Korinti 10 - Naaŋmen Nɔpaalaa Gane

A Pɔɔl Naŋ Yeli Yɛlɛ Kyaare Ne A O Tonnoɔre Yɛlɛ

¹ Maa meŋɛ Pɔɔl sɔrɔ yɛ la ne a Kirista subaaloŋ ane O sumaaroŋ. Ba yeli ka ka maa wa are yɛ niŋesogɔ, N maŋ taa la Sigruumilluu, kyɛ waa gandaa ka maa wa yi yɛ zie!

² N sɔrɔ yɛ la ka ka maa wa wa yɛ zie, a ba fere ka N wuli gandaaloŋ a seŋ N naŋ nare ka N wuli a banaŋ naŋ teɛre ka te eroŋ waa la nensaaloŋ.

³ Serɛzaa, te waa la nensaalba, kyɛ te ba zɔɔrɔ zɔɔre ne nensaaloŋ,

⁴ bonso, a te zɔɔzɔɔ-boma deɛ ba waa nensaaloŋ zɔɔzɔɔ-boma, kyɛ a taa la Naaŋmen kpeɛ̃õ, a na toɔ̃ sãã gandaare zaa. Te maŋ sãã la nɔkpeɛne

⁵ ane pɔloo bonzaa naŋ pigi sori ka ba kontoɔ̃ baŋ Naaŋmen, kyɛ maŋ nyɔge teɛroŋ zaa a e ka o sage de a Kirista yɛlɛ.

⁶ Te narɛɛ la a na dɔgre noɔre zagroo zaa, a saŋ a yɛ noɔre sagoo naŋ wa paale.

⁷ Yɛ kaa nyɛ bon naŋ be yɛ niŋesogɔ. Ka yɛnee wa taa bambaare ka a Kirista so yɛ la, yɛ leɛ-teɛre yɛmenne a yeli ŋa, aŋa lɛ a Kirista naŋ so yɛ, lɛ meŋ la ka a Kirista so te.

⁸ Pampana ŋa, vi ba erɛ ma, ka maa gba erɛ pɔloo yaga ne a kpeɛ̃õ a Daana naŋ tere ka N de maale ne yɛ. A Daana ba tere a kpeɛ̃õ ka N de sãã ne yɛ.

⁹ N ba boɔrɔ ka a e ŋa N moɔrɔ la ka N ŋmaa dabeɛ̃ eŋ yɛ ne a n gansɛgre.

¹⁰ Bonso, ba yelee la, “A o gansɛgre yelbie waa la tegrɛ kyɛ taa faŋ, kyɛ ka o naŋ wa be te poɔ, o maŋ waa la bambaala, ka a o yelyelii ba maŋ taa tɛgɛ.”

¹¹ Vɛŋ ka a noba ŋa taaba baŋ ka bonna te naŋ maŋ yeli a lɛtɛ poɔ, a ne a zu meŋ la ka te na e ka tenee wa be yɛ poɔ.

¹² Te koŋ sage de temenne poɔ bee a manne ne a banaŋ mine naŋ korɔ bamenne garebanyɛ. Kyɛ saŋ na ba naŋ wa de bamenne a manna ne taa, a de ba yɛlɛ manne ne taa, teɛroŋ soŋ naane ka ba maŋ wullo.

¹³ Tenee eŋ koŋ erɛ pɔloo te zuo, kyɛ te na erɛ seŋ ne la lɛ Naaŋmen naŋ ko te ka te toŋ, a gba gaa tatenne a wa ta yɛ zie.

¹⁴ Bonso, te da ba zuoro a te tɔrebogri a saŋ te naŋ da wa ta yɛ zie. Tenee la a dɛndɛŋ deme naŋ da yi tateŋɛ a wa a yɛ zie a wa moɔle a Kirista yelnoore ko yɛ.

¹⁵ Te koŋ de toma noba mine naŋ toŋ a erɛ ne pɔloo te zuo, kyɛ te teɛretɔroo la ka a yɛ yeldeebo baara kyɛ ka a te toma yɛ zie na yɛllɛ yaga zaa,

¹⁶ ka ka te na moɔle a Ŋmen-yelnoore tenne naŋ do be a yɛ teŋɛ niŋeŋ, kyɛ ta erɛ pɔloo ne neɛ kaŋ toma o naŋ daŋ toŋ baare.

¹⁷ “Vɛŋ ka soba na naŋ erɛ pɔloo, erɛ pɔloo a Daana eŋɛ.”

¹⁸ Bonso, a ba e ka banaŋ naŋ korɔ bamenne garebanyɛ la waa nemmenne, kyɛ a banaŋ a Daana naŋ korɔ garebanyɛ la.