Korinti 2 - Naaŋmen Nɔpaalaa Gane

¹ Azuiŋ, N maale la n teɛroŋ ka N koŋ la wa yɛ zie a wa ko yɛ posaanaa zaa.

² Bonso, ka maa sãã yɛ poɔ, aŋ la bebe a na e ka n poɔ pɛle ka a soba na poɔ N naŋ da sãã naane?

³ N da sɛge ko yɛ la ne suuri, ka ka maa daŋ wa wa, ka N koŋ taa posaanaa yi a banaŋ naŋ da na e ka n poɔ pɛle zie; bonso, N ba bonnɔ ne yɛ kanzaa ka n popeɛloŋ na waa la yɛ zaa popeɛloŋ.

⁴ Bonso, a kpeɛrɛ ma la yaga, ka N taa posaanaa, a kyire nentaŋ kyɛ sɛgrɛ a lɛtɛ korɔ yɛ, a na ta ko yɛ posaanaa kyɛ vɛŋ ka yɛ baŋ lɛ N naŋ nɔŋ yɛ seŋ.

Suuri Diteroo Yɛlɛ

⁵ Ka neɛzaa wa e ka posãã bebe, n poɔ naane ka o soba sãã. N ba boɔrɔ ka n yeli yɔlle koɔ̃, kyɛ yɛ zaa poɔ la ka o soba sãã.

⁶ A dɔgroŋ ŋa a noba yaga zie naŋ ko a neɛ ŋa tɔ, seŋɛɛ la.

⁷ Azuiŋ, a seŋ ka yɛ di suuri ko o, a moore ko o, ka a soba ta wa taa posãã-kpoŋ ka a te zuo o faŋ.

⁸ Azuiŋ, N sɔrɔ yɛ la ka yɛ leɛ maaleŋ wuli yɛ nɔmmo ko o.

⁹ A yeli ŋa zuiŋ la ka N sɛgrɛ: ka n tegre yɛ nyɛ a baŋ ka yɛ taa la noɔre sagoo yɛlɛ zaa poɔ bee.

¹⁰ Neɛ na zaa yɛ naŋ di suuri tere, N meŋ di la suuri ko o. Ka maa da di suuri tere, yeli na zaa eŋɛ N naŋ da di a suuri tere na, yɛ zuiŋ la ka N e a lɛ a Kirista niŋesogɔ.

¹¹ Te e la a lɛ ka te pigi Setaana sori ka o ta toɔ̃ te; bonso, te ba be babammo poɔ a kyaare ne o poteɛrɛ.

A Pɔɔl Teɛroŋ Naŋ Da Gyɛre A Turose Poɔ

¹² N naŋ da wa a Turose ka N moɔle a Kirista yelnoore, a Daana da yuo la vuo ko ma ka N moɔle a yelnoore;

¹³ kyɛ n teɛroŋ da ba gaŋ ziyeni N naŋ da ba nyɛ a n yɔɔ Tiitu a be zuiŋ, lɛnso ka N da bare ba kyɛ da gaa Masedoniya paaloŋ.

¹⁴ Naaŋmen taa la ameseɛrɛ, Ona la maŋ de te weɛ a Kirista eŋɛ ka te zɔɔtoɔ̃ tegitegilɛ, kyɛ tu te zie a e ka a Kirista bammo yɛlɛ yaare a ziiri zaa aŋa turaali naŋ nyuuro velaa zaa.

¹⁵ Bonso, tenee la a Kirista turaali nyuu naŋ nyuuro duoro Naaŋmen zie a banaŋ naŋ nyɛ faabo ane a banaŋ naŋ weɛrɛ poɔ.

¹⁶ A banaŋ naŋ weɛrɛ zie, a turaali nyuu waana ne la kũũ, kyɛ a banaŋ naŋ nyɛ faabo zie a turaali nyuu waana ne la nyɔvore. Nembuo la seŋ ne a yɛlɛ ama?

¹⁷ Bonso, te ba de a Naaŋmen yelbiri moɔloo ka o waa yɛroŋ aŋa noba yaga naŋ erɛ lɛ, kyɛ Naaŋmen la toŋ te ka te are O niŋesogɔŋ a Kirista poɔŋ, a yele yɛlɛ ne yelmennoŋ.