre ko te ka te moɔlɔ korɔ a noba.

²⁰ Azuiŋ, te waa la noba a Kirista naŋ toŋ ka te are O gbɛbogriŋ. A Naaŋmen naŋ tu te zie kyɛ korɔ yɛ a duoro zuiŋ, te sɔrɔ yɛ la a Kirista eŋɛ, ka yɛ e ka yɛ ne a Naaŋmen leɛ maale taa.

²¹ A te zuiŋ, Naaŋmen da eɛɛ la ka a Kirista naŋ da ba taa yelbieri, tuo a te yelbieri ka ka te na tu O zie a leɛ taa Naaŋmen mennoŋ.