Korinti 13 - Naaŋmen Nɔpaalaa Gane

A Kpãã Parebaaraa

¹ A gbɛre bota soba la a ŋaa N naŋ waana a yɛ zie. “Noba bayi bee bata danseɛ diibu la na vɛŋ ka yeli ba naŋ tuo neɛ na toɔ̃ are.”

² N da kpãã la banaŋ naŋ da e yelbieri koroŋ zaa ane a banaŋ zaa. Kyɛ N la kpaana ba la pampana ŋa N naŋ ba kye a yɛ zie a seŋ N naŋ da e a lɛ a saŋ N naŋ da be a yɛ zie a n waabo boyi soba na poɔ. Ka maa la leɛ wa yɛ zie, N koŋ taa nimimaaroŋ ne yɛ;

³ yɛ naŋ boɔrɔ ka N wuli ka a Kirista la yele yɛlɛ n eŋɛ zuiŋ. A Kirista kontoɔ̃ e yelzaa fãã yɛ zie, kyɛ O taa la kpeɛ̃õ a yɛ sogɔŋ.

⁴ Bonso, ba da kpa O la a dagaraa zu bambaaloŋ poɔ, kyɛ ka O voorɔ a Naaŋmen kpeɛ̃õ poɔ. Te waa la bambaalba O eŋɛ, kyɛ yelzaa te naŋ erɛ ne yɛ, te na voorɔ ne O la a Naaŋmen kpeɛ̃õ zuiŋ.

⁵ Yɛ gyɛle yɛmenne nyɛ ka yɛ be la a yeldeebo poɔ be? Yɛ tegre yɛmenne nyɛ. Yɛ ba baŋ ka a Kirista be la a yɛ poɔ be? Ka lɛ naane a wuli ka yɛ e kpaaɛ la!

⁶ N taa la teɛretɔroo ka yɛ na wa baŋ ka te ba e fãã.

⁷ Kyɛ te puoro la Naaŋmen ka yɛ ta wa erɛ yelfaa zaa; a ba e ŋa te boɔrɔ la ka te wuli te naŋ ba e fãã, kyɛ te boɔrɔ la ka yɛ maŋ erɛ yɛlɛ ka a toro, aneazaa ka a waa ŋa te e fããɛ la.

⁸ Bonso, te koŋ baŋ e yelzaa zɔɔ ne a yelmeŋɛ, ka a yelmeŋɛ yoŋ naane ka te na yele.

⁹ Bonso, te poɔ maŋ pɛle la saŋ na te naŋ waa bambaalba kyɛ ka yɛ taa faŋ. Bonna te naŋ puoro sɔrɔ la ka yɛ waa noba naŋ tori.

¹⁰ Azuiŋ, N sɛge la a yɛlɛ ama N naŋ ba kye a yɛ zie, ka ka maa wa wa ka N ta de a kpeɛ̃õ a Daana naŋ ko ma a ferɛ ne yɛ, bonso, O ko ma la a kpeɛ̃õ ka N taa maala ne yɛ, a ba e ka yɛ saamo zuiŋ la.

A Yaane Puoro Parebaaraa

¹¹ A yelbaaraa, N yɔɔmine ane n yɔɔpuuli, N puoro yɛ la. Yɛ kyɛlle woŋ a n sɔroo, a maale yelzaa velaa, a taa yelwontaa ne taa, a kpeɛrɛ ne emmaaroŋ; kyɛ a Naaŋmen naŋ waa nɔmmo ane emmaaroŋ soba na be la yɛ zie.

¹² Yɛ puori taa ne puoruu naŋ soma.

¹³ A nensonne zaa puoro yɛ la.

¹⁴ Ka a Daana Yeezu Kirista garaaseɛ, a Naaŋmen nɔmmo ane a Vooroŋ Soŋ lammo be yɛ zaa zie.