KOLO 3 - Naaŋmen Nɔpaalaa Gane

A Nyɔvo-paalaa Naŋ Be A Kirista Eŋɛ

¹ Azuiŋ, ka yɛ ne a Kirista wa laŋ iri yi a kũũ poɔ, yɛ boɔrɔ boma naŋ be sazu poɔ, be a Kirista naŋ zeŋ a Naaŋmen nuduluŋ seŋ.

² Yɛ de yɛ teɛroŋ eŋ boma naŋ be sazu eŋɛ, kyɛ ta de yɛ teɛroŋ eŋ boma naŋ be teŋɛzu eŋɛ,

³ bonso, yɛ kpie la ka a yɛ nyɔvoɛ sɔgle a Kirista naŋ be Naaŋmen poɔ.

⁴ Ka a Kirista naŋ waa a yɛ nyɔvore wa sãã, lɛ meŋ la ka yɛ ne O pãã na laŋ sãã a O puubu poɔ.

⁵ Azuiŋ, yɛ ko a teŋɛzu yɛlɛ zaa naŋ be yɛ enneŋ: peɛ̃mo toma, yeldɛgɛ, vɔlfaare, yelfaare boɔbo ane bombɔ-gaŋne (naŋ waa tebɛ maaloo).

⁶ A yɛlɛ ama zuiŋ, Naaŋmen supuriyaaraa waana la a banaŋ naŋ ba sagra noɔre zu.

⁷ A yɛlɛ ama taaba la ka yɛ meŋ da erɛ, saŋ na yɛ naŋ da taa a nyɔvo-koraa na.

⁸ Kyɛ pampana a ferɛɛ la ka yɛ bare a yɛlɛ ama: suuri, supuriyaaraa, faaloŋ, yosãã kyɛ bare yelfaare zaa yeluu.

⁹ Yɛ ta ŋmaara ziiri korɔ taa, yɛ naŋ yage a nensaal-koraa ne o yel-erre bare zuiŋ,

¹⁰ kyɛ pilli yɛmenne ne a nensaal-paalaa aŋa wagyɛ. Ona la ka ba e ka o leɛ e paalaa yelbammo poɔ a taa a neɛ naŋ iri o waaloŋ.

¹¹ A nyɔvo-paalaa ŋa poɔ, tɛɛtɛɛ ba la kye Giriki noba ane a Gyuumine sogɔŋ, neɛ ba naŋ iri o dɛgre ane neɛ ba naŋ ba iri o dɛgre, saama, noba nimie naŋ ba yuo, gbaŋgbaare ane noba naŋ so bamenne; kyɛ a Kirista la a boma zaa, a be a boma zaa poɔ!

¹² Yɛ naŋ waa Naaŋmen neŋkaa-irri, nensonne ane O poyɛŋ noba zuiŋ, yɛ de nyonono, nimimaaroŋ, sigruumilluu, sumaaroŋ ane kannyiri su pɔge yɛmenne aŋa bonsuuri.

¹³ Yɛ dire kannyiri ne taa, kyɛ ka yɛ kaŋ wa taa yeli ne o tɔsoba, yɛ dire suuri korɔ taa aŋa lɛ a Daana naŋ da di suuri ko yɛ; lɛ meŋ ka a fere ka yɛ dire suuri korɔ taa.

¹⁴ A gaŋ a zaa, yɛ de nɔmmo su pɔge yɛmenne, ona la maŋ leŋ boma zaa lantaa velaa zaa.

¹⁵ Yɛ vɛŋ ka a Kirista maaroŋ di naaloŋ yɛ sukyie poore, a maaroŋ ŋa poɔ la ka ba da sereŋ boɔle yɛ eŋ a enda-yeni eŋɛ. Yɛ maŋ puoro bareka.

¹⁶ Yɛ vɛŋ ka a Kirista yelbiri be yɛ poɔ yaga zaa; ka yɛ kanna kyɛ yele yɛlɛ teɛrɛ taa ne yɛŋ zaa ane bareka puoruu yɛ sukyie poore, a yiele yiele, puubu yiele ane seeloŋ yiele korɔ Naaŋmen.

¹⁷ Yelzaa yɛ naŋ yele bee a erɛ, yɛ erɛ a zaa a Daana Yeezu yuori eŋɛ, a tu O zie puoro a Saa Naaŋmen bareka.

Kiristabie Yiri Yeldɔlɔ Yɛlɛ

¹⁸ Pɔgebɔ, yɛ sagra yɛ serebɛ nɔɛ, bonso, a lɛ la seŋ ne a Daana zie.

¹⁹ Serebɛ, yɛ nɔnɔ yɛ pɔgeba a ta daŋ wa nyɛrɛ ba zu zaa.

²⁰ Bibiiri, yɛ sagra a yɛ dɔgreba nɔɛ yelzaa poɔ, bonso, a ŋaa la yɛ feroo toma naŋ seŋ ne a Daana zie.

²¹ Saamine, yɛ ta erɛ yɛlɛ naŋ na maŋ e ka yɛ bibiiri suuri ire, ka lɛ naane ba nuuri na yoɔre la.

²² Gbaŋgbaare, yɛ sagra a banaŋ naŋ so yɛ nɔɛ yelzaa poɔ, ka a ta waa ka saŋ ba naŋ kaara yɛ yoŋ, ka yɛ e ka ba poore pɛle kyɛ yɛ sagra ba nɔɛ ne yɛ poore zaa yɛ naŋ zoro a Daana zuiŋ.

²³ Yeli na zaa naŋ la a yɛ feroo toma, yɛ tonɔ a ne yɛ poore zaa aŋa a Daana la ka yɛ tonɔ terɛ, kyɛ ka a ta waa ŋa nensaalba la ka yɛ tonɔ terɛ,

²⁴ yɛ naŋ baŋ ka a Daana la na ko yɛ a gbandiruŋ ka o e a yɛ san-yɔɔ, yɛ tonɔ korɔ a Daana Kirista.

²⁵ Bonso, ba na yɔɔ la a yelfa-erebɛ seŋ lɛ ba naŋ e a yelfaare seŋ, ka nɔmboore zaa koŋ kyebe.