Gyɔɔn 5 - Naaŋmen Nɔpaalaa Gane

Yeezu Naŋ Saŋ Baaloŋ A Pɛnnoo Bebiri Daare

¹ A yɛlɛ ama puoriŋ a Gyuumine tigri kaŋ da taɛ la, ka Yeezu da do gaa Gyɛruzɛlɛm.

² Koɔ̃-puu zie kaŋ da be la a Gyɛruzɛlɛm poɔ a peɛle a dendɔre na ba naŋ boɔlɔ Peere Dendɔre ka ba boɔlɔ o Bɛsaada a Hiburu deme kɔkɔre poɔ. A be da taa la kyaare anuu.

³ Baalba yaga da maŋ gaŋ la a bafoɔle poɔ: zɔnne, wɔɔre ane gbɛrɛɛ. [

⁴ Ba da maŋ kyɛllɛ la a koɔ̃ dɔ̃ɔ̃mo saŋ, bonso, wagre mine poɔ a Daana maleke da maŋ sigi wa la a koɔ̃-puu zie, a wa dɔ̃ɔ̃ a koɔ̃. Soba na zaa naŋ wa daŋ kpɛ a koɔ̃ saŋ na ba naŋ wa dɔ̃ɔ̃ a baare, maŋ nyɛ la sammo yi o baaloŋ na zaa o naŋ beɛrɛ.]

⁵ Dɔɔ kaŋ naŋ da le baaloŋ yuomo lezare ne pie ne anii da gaŋ la a be.

⁶ A Yeezu naŋ da wa nyɛ a dɔɔ baala ka o gaŋ a be, kyɛ ka O da baŋ ka o gaŋ la a be ka a kɔɔre, O da soore la a dɔɔ, “Fo boɔrɔ la ka fo nyɛ laafeɛ be?”

⁷ Ka a dɔɔ baala da yeli sɔge O, “Neŋkpoŋ, N ba taa neɛzaa naŋ na nyɔge ma eŋ a koɔ̃ poɔ saŋ na ba naŋ maŋ wa dɔ̃ɔ̃ a koɔ̃. N naŋ maŋ wa gaa ka N sigre kpeɛrɛ zaa ka n tɔ kaŋ daŋ ma la kpɛ.”

⁸ Ka Yeezu da yeli ko o, “Vaa-iri de a fo boŋganaa kyɛnɛ gɛrɛ.”

⁹ A daadaalɛ ka a dɔɔ deɛ nyɛ laafeɛ, a de o boŋganaa a da piili kyɛnɛ. A bebiri ŋa da waa la a Gyuumine pɛnnoo bebiri daare.

¹⁰ Lɛ la ka a Gyuumine da yeli ko a dɔɔ naŋ da nyɛ o sammo, “Zenɛ waa la a pɛnnoo bebiri, sori kyebe ka fo tuo fo boŋganaa.”

¹¹ Kyɛ ka o da yeli sɔge ba, “A dɔɔ na naŋ saŋ ma la yeli ko ma, ‘De a fo boŋganaa kyɛnɛ gɛrɛ.’ ”

¹² Ka ba da soore o, “Aŋ la a dɔɔ ŋa naŋ yeli ko fo, ‘De a fo boŋganaa kyɛnɛ gɛrɛ’?”

¹³ A dɔɔ da ba baŋ a soba na naŋ saŋ o, bonso, a Yeezu da kpɛ la a nembeɛoŋ poɔ a tɔle te gaa.

¹⁴ A lɛ puoriŋ, a Yeezu da te nyɛ o la a Naaŋmen die poɔ a da yeli ko o, “Nyɛ, fo nyɛ la laafeɛ! Tɔɔ daŋ la wa erɛ yelbieri zaa ka yelfaa zaa ta wa pɔge fo.”

¹⁵ A dɔɔ da yi gaa te yeli ko la a Gyuumine ka a Yeezu la da saŋ o.

¹⁶ A lɛ zuiŋ, a Gyuumine da piili korɔ la a Yeezu dɔgroŋ, O naŋ da erɛ a yɛlɛ ama taaba a pɛnnoo bebiri daare zuiŋ.

¹⁷ Kyɛ ka a Yeezu da leɛ yeli sɔge ba, “A N Saa naŋ kyɛnɛ tonɔ la toma, ka N meŋ naŋ tonɔ.”

¹⁸ A yeli ŋa zuiŋ, a Gyuumine da maaleŋ moɔ la nimiri a boɔrɔ ka ba ko O. Bonso, a pɛnnoo bebiri kyiiruŋ yoŋ naane ka O da saana, kyɛ O naŋ da boɔlɔ Naaŋmen O Saa, ka a lɛ na wuli ka O de la O meŋɛ ka O ne Naaŋmen seŋ taa.

A Bidɔɔ Naŋ Taa Kpeɛ̃õ Yɛlɛ

¹⁹ Ka Yeezu da yeli ko ba, “Serɛzaa ka N yele korɔ yɛ, a Bidɔɔ koŋ baŋ e yelzaa ne O meŋɛ faŋ, ka a naŋ ba e yeli na O naŋ nyɛ a Saa ka O erɛ yoŋ naane. Bonso, yeli na zaa a Saa naŋ erɛ, a lɛ ne a zu la ka a Bidɔɔ meŋ maŋ e.

²⁰ A Saa nɔŋ la a Bidɔɔ, a maŋ wuli O a anaŋ zaa Ona meŋɛ naŋ maŋ erɛ. A Saa na wuli la a Bidɔɔ yelbɛrɛ naŋ gaŋ ŋaa, ka a na e yɛ nɔmaa.

²¹ Serɛzaa, aŋa a Saa naŋ maŋ seŋ a kuuni lɛ, a e ka ba leɛ voorɔ, a lɛ meŋ ka a Bidɔɔ meŋ maŋ ko banaŋ zaa O naŋ boɔrɔ, nyɔvore.

²² A Saa ba dire neɛzaa sɛrɛɛ, kyɛ O de la sɛrɛɛdiibu zaa ko a Bidɔɔ,

²³ ka ka noba zaa na de emmo ko a Bidɔɔ aŋa lɛ ba naŋ eŋnɛ a Saa. Soba na zaa naŋ ba eŋnɛ a Bidɔɔ, ba eŋnɛ a Saa naŋ toŋ a Bidɔɔ.

²⁴ Serɛzaa ka N yele korɔ yɛ, soba na zaa naŋ woŋ N yelbie, a sage de a soba na naŋ toŋ ma yɛlɛ, taa la nyɔvore naŋ ba taa baaroo. Ba koŋ di o soba sɛrɛɛ, kyɛ ka o yi kuuni poɔ a te kpɛ nyɔvore poɔ.”

²⁵ “Serɛzaa ka N yeli ko yɛ, a saŋ tara la; a saŋ gba taɛ la pampana ŋa, ka kuuni na woŋ a Naaŋmen Bie kɔkɔre. Kyɛ banaŋ naŋ na woŋ a kɔkɔre na taa la nyɔvore.

²⁶ Aŋa a Saa naŋ e a nyɔvore zaa yiibu zie, lɛ la ka O e ka a O Bidɔɔ meŋ e a nyɔvore zaa yiibu zie.

²⁷ Kyɛ a Saa ko la a Bidɔɔ kpeɛ̃õ ka O di sɛrɛɛ, O naŋ waa a Nensaala Bie zuiŋ.

²⁸ Yɛ ta vɛŋ ka yɛ nɔɛ maa ne a ŋaa, bonso, a saŋ waana la ka banaŋ zaa naŋ be ba yaare poore na woŋ a Naaŋmen Bie kɔkɔre

²⁹ a wa yi ba yaare poore. Banaŋ naŋ da erɛ soŋ na iri voorɔ la, kyɛ ka banaŋ naŋ da erɛ faa na iri nyɛ dɔgroŋ.”

A Yeezu Dansediribe Yɛlɛ

³⁰ “N koŋ baŋ e yelzaa ne N meŋɛ kpeɛ̃õ. A lɛ Naaŋmen naŋ maŋ wuli ma, lɛ ka N maŋ di a sɛrɛɛ kyaare ne. N sɛrɛɛdiibu maŋ e meŋɛ, bonso, N meŋɛ poboɔbo naane ka N erɛ, kyɛ a soba na naŋ toŋ ma poboɔbo la.”

³¹ “Ka maa dire N meŋɛ danseɛ, a N danseɛ ba taa yelmeŋɛ.

³² Kyɛ neɛ kaŋ bebe la a dire a N danseɛ. Ka N baŋ ka a O danseɛ O naŋ dire kyaare ne ma waa la yelmeŋɛ.

³³ Yɛ da toŋ la yɛ noba a Gyɔɔn zie, ka o da di a yelmeŋɛ danseɛ.

³⁴ A ba e ŋa N boɔrɛɛ nensaala ka o di N danseɛ, kyɛ N yele la a yɛlɛ ama a yɛ faabo zuiŋ.

³⁵ A Gyɔɔn da waa la fentelɛ naŋ dire, a kyaana, ka yɛ da boɔrɔ ka yɛ kyelle belaa a o kyaane poɔ.

³⁶ Kyɛ N taa la danseɛ naŋ gaŋ a Gyɔɔn deni. A toma na N Saa naŋ ko ma ka N na toŋ te baare, a toma na ne a zu N naŋ tonɔ la dire danseɛ ka a Saa la toŋ ma.

³⁷ Kyɛ a Saa naŋ toŋ ma, O meŋɛ meŋ di la N danseɛ. Yɛ daŋ ba woŋ O kɔkɔre, bee a nyɛ O waaloŋ.

³⁸ Yɛ ba taa O yelbiri ka o be yɛ nyɔvore poɔ, yɛ naŋ ba sage de a soba na O naŋ toŋ yɛlɛ zuiŋ.”

³⁹ “Yɛ maŋ sɔre la, a boɔrɔ yɛlɛ a gansoŋ poɔ, bonso, yɛ teɛre ka a poɔ la ka yɛ na nyɛ nyɔvore naŋ ba taa baaroo, kyɛ a gansoŋ ŋa poɔ yɛlɛ la di N danseɛ.

⁴⁰ Kyɛ ka yɛ zagre ka yɛ wa N zie a wa nyɛ nyɔvore.

⁴¹ N ba boɔrɔ puubu yi nensaalba zie.

⁴² Kyɛ N baŋ ka yɛ ba taa Naaŋmen nɔmmo yɛ sukyie poore.

⁴³ N wa la N Saa yuori eŋɛ, kyɛ ka yɛ ba sage de ma. Kyɛ ka neɛ kaŋ da wa o meŋɛ yuori eŋɛ, yɛ na sage de o la.

⁴⁴ Wola ka yɛ na e de Naaŋmen yɛlɛ ka yɛnee sagra derɛ puubu naŋ yire yɛ nensaaltaaba zie, kyɛ ba boɔrɔ puubu naŋ yi a soba na yoŋ naŋ waa Naaŋmen?

⁴⁵ Yɛ ta teɛre ka N na yeli la yɛ yeli saanaa ko a N Saa. A Moozul yɛ naŋ de yɛ teɛretɔroo eŋ, ona la na ko yɛ saanaa.

⁴⁶ Ka yɛnee da sage de a Moozul yɛlɛ, yɛ da na sage de la N meŋ yɛlɛ, bonso, N yɛlɛ la ka Moozul da sɛge.

⁴⁷ Kyɛ ka yɛnee ba sage de a yɛlɛ o naŋ sɛge, wola ka yɛ na e sage de N yɛlɛ?”