Korinti 3 - Naaŋmen Nɔpaalaa Gane

A Nɔpaalaa Tontonema Yɛlɛ

¹ Te mɔɔ piilee la ka te la ko temenne garebanyɛ be? Serɛzaa, a ba fere ka te de danseɛ gama wa ne yɛ zie, bee a de kaŋ yi yɛ zie, aŋa ba mine naŋ maŋ e lɛ, bee a ferɛɛ la?

² Yɛnee la a te gansɛgraa ba naŋ sɛge eŋ a te sukyie poɔ, ka noba zaa na baŋ kyɛ kanne.

³ Yɛ wulee la ka yɛnee la a Kirista gansɛgraa ka te da sɛge. Ba da ba sɛge a ne sɛg-dalee, kyɛ a Naaŋmen-vore Vooroŋ la ka ba sɛge ne. Ba ba sɛge a eŋ kubo zu, kyɛ nensaalba sukyie poɔ la ka ba sɛge a eŋ.

⁴ A ŋaa la vɛŋ ka te ba zoro dabeɛ̃ a Naaŋmen niŋeŋ a yi a Kirista zuiŋ.

⁵ A ba e ŋa te taa la temenne faŋ a na yeli ka yelzaa te naŋ e yi la te zie, kyɛ te faŋ zaa yi la Naaŋmen zie.

⁶ Ona la e ka te taa faŋ a waa a nɔpaalaa tontonema. A nɔpaalaa ba waa gansɛgraa, o waa la vooroŋ; bonso, a gansɛgraa maŋ ko la kyɛ ka a Vooroŋ terɛ nyɔvore.

⁷ Ka ba naŋ da sɛge a kũũ tonnoɔre sɛgebie eŋ kubo zu ka o wa ne veɛloŋ naŋ nyegrɛ yaga ka a Izerayɛl biiri da kontoɔ̃ kaa a Moozul niŋe, a veɛloŋ naŋ da nyegrɛ a o niŋe zuiŋ, kyɛ ka pampana ka ba daa a veɛloŋ ŋa bare konkoori.

⁸ Wola ka a Vooroŋ Soŋ tonnoɔre koŋ wa ne veɛloŋ naŋ nyegrɛ yaga gaŋ a lɛ?

⁹ Ka a tonnoɔre na naŋ waana ne kũũ wa taa puubu, a tonnoɔre na naŋ waana ne mennoŋ koŋ taa puubu yaga gaŋ a lɛ!

¹⁰ Serɛzaa, a veɛloŋ kpoŋ na zuiŋ, bon naŋ da taa veɛloŋ ba la taa veɛloŋ.

¹¹ Ka bon ba naŋ daa bare konkoori wa taa veɛloŋ wa ne, bon naŋ bebe tegitegilɛ veɛloŋ na waa la kpoŋ yaga zaa!

¹² Te naŋ taa teɛretɔroo ŋa tɔ zuiŋ, te ba erɛ yelzaa a zoro dabeɛ̃,

¹³ a ba e ŋa Moozul naŋ da de pɛne pɔge ne o niŋe, ka a Izerayɛl biiri na ta nyɛ a veɛloŋ na ba naŋ da daa bare konkoori baaroo.

¹⁴ Kyɛ ba zuri da waa la kpeɛne. Serɛzaa, a wa tɔ a zenɛ bebiri, ka ba naŋ wa woŋ a nɔkoraa gane ka ba kanne, a pɛne na ne o zu naŋ maŋ bebe la; bonso, a Kirista yoŋ zie la ka neɛ na tu a iri o bare.

¹⁵ Serɛzaa, a wa tɔ zenɛ bebiri, saŋ na zaa ba naŋ maŋ wa kanne a Moozul sɛgre, a pɛne naŋ maŋ pɔge la a ba teɛroŋ.

¹⁶ Kyɛ saŋ na neɛ naŋ maŋ wa leɛ wa a Daana zie, ba maŋ yuo la a pɛne bare.

¹⁷ Pampana ŋa, a Daana la a Vooroŋ Soŋ, kyɛ benee a Daana Vooroŋ naŋ be, be la ka meŋɛ soobo meŋ maŋ be.

¹⁸ Kyɛ te banaŋ zaa ba naŋ yuo a pɛne bare a te niŋeŋ, ka te nyɛrɛ a Daana puubu aŋa bon naŋ sãã kyaanaa poɔ, te leɛ taa la a O waaloŋ, a maŋ yi veɛloŋ ŋa poɔ a te kpɛ kaŋ poɔ. Bonso, a yeli ŋa yi la a Daana zie, Ona la a Vooroŋ Soŋ.