Gyɔɔn 16 - Naaŋmen Nɔpaalaa Gane

¹ “N da yeli la a yɛlɛ ama ko yɛ ka ka a na gu yɛ ka yɛ ta wa ŋmɛ gbɛre le.

² Ba na digi yɛ la bare a puoruu deri poore. Serɛzaa, a saŋ waana la ka noba na ko yɛ kyɛ maŋ teɛre ka Naaŋmen la ka ba puoro.

³ Ba na e la a ŋaa ba naŋ ba baŋ a Saa bee maa zuiŋ.

⁴ Kyɛ N da yeli la a yɛlɛ ama ko yɛ ka ka a ba saŋ wa ta, ka yɛ na leɛ-teɛre baŋ ka N da daŋ yeli la a ba yɛlɛ ko yɛ.” “N da ba yeli a yɛlɛ ama ko yɛ a piiluu saŋ, bonso, N da be la yɛ zie.

A Vooroŋ Soŋ Toma Yɛlɛ

⁵ Kyɛ pampana ŋa N leɛ gɛrɛ la a soba na naŋ toŋ ma zie, kyɛ ka yɛ kanzaa ba soore ma, ‘Yeŋ ka fo gɛrɛ?’

⁶ Kyɛ N naŋ da yeli a yɛlɛ ama ko yɛ zuiŋ yɛ poore da sããɛ la.

⁷ Kyɛ a yelmeŋɛ la ka N yele korɔ yɛ: A na e la velaa ko yɛ ka N gaa, bonso, ka maa ba gaa, a yɛ Soŋnɔ koŋ wa. Kyɛ ka maa wa gaa, N na toŋ O la ka O wa yɛ zie.

⁸ Ka O naŋ wa wa, O na wuli la a tendaa noba ka ba tulee la a kyaare ne ba yelbebe, yelmennoŋ ane sɛrɛɛdiibu yɛlɛ.

⁹ O na wuli ba la kyaare ne ba yelbebe ba naŋ ba sage de N yɛlɛ zuiŋ;

¹⁰ a kyaare ne yelmennoŋ, bonso, N leɛ gɛrɛ la a Saa zie, ka yɛ koŋ la nyɛ ma.

¹¹ O na wuli ba la kyaare ne sɛrɛɛdiibu, bonso, a tendaa ŋa naa sɛrɛɛ di baarɛɛ la.”

¹² “N naŋ taa la yɛlɛ yaga na yeli ko yɛ, kyɛ yɛ kontoɔ̃ de a zaa pampana.

¹³ Ka a yelmeŋɛ Vooroŋ wa wa, O na wuli yɛ la a yelmeŋɛ zaa, bonso, O koŋ yeli O meŋɛ yɛlɛ, kyɛ yelzaa O naŋ woŋ yi a Saa zie la ka O na yeli ane yɛlɛ na naŋ na e.

¹⁴ O na puu ma la, bonso, bon naŋ e N soobo la ka O na de wuli yɛ.

¹⁵ Bonzaa a Saa naŋ taa e la N soobo. Lɛnso ka N da yeli ko yɛ ka O na de la bon naŋ e N soobo a wuli yɛ.”

Posãã Na Leɛ La Popeɛloŋ

¹⁶ “A koŋ kɔɔre kyɛ ka yɛ koŋ la nyɛ ma, kyɛ ka a la e belaa ka yɛ la nyɛ ma.”

¹⁷ Lɛ la ka a O potuuribo mine da soorɔ taa, “Boŋ la ka O boɔrɔ ka O yeli ko te ne a ŋaa O naŋ yeli, ‘A kyɛre la belaa lɛ ka yɛ koŋ la nyɛ ma, kyɛ ka a la e belaa ka yɛ la nyɛ ma, bonso N gɛrɛ la a Saa zie’?”

¹⁸ Ba da yelee la, “A ŋaa O naŋ yeli tɛgɛ la boŋ, ‘A kyɛre la belaa lɛ’? Te ba baŋ bonna O naŋ yele kyaare ne.”

¹⁹ A Yeezu da baŋ ka ba da boɔrɔ la ka ba soore O, lɛnso ka O da soore ba, “Yɛ mɔɔ leɛ soorɛɛ taa N naŋ yeli a ŋaa tɛgɛ be, ‘A koŋ kɔɔre kyɛ ka yɛ koŋ la nyɛ ma, kyɛ ka a la e belaa ka yɛ la nyɛ ma’?

²⁰ Yelmeŋɛ zaa ka N yele korɔ yɛ, yɛ na ŋma la nentaŋ kyɛ koŋ, kyɛ a teŋɛzu noba na kyellɛ la. Yɛ na woŋ la tuo, kyɛ a yɛ tuo wommu na leɛ la kyelloo.

²¹ Ka pɔge wa te boɔrɔ dɔgebo, a o poɔ maŋ beɛrɛ la, bonso, a o saŋ taɛ la. Kyɛ ka o naŋ wa te dɔge a bie baare, o ba maŋ la teɛrɛ a tuo o naŋ da woŋ, bonso o maŋ taa la kyelloo ne o naŋ dɔge bie.

²² Lɛ meŋ la ka yɛ wono tuo pampana, kyɛ N na leɛ wa nyɛ yɛ la, ka yɛ taa kyelloo yɛ sukyie poɔ. Neɛzaa kontoɔ̃ de a yɛ kyelloo yi yɛ zie.

²³ A lɛ daare yɛ koŋ sɔre bonzaa yi N zie. Yelmeŋɛ zaa ka N yele korɔ yɛ, ka yɛnee wa sɔre bonzaa yi a Saa zie a N yuori eŋɛ, O na ko yɛ la.

²⁴ A wa te ta ŋaa, yɛ naŋ ba sɔre bonzaa N yuori eŋɛ. Yɛ sɔre, kyɛ yɛ na nyɛ la, lɛ la ka yɛ kyelloo na nyɛ paaloo.”

Yeezu Potuuribo Emmaaroŋ Yɛlɛ

²⁵ “N da lɔɔ la sekpɔgɔ yeli ne yɛlɛ ko yɛ kyɛ a saŋ waana la ka N koŋ la lɔɔ sekpɔgɔ yeli ne yɛlɛ ko yɛ kyɛ N na yeli la a Saa yɛlɛ weliweli lɛ ko yɛ.

²⁶ A lɛ daare yɛ na sɔre la a N yuori eŋɛ. N ba yeli ko yɛ ka N na are la yɛ gbɛbogriŋ kyɛ sɔre yi a Saa zie ko yɛ.

²⁷ Bonso, a Saa meŋɛ nɔŋ yɛ la, yɛ naŋ nɔŋ ma kyɛ da sage de ka N yi la a Saa zie wa zuiŋ.

²⁸ A Saa zie la ka N da yi wa a teŋɛzu, kyɛ N la yire la a teŋɛzu a leɛ gɛrɛ a Saa zie.”

²⁹ A O potuuribo da yeli ko O la, “Õõ, ŋaa fo pãã yele la yɛlɛ weliweli korɔ te, a ba la lɔɔrɔ sekpɔgɔ!

³⁰ Ŋaa eŋ te pãã baŋ ka fo baŋ la yelzaa, ka a ba fere ka neɛzaa la soore fo yelzaa. A ŋaa zuiŋ la ka te sage de ka fo yi la Naaŋmen zie.”

³¹ Ka a Yeezu da soore ba, “Yɛ pãã sage deɛ la be?

³² A saŋ waana la; o taɛ la gba, ka ba na ŋmɛ yɛ yaare bare ka kanzaa zo gaa o yiri kyɛ kyɛre N yoŋ. Kyɛ N ba waa N yoŋ, bonso, a Saa be la N zie.

³³ N daŋ yeli la a ŋaa ko yɛ ka ka yɛ na taa emmaaroŋ N zie. Yɛ na nyɛ la dɔgroŋ a teŋɛzu, kyɛ yɛ nyɔge yɛmenne, bonso, N zɔɔtoɔ̃ la a tendaa!”