Gyɔɔn 2 - Naaŋmen Nɔpaalaa Gane

Pɔgde Tigri Naŋ Da Be A Keeina Teŋɛ Poɔ

¹ A beri ata daare, pɔgde tigri da be la a Keeina teŋɛ naŋ be a Galili paaloŋ poɔ, ka Yeezu ma da be a be.

² Ba da boɔle la Yeezu ane O potuuribo meŋ a pɔgde tigri zie.

³ A tigri dãã naŋ da wa baare, a Yeezu ma da yeli ko O la, “A ba dãã baarɛɛ la.”

⁴ Ka Yeezu da yeli ko o, “Pɔge deme, maa ne fo boŋ yeli la be a poɔ? A N saŋ naŋ ba ta sɛre.”

⁵ Ka a O ma da yeli a tontonema, “Yɛ e yelzaa O naŋ na yeli ko yɛ.”

⁶ Kyɛ senne ayoɔbo da be la a be a seŋ a Gyuumine puoruu pɛgebo yɛlɛ naŋ da biŋ lɛ. A seŋɛ kanzaa poɔ koɔ̃ da maŋ ta la galori lezare bee lezare ne pie.

⁷ A Yeezu da yeli ko la a noba, “Yɛ ɔŋ koɔ̃ paale a senne.” Ka ba da ɔŋ a koɔ̃ paale a zaa zɛlɛlɛ.

⁸ Ka a Yeezu da yeli ko ba, “Yɛ pãã ɔŋ a mine gaa te ko a noba naŋ kaara a tigri yɛlɛ neŋkpoŋ.” Lɛ la ka ba ɔŋ gaa ne.

⁹ A tig-kaara neŋkpoŋ naŋ da wa lɛnne a koɔ̃ naŋ leɛ dãã, kyɛ ba baŋ benee a naŋ yi (kyɛ a tontonema na naŋ da ɔŋ a koɔ̃ eŋ da baŋɛɛ la), da boɔle la a pɔgderɛ

¹⁰ a yeli ko o, “Neɛzaa maŋ daŋ tere la a dãã anaŋ naŋ kpɛ, ka a saŋ na a saama naŋ wa nyu te seŋ, ka o pãã tere a anaŋ naŋ ba kpɛ. Kyɛ ka fõõ eŋ biŋ a dãã anaŋ naŋ kpɛ te ta ŋaa saŋ.”

¹¹ A yeli ŋa a Yeezu naŋ da e, da la O yelwulii dɛndɛŋ soba O naŋ da e a Keeina teŋɛ naŋ be a Galili paaloŋ poɔ. A da iri la a Yeezu yuori ka O potuuribo da sage de O yɛlɛ.

¹² A ŋaa puoriŋ, Yeezu ne O ma ne O yɔɔmine ane o potuuribo da gaa la Kapanum a te bebe ka a ta beri ayi.

Yeezu Naŋ Maale a Naaŋmen Die

¹³ A Gyuumine Ista tigri naŋ da wa peɛlɛ, Yeezu da do la Gyɛruzɛlɛm.

¹⁴ O da nyɛ la noba a Naaŋmen die poɔ ka ba koɔrɔ naadɛɛ, peere ane ŋmama, kyɛ ka a libi-tɛgrebɛ da zeŋ a ba libie tɛgebo zie.

¹⁵ A Yeezu da de la mie a maale ne kpaaraa a digi ne ba ka ba yi a Naaŋmen die poɔ, a laŋ ne a nii, ane a peere. O da kyiri la a libi-tɛgrebɛ warbie yaare bare kyɛ daa a ba tabolɔ lɔɔ.

¹⁶ O da yeli ko la a banaŋ naŋ da koɔrɔ a ŋmama, “Yɛ de a boma ŋa yi te bare! Yɛ ta de a N Saa yiri ka o leɛ yɛ daa diibu zie!”

¹⁷ A O potuuribo pãã da leɛ teɛrɛɛ la ka ba da sɛge la a gansoŋ poɔ, “A fo yiri nɔmmo na di ma la aŋa vũũ.”

¹⁸ Lɛ la ka a Gyuumine da soore a Yeezu, “Boŋ yelwulaa la ka fo na e a wuli te ka a seŋ ka fo e a ŋaa.”

¹⁹ Ka a Yeezu da yeli sɔge ba, “Yɛ ŋmore a Naaŋmen die ŋa, kyɛ beri ata poɔ N na e la ka o leɛ-iri are.”

²⁰ Lɛ la ka a Gyuumine da yeli, “A Naaŋmen die ŋa meɛbo da de la yuomo lezaayi ne ayoɔbo, kyɛ ka fo na toɔ̃ mɛ o beri ata poɔ?”

²¹ Kyɛ a Yeezu da yelee O meŋɛ eŋɛ naŋ waa a Naaŋmen die yɛlɛ.

²² A Yeezu naŋ da wa leɛ-iri a kuuni poɔ puoriŋ la ka a O potuuribo pãã da leɛ-teɛre ka O da yeli la a ŋaa. Ba pãã da sage de la a gansoŋ yɛlɛ ane a Yeezu yɛlɛ O naŋ da yeli.

²³ A Yeezu naŋ da wa be a Gyɛruzɛlɛm poɔ a Ista tigri saŋ, noba yaga da sage de la O yɛlɛ, bonso, ba da nyɛ la a yelwulii O naŋ da erɛ.

²⁴ Kyɛ Yeezu da koŋ baŋ de O meŋɛ dɛle ba kanzaa, bonso, O da baŋ la nensaalba zaa,

²⁵ ka O da ba la boɔrɔ neɛzaa ka o yeli neɛ yɛlɛ ko O, bonso O meŋɛ da baŋ la neɛzaa poteɛrɛ.