Korinti 11 - Naaŋmen Nɔpaalaa Gane

A Pɔɔl Ane A Kaŋwaa Apostoliimine Yɛlɛ

¹ N da na boɔrɔ la ka yɛ di kannyiri ne ma belaa lɛ a n damboluŋ poɔ. Yɛ di kannyiri ne ma!

² N taa la Naaŋmennoŋ nyuuri ne yɛ, bonso, N da eŋ la noɔre ko yɛ ka ser-yeni yoŋ la ka N na de yɛ tere. A de yɛ aŋa bitoro naŋ ba taa dɛgre zaa ko a Kirista.

³ Kyɛ N zoro la dabeɛ̃ ka aŋa a waabo naŋ da de o nyaayɛlɛ bɛlle ne Hawa lɛ, o na tuli la yɛ teɛroŋ ka yɛ koŋ la tuuro a Kirista a puoro O ne yɛ poɔ zaa.

⁴ Bonso, ka neɛ kaŋ wa moɔle Yeezu kaŋ naŋ ba waa a Yeezu na te naŋ da moɔle, bee a vooroŋ na naŋ ba waa a Vooroŋ Soŋ yɛ naŋ da de, bee a Ŋmen-yelnoore naŋ ba waa a onaŋ yɛ naŋ da sage de, yɛ maŋ deɛ sage de la.

⁵ N teɛre ka a noba na yɛ naŋ boɔlɔ apostolii bɛrɛ kanzaa ba zuo ma.

⁶ Ka maa da ba zanne baŋ yɛlɛ yeluu, kyɛ yɛŋ bammo eŋ naane. Serɛzaa, sori zaa poɔ ane yɛlɛ zaa poɔ, te wulee la ka a sãã weliweli ko yɛ.

⁷ N naŋ da maŋ sigri n meŋɛ kyɛ da moɔle a Ŋmen-yelnoore ko yɛ weɛlɛ, ka yɛ na zɛge do, N da e la yelbieri be?

⁸ N da fa la a puoruu laŋne yie noba mine ne N naŋ da sage de sommo ba zie ka N ko yɛ.

⁹ Kyɛ N naŋ da be yɛ zie ka a da ferɛ ma, N da ba e toɔrɔ ko neɛzaa, bonso, a te yɔɔmine naŋ da yi Masedoniya wa, da ko ma la bonzaa N naŋ da boɔrɔ. Azuiŋ, N da nyɔge la n meŋɛ kyɛ naŋ kyɛnɛ nyɔgrɔ n meŋɛ a na ta wa e toɔrɔ ko neɛzaa.

¹⁰ A Kirista yelmennoŋ naŋ be n poɔ zuiŋ, a yeli ŋa N naŋ yele koŋ baŋ sɔgle a Akaya tenne poore.

¹¹ Ka bonso lɛ? N naŋ ba nɔnɔ yɛ zuiŋ be? Naaŋmen baŋɛɛ la ka N nɔnɔ yɛ la!

¹² Kyɛ bonna N naŋ erɛ, N na kyɛnɛ erɛ la ka N pigi a banaŋ naŋ boɔrɔ vuo ka noba nyɛ ba, ka ba ta nyɛ a vuo a ŋmeɛrɛ nyaa ka te ne ba waa la yeni a yɛlɛ ba naŋ erɛ poɔ.

¹³ Bonso, a noba bama taaba naŋ wullo bamenne waa la kaŋwaa apostoliimine, tontonema naŋ bɛllɛ noba, a erɛ seŋ ŋa ba waa la a Kirista apostoliimine.

¹⁴ Kyɛ a ba e nɔmaa! Setaana meŋ gba maŋ leɛre la o meŋɛ a waa ŋa veɛloŋ maleke.

¹⁵ Azuiŋ, a ba waa yelsaana zaa ka a o tontonema meŋ leɛre bamenne a erɛ seŋ ŋa ba waa la mennoŋ tontonema. A ba baaroo na manne ne la a ba tontonne.

A Pɔɔl Naŋ Nyɛ Dɔgɛɛ O Naŋ Waa Apostolii Zuiŋ

¹⁶ Ka N la yeli, neɛzaa ta teɛre ka N waa la damboli, kyɛ ka yɛnee wa teɛre lɛ, lɛ eŋ, yɛ sage de ma ka N waa damboli, ka ka N meŋ na toɔ̃ zɛge n meŋɛ belaa.

¹⁷ Bonna N naŋ yele kyaare ne N nyaa ŋmɛ ŋa, N ba yele ne a Daana kpeɛ̃õ, kyɛ N yele la aŋa damboli.

¹⁸ Noba yaga naŋ maŋ duoro bamenne ne nensaaloŋ zuiŋ, N meŋ na duori la n meŋɛ.

¹⁹ Yɛ naŋ baŋ yɛŋ zuiŋ, yɛ maŋ di la kannyiri ne a dambolo ne popeɛloŋ!

²⁰ Bonso, yɛ maŋ di la kannyiri ka ba naŋ wa de yɛ leɛ gbaŋgbaare, bee a dire yɛ, bee a boɔrɔ tonɔ yɛ zu, bee a duoro bamenne yɛ zie, bee a fale yɛ niŋe.

²¹ A e ma la vi ka N yeli ka te maaleŋ waa la bambaalba te zuo a yeli ŋa poɔ! Ka neɛzaa na sage duori o meŋɛ yeli zaa poɔ; N yele la a yɛlɛ aŋa damboli; N meŋ na sage duori la n meŋɛ a yeli na poɔ.

²² Ba waa la Hiburu noba be? N meŋ waa la kaŋ. Ba waa la Izerayɛl biiri be? N meŋ waa la kaŋ. Ba waa la Aboraham biiri be? N meŋ waa la kaŋ.

²³ Ba waa la a Kirista tontonema be? N yele la a yɛlɛ aŋa yɛŋyaa; N seɛ ba la: toma tommo poɔ, N toŋ gaŋ ba la yaga zaa, ka ba pɔge ma nempagdie poɔ a gaŋ ba, a feɛ ma yaga gaŋ ba, gbɛɛ yaga ka n te peɛle kũũ.

²⁴ Gbɛre bonuu ka a Gyuumine feɛ ma kpaare lezaayi a ŋmaa yeni bare.

²⁵ Gbɛre bota ka ba ŋmɛ ma ane dabɔlɔ. A za ma ne kubo dayeni. Gbɛre bota ka a gboe N naŋ da kpɛ linni a mane poɔ, ka N be a mane koɔ̃ poɔ tensogɔ ane ŋmenaa zaa.

²⁶ N sori tuubu yaga poɔ, N da kyaare la kũũ yi a bare kɔmpie poɔ, a kyaare kũũ yi fafareba nuuri poɔ, a kyaare kũũ yi n meŋɛ noba zie, a kyaare kũũ yi a Nemboore-yobo zie, a kyaare kũũ yi a teŋkpoŋ poɔ, a kyaare kũũ yi a wɛgyɛŋ poɔ, a kyaare kũũ yi a mane koɔ̃ poɔ, a kyaare kũũ yi a kaŋwaa yɔɔmine ane yɔɔpuuli zie,

²⁷ a kyeene wale kyɛ nyɛ woore, a ba gbiri tensogre yaga, a taa kɔŋ ane kɔŋnyuuri. Gbɛɛ yaga ka N da ba maŋ di bonzaa, ka ɔɔre kpɛ ma kyɛ ka N taa eŋkpoŋkpoli.

²⁸ Kyɛ a yi a yɛlɛ naŋ kyɛre puoriŋ, N sukyiri maŋ dɔɔnɔ ma la bebiri zaa N naŋ kyerɛ a puoruu laŋne yie noba zaa yɛlɛ zuiŋ.

²⁹ Aŋ la waa bambaala, kyɛ ka maa eŋ ba waa bambaala? Aŋ la ka ba e ka o ŋmɛ gbɛre le, kyɛ ka n poɔ ba sãã?

³⁰ Ka a naŋ fere ka N zɛge n meŋɛ, N na zɛge la n meŋɛ ne boma na naŋ wuli n bambaaloŋ.

³¹ A Naaŋmen, a Daana Yeezu Saa (ka O nyɛ puubu tegitegilɛ!) baŋ ka N ba ŋmaara zirii.

³² A Damasko teŋɛ poɔ, a gɔbena naŋ da be a Naa Aretase puliŋ da gu la a Damasko teŋkpoŋ ka ka o na nyɔge ma,

³³ kyɛ ba da de ma la eŋ gbɔge poɔ a turi takoro naŋ be daŋkyini eŋɛ ka N te sigi, a da zo yi o nuuri poɔ.