KOLO 2 - Naaŋmen Nɔpaalaa Gane

¹ N boɔrɔ la ka yɛ baŋ lɛ N naŋ moɔrɔ yɛ zuiŋ, ane a banaŋ naŋ be a Laodisiya teŋɛ poɔ, a de ne a banaŋ zaa naŋ daŋ ba nyɛ n nimisogɔ.

² N boɔrɔ la ka ba nyɔge bamenne kyɛ e yeni nɔmmo poɔ, ka ka ba na taa yɛlɛ tɛgɛ bambaare bondaanoŋ zaa, kyɛ taa a Naaŋmen yelsɔglɔ yelbammo, Ona la a Kirista meŋɛ.

³ A Kirista poɔŋ la ka yɛŋ ane yelbammo naboma zaa sɔgle.

⁴ N yele la a ŋaa ka ka neɛzaa na ta wa bɛlle yɛ ne nɔkpeɛŋ-zirii.

⁵ Aneazaa ka N ba be yɛ zie ne n eŋgane, kyɛ N be la yɛ zie a seeloŋ poɔ, a kyellɛ ka N nyɛ yɛ bambaare ane yɛ yeldeebo naŋ e kpeɛŋaa a Kirista eŋɛŋ.

Yɛ Taa La Nyɔvore Zaa Yɛ Naŋ Be A Kirista Eŋɛŋ

⁶ Yɛ naŋ pãã sage de a Daana Kirista Yeezu zuiŋ, yɛ naŋ kyɛnɛ taa yɛ nyɔvoɛ velaa O eŋɛŋ,

⁷ a tɛ nyaga kyɛ baa do O eŋɛ a are kpeɛŋaa a yeldeebo poɔ, aŋa lɛ ba naŋ da wuli yɛ, ka a yɛ bareka puoruu duoro zu.

⁸ Yɛ gu yɛmenne velaa ka neɛzaa ta wa de yɛmbaŋ yɛlɛ ane bɛllɛ nyɔge ne yɛ eŋ seeloŋ gbaŋgbaaloŋ poɔ, a yi nensaalba wuluu yɛlɛ ane a teŋɛzu sefaare, kyɛ ka a ba e seŋ a Kirista naŋ boɔrɔ lɛ.

⁹ Bonso, O eŋɛŋ la ka a Naaŋmennoŋ zaa be a eŋgannoŋ poɔ,

¹⁰ ka yɛ wa taa a nyɔvore zaa O poɔŋ, Ona la a namine ane a kpeɛ̃õ deme zaa zusoba.

¹¹ O eŋɛŋ meŋ la ka ba iri yɛ dɛgre ne a seeloŋ dɛgre iruu, ne yɛ naŋ da iri a eŋgannoŋ bare yɛ naŋ da taa a dɛgre iruu a Kirista eŋɛŋ zuiŋ.

¹² Ba naŋ da laŋ ũũ yɛ ne O a suobu poɔ, lɛ meŋ la ka ba e ka yɛ ne O leɛ-iri a yɛ yeldeebo yɛ naŋ taa a Naaŋmen kpeɛ̃õ zuiŋ, O naŋ da e ka a Kirista leɛ-iri yi a kũũ poɔ.

¹³ Yɛ naŋ da kpi a yɛ yelbebe poɔ ane a yɛ eŋgane dɛgre ba-iruu zuiŋ, Naaŋmen da eɛɛ la ka yɛ ne O leɛ voorɔ, O naŋ da di a te yelbebe zaa suuri ko te,

¹⁴ a peere a yɛlɛ na zaa naŋ da di danseɛ a kyaare ne te yelbebe bare ane a bege sori naŋ tu lɛ. O da iri la a ŋa bare, a kpa o a dagaraa zu.

¹⁵ O da faa la a namine ane a kpeɛ̃õ deme zɔɔzɔɔ-boma, kyɛ de ba wuli a andonɛɛ zaa, a di gandaaloŋ ba zu a lɛ eŋɛ.

¹⁶ Azuiŋ, yɛ ta vɛŋ ka neɛzaa ko yɛ saanaa a yɛ bondirii ane bonnyuuri yɛlɛ, bee yɛ tige diibu, bee a kyuu paalaa tigri diibu bee a pɛnnoo bebiri daare yɛlɛ.

¹⁷ A ama waa la a bonna naŋ na wa dasuoluŋ, kyɛ a bon meŋɛ waa la a Kirista soobo.

¹⁸ Yɛ ta vɛŋ ka neɛzaa yeli ka yɛ ba seŋ ne a, kyɛ yele o naŋ gaŋ yɛ, a nyɛrɛ nyaabo kyɛ puoro malekere, a wullo o meŋɛ ka a ba tu sori ne nensaalba teɛroŋ,

¹⁹ kyɛ ba kpimare a Kirista naŋ e a zusoba, a Onaŋ zie a eŋgane zaa naŋ nyɛrɛ o bondirii, kyɛ ka a gyiile ne kɔbɔ tuori taa ziiri nyɔge a eŋɛ zaa lantaa, a baara ne baabo naŋ yi Naaŋmen zie.

Kpããmo Naŋ Kyaare Ne Kaŋwaa Wulwulibo

²⁰ Ka yɛ ne a Kirista wa laŋ kpi a seere naŋ di naaloŋ a tendaa zu zie, wola ka yɛ naŋ kyɛnɛ taa a yɛ nyɔvoɛ aŋa yɛ naŋ waa la a tendaa noba? Boŋ la so ka yɛ naŋ sagra a nɔɛ ama taaba:

²¹ “Ta nyɔge taa, Ta lɛnne nyɛ, Ta seene?”

²² A nɔɛ ama zaa yele kyaara ne la boma naŋ na toɔ̃ sãã ka ba naŋ wa de a tonɔ ne toma; a ama deɛ waa la nensaalba nɔɛ ane wuluu.

²³ A ama sereŋ waa seŋ ŋa yɛŋ yɛlɛ naŋ waana ne meŋɛ puoruu naŋ veɛlɛ, sigruumilluu ane neɛ naŋ eŋnɛ o eŋɛ dɔgroŋ kpoŋ, kyɛ ka a ba taa tɔnɔ zaa a kontoɔ̃ iri neɛ yi a eŋgane vɔlfaare poɔ.