Korinti 12 - Naaŋmen Nɔpaalaa Gane

A Pɔɔl Naŋ Nyɛ Nyaabo Ane Yelyuowulii

¹ A ferɛɛ la ka N duoro n meŋɛ; tɔnɔ zaa ba kyebe a poɔ, kyɛ ŋaa N na manne la a nyaabo a Daana naŋ da e ka N nyɛ ane a yelyuowulii O naŋ da wuli ma yɛlɛ.

² N baŋ la neɛ kaŋ naŋ be a Kirista eŋɛ ka yuomo pie ne anaare naŋ tɔle, ka ba da de o do ne a tenvelaa suglo ata. Ka a o eŋɛ la bee ka o seɛ la ka ba de do ne, N ba baŋ, Naaŋmen la baŋ.

³ Kyɛ N baŋ ka a neɛ ŋa tɔ; ka o be la o eŋɛ poɔ bee ka o seɛ poɔ la, N ba baŋ, Naaŋmen la baŋ.

⁴ Ba da de o la do ne Tenvelaa ka o da te woŋ yɛlɛ a naŋ ba seŋ ka ba yeli, ka nensaala zaa ba taa sori a na leɛ yeli a.

⁵ A neɛ ŋa tɔ zuiŋ, N na duori la n meŋɛ, kyɛ maa meŋɛ zuiŋ, N koŋ duori n meŋɛ ka n bambaaloŋ eŋɛ naane.

⁶ Ka maa boɔrɔ ka N duoro n meŋɛ, kyɛ N koŋ e damboli, bonso, a yelmeŋɛ la ka N na yele. Kyɛ N nyɔge la n meŋɛ yi a lɛ eebo ka ka neɛzaa ta wa de ma ka N gaŋ bon o naŋ nyɛ n zie bee a woŋ yi n zie,

⁷ haali ka neɛ na kaa nyɛ lɛ a yelyuowulii naŋ waa a toɔraa lɛ. Azuiŋ, ba da eŋ la Setaana tontonɔ naŋ waa ŋa goɔ a n eŋgane poɔ ka o dɔgrɔ ma, ka N na ta wa erɛ pɔloo.

⁸ Gbɛre bota ka N sɔre a Daana ka O iri a goɔ ŋa bare ma,

⁹ kyɛ ka a Daana da yeli ko ma, “A N garaaseɛ seŋɛɛ la ko fo, bonso, bambaaloŋ poɔ la ka N kpeɛ̃õ maŋ sãã.” Azuiŋ, N na maaleŋ duoro la n meŋɛ yaga zaa ane n bambaaloŋ ka ka a Kirista kpeɛ̃õ na be n zie.

¹⁰ Azuiŋ, N poɔ pɛle ne la bambaaloŋ, zoma, tuo, dɔgroŋ ane yelwolɔ a Kirista zuiŋ, bonso, saŋ na zaa N naŋ maŋ wa waa bambaala, lɛ la ka N maŋ taa faŋ.

Pɔɔl Naŋ Taa A Korinti Teŋɛ Puoruu Laŋne Yɛlɛ

¹¹ N da waa la damboli! Yɛnee la da fere ma ka N waa a lɛ. Serɛzaa, yɛnee la da seŋ ka yɛ korɔ ma garebanyɛ, bonso, a noba bama yɛ naŋ boɔlɔ apostolii bɛrɛ kanzaa ba gaŋ ma, aneazaa ka N ba waa bonzaa.

¹² N da e la yelwulii ne kannyiri kpoŋ naŋ wuli ka N waa la apostolii meŋɛ yɛ sogɔŋ, a e yelwulii ane nɔmaa yɛlɛ ane toŋkpeɛne meŋ.

¹³ A mɔɔ waa la faa ko yɛ a gaŋ a puoruu laŋne yie anaŋ be, ka maa meŋɛ naŋ da ba eŋ yɛ toɔrɔ poɔ naane? Yɛ di suuri ko ma a saanaa ŋa zuiŋ!

¹⁴ Maa la be kyɛ, a nare ka N wa yɛ zie a gbɛre bota soba, kyɛ N koŋ eŋ yɛ toɔrɔ poɔ, bonso, N ba boɔrɔ yɛ bonzaa, yɛmenne la ka N boɔrɔ. Bonso, bibiiri naane so ka ba bɔ biŋ ba dɔgreba, kyɛ dɔgreba la seŋ ka ba bɔ biŋ ba bibiiri.

¹⁵ N poɔ na pɛle la yaga ka maa ŋmɛ sane bee ka ba ŋmɛ ma sane yɛ zuiŋ. Ka maa nɔŋ yɛ yaga, a seŋɛɛ la ka yɛ nɔŋ ma belaa lɛ be?

¹⁶ Yɛ vɛŋ ka te de ka N da ba de toɔrɔ zaa eŋ yɛ. Kyɛ yɛ yelee la ka N nyaayɛlɛ zuiŋ la so ka N da bɛlle nyɔge yɛ.

¹⁷ N da tu la a noba banaŋ kanzaa N naŋ da toŋ yɛ zie a neɛ yɛ be?

¹⁸ N da sɔre la a Tiitu ka o wa yɛ zie, a kyɛ toŋ a yɔɔ kaŋ ne o. A Tiitu da neɛ yɛ la be? Teɛroŋ yeni naane ka te zaa da taa tonɔ ne be? Sobi-yeni naane ka te zaa da tu be?

¹⁹ Yɛ mɔɔ da teɛrɛ la koroŋ zaa ka te yele la a yɛlɛ ka te faa temenne yi yɛ zie be? A Naaŋmen niŋesogɔ la ka te are a yele a yɛlɛ a Kirista eŋɛ. N poyɛŋ noba, yɛlɛ na zaa te naŋ erɛ, a yɛ baabo zuiŋ la.

²⁰ N zoro la dabeɛ̃ ka a saŋ N naŋ na wa ta, N na nyɛ yɛ la ka yɛ ba waa lɛ N naŋ boɔrɔ, ka yɛ meŋ nyɛ ma ka N ba waa lɛ yɛ naŋ boɔrɔ. N zoro la dabeɛ̃ ka kaapɔge, zɔɔre, nyuuri, suuri, meŋɛ nɔŋ gaŋ, yosãã, gagarre yɛlɛ, pɔloo ane dɔɔne na bebe la.

²¹ N zoro la dabeɛ̃ ka ka maa la leɛ wa, n Naaŋmen na e la ka N sigri n meŋɛ yɛ niŋesogɔ, a koŋ a noba yaga naŋ da e yelbieri kyɛ ba leɛ ba eebo a yi a dɛgre poɔ, peɛ̃mo toma poɔ ane a nemboŋyɛlɛ ba naŋ da e.