Gyɔɔn 12 - Naaŋmen Nɔpaalaa Gane

Mareya Naŋ Sɔ Yeezu Kããsoŋ

¹ A naŋ da kyɛre beri ayoɔbo kyɛ ka a Ista tigri na ta, Yeezu da gaa la Bɛtani teŋɛ. Be la ka Laazoro, a neɛ na Yeezu naŋ da e ka o leɛ-iri yi a kuuni poɔ da kpeɛrɛ.

² Ba da maale la bondirii ko O a be. Maata la da kaara a bondirii yɛlɛ, ka Laazoro da e a neɛ na kaŋ naŋ da laŋ zeŋ a diibu zie ne a Yeezu.

³ Mareya da de la turaali mine daaroŋ naŋ ba wono zaa, a wa sɔ ne a Yeezu gbɛɛ, kyɛ de a o zukɔɔloŋ meele ne. A turaali da nyu laare la a yiri zaa.

⁴ Kyɛ ka Gyudase, a Yeezu potuuribo kaŋ (a onaŋ naŋ da na yi a Yeezu puori a de O tere) da yeli:

⁵ “Bonso ka ba da koŋ de a turaali ŋa koɔre a nyɛ yuoni gbuli san-yɔɔ, a da de a libie soŋ ne nembaalba?”

⁶ (A ba e ŋa o naŋ da taa a nembaalba yɛlɛ la so ka o da yeli a ŋaa, kyɛ o naŋ da waa nannyige la so. Ona la da maŋ taa a ba libie woɔ, a da maŋ zuuro a libie mine.)

⁷ Ka a Yeezu da yeli, “Yɛ bare a pɔge zomm. O da da la a turaali ŋa ka o nare kyaare ne N ũũmu daare.

⁸ Yɛ na maŋ taa la a nembaalba ka ba be yɛ zie tegitegilɛ kyɛ maa eŋ koŋ be yɛ zie tegitegilɛ.”

Ba Naŋ Bo Ka Ba Ko Laazoro

⁹ A Gyuumine yaga naŋ da wa woŋ ka Yeezu da be la a be, ba da ba wa a Yeezu yoŋ zuiŋ kyɛ ba da waɛ la ka ba wa nyɛ a Laazoro. Ona la ka Yeezu da e ka o leɛ-iri yi a kuuni poɔ.

¹⁰ Lɛ la ka a Naaŋmen bagmaalkare da nare ka ba ko a Laazoro meŋ.

¹¹ Bonso, a Laazoro kuuni poɔ leɛ-iruu yɛlɛ la so ka a Gyuumine yaga da sagra derɛ a Yeezu yɛlɛ kyɛ zagra a ba yɛlɛ.

Yeezu Naŋ Kpɛ A Gyɛruzɛlɛm Ne Gandaaloŋ

¹² A nyaazie daare, a nembeɛoŋ naŋ da wa a tigri zie da woŋ ka Yeezu waana la a Gyɛruzɛlɛm.

¹³ Azuiŋ ba da ŋmaa la kpaakpaa vaare, a yi ka ba te tuori O. Ba da kyaara la a yele: “Hozaana! A soba na naŋ waana a Daana yuori eŋɛ nyɛ la maaloo; A Izerayɛl Naa!”

¹⁴ A Yeezu da nyɛ la boŋlee a do zɔŋ. Ka a deɛ tu lɛ ba naŋ da sɛge a gansoŋ poɔ:

¹⁵ “Zaayɔn pɔgeyaa, ta zoro dabeɛ̃. Nyɛ, a fo naa waana la, a zɔŋ boŋlee!”

¹⁶ A Yeezu potuuribo da naŋ ba baŋ a yeli ŋa tɛgɛ. Kyɛ O naŋ da wa leɛ-iri yi a kuuni poɔ a nyɛ puubu baare la ka ba pãã da leɛ-teɛre ka a lɛ ba naŋ da sɛge a gansoŋ poɔ kyaare ne O la da nyɛ eebo O zie.

¹⁷ Lɛ la ka a nembeɛoŋ na naŋ da bebe kyɛ ka a Yeezu da boɔle a Laazoro ka o yi a yaa poɔ, a leɛ voorɔ, da dire a yɛlɛ danseɛ.

¹⁸ A noba naŋ da woŋ ka a Yeezu e la yelwulaa ŋa la so ka a nembeɛoŋ da gaa ka ba te tuori O.

¹⁹ A Faraziimine pãã da yele korɔ la taa, “Yɛ nyɛɛ la, yɛ koŋ baŋ e yelzaa. Nyɛ, a tendaa zaa la tuuro O!”

Giriki Noba Mine Da Boɔrɔ la Ka Ba Nyɛ A Yeezu

²⁰ Giriki noba mine da poɔ la a noba na naŋ da gaa a tigri zie ka ba te puori.

²¹ Ba da wa la Filipi zie. A Filipi da yi la Bɛsaada teŋɛ naŋ da be Galili paaloŋ. A Giriki noba da yeli ko la a Filipi, “Neŋkpoŋ, te boɔrɔ la ka te nyɛ a Yeezu.”

²² A Filipi da gaa te yeli ko la Anduru, ka a Anduru ane a Filipi zaa da gaa te yeli ko a Yeezu.

²³ Ka a Yeezu da yeli sɔge ba, “A saŋ taɛ la ka a Nensaala Bie na nyɛ puubu.

²⁴ Yelmeŋɛ zaa la ka N yele korɔ yɛ, ka kabiri ba le teŋɛ a poɔ̃, o maŋ e la kabi-yeni. Kyɛ ka o naŋ wa poɔ̃, o maŋ buli la a eŋ bie yaga.

²⁵ Banaŋ naŋ nɔŋ ba nyɔvoɛ maŋ kɔŋ la ba nyɔvoɛ, kyɛ ka banaŋ naŋ ba nɔŋ ba nyɔvoɛ a teŋɛzu kyɛ, na taa la ba nyɔvoɛ a nyɔvo-babaaraa poɔ.

²⁶ Soba na zaa naŋ tonɔ korɔ ma, a ferɛɛ la ka o tuuro ma. Zie N naŋ be la ka N tontonɔ meŋ na be. Soba na zaa naŋ tonɔ korɔ ma, a N Saa na eŋ la o soba.”

Yeezu Naŋ Yeli O Kũũ Yɛlɛ

²⁷ “Pampana ŋa N teɛroŋ zaa gyɛrɛɛ la. Boŋ ka N na yeli, ‘N Saa, faa ma yi a tuo ŋa poɔ be’? Ai, a ŋaa zuiŋ la ka N bebe wa ta a tuo ŋa saŋ.

²⁸ N Saa, e ka a fo yuori nyɛ puubu.” Lɛ la ka kɔkɔre kaŋ yi sazu a yele, “N eɛɛ la ka a N yuori nyɛ puubu, kyɛ N na la e ka o la nyɛ puubu.”

²⁹ A nembeɛoŋ naŋ da are a be a woŋ a yɛlɛ ŋa, da yeli ka saa la tanne. Ka ba mine meŋ da yeli, “Maleke la yeli yɛlɛ ko O.”

³⁰ Ka a Yeezu da yeli sɔge, “A yɛ zuiŋ la ka a kɔkɔre ŋa yeli a yɛlɛ, maa eŋ zuiŋ naane.

³¹ A tendaa deme sɛrɛɛdiibu la a ŋaa. Pampana ba na digi la a tendaa naa bare.

³² Kyɛ maa eŋ, ka ba naŋ wa zɛge ma a teŋɛ ŋa zu ka N do saa, N na tage la nensaalba zaa wa ne N zie.”

³³ A Yeezu da yeli la a ŋaa ka O wuli bonna tɔ kũũ O naŋ na kpi.

³⁴ A nembeɛoŋ da yeli sɔge O la, “Te da woŋee la yi a Naaŋmen begɛ poɔ ka a Mɛzaaya na bebe la tegitegilɛ. Wola ka fo pãã yele ka a ferɛɛ la ka ba zɛge a Nensaala Bie ka o do saa? Nembuo la a Nensaala Bie ŋa?”

³⁵ Ka a Yeezu da yeli ko ba, “A kyaane be la yɛ zie ka a kɔɔre belaa. Yɛ naŋ taa a kyaane, yɛ kyɛnɛ a kyaane poɔ, ka ligruŋ ta wa ligi pɔge yɛ. Ka yɛnee wa kyɛnɛ lige poɔ, yɛ ba maŋ baŋ zie yɛ naŋ gɛrɛ.

³⁶ Yɛ naŋ taa a kyaane, yɛ sage de a kyaane yɛlɛ, ka a lɛ e ka yɛ leɛ a kyaane biiri.” A Yeezu naŋ da wa yeli a ŋaa baare, O da yi la a noba poɔ a te sɔgle O meŋɛ.

A Noba Naŋ Ba Sage De a Yeezu Yɛlɛ

³⁷ Aneazaa ka Yeezu da e la yelwulii yaga ba niŋesogɔ, ba da ba sage de O yɛlɛ.

³⁸ A ŋaa da eɛɛ la ka ka a lɛ a Ŋmen-yelmanna Azaaya naŋ da yeli na tu a tuubu: “Daana, aŋ la da sage de a te yɛlɛ, ka nembuo la ka a Daana da wuli a O ganda-nu?”

³⁹ Kyɛ a lɛ zuiŋ ba da koŋ baŋ sage de, bonso, a Azaaya da la yelee la:

⁴⁰ “O eɛɛ la ka ba nimie zɔŋ kyɛ ka ba sukyie dare, ka ka ba kontoɔ̃ kaa nyɛ ne ba nimie, a na baŋ a tɛgɛ ne ba yɛŋ a leɛ ba eebo, ka N saŋ ba.”

⁴¹ A Azaaya da yeli la a yɛlɛ ŋa kyaare ne a Yeezu, bonso, o da nyɛ la O puubu.

⁴² Kyɛ anealɛzaa, a noba yaga, a laŋ ne a nembɛrɛ mine da sage de la a Yeezu yɛlɛ. Kyɛ a Faraziimine zuiŋ ba da ba sage na yeli ka a yi, ba naŋ da zoro dabeɛ̃ ka ba na digi ba la bare a puoruu die poɔ zuiŋ,

⁴³ bonso, ba da nɔŋ la puubu naŋ yire nensaalba zie a gaŋ puubu naŋ yire Naaŋmen zie.

A Yeezu Kannoo Zukpulluu

⁴⁴ A Yeezu pãã da yeli ne la kɔkɔkpeɛŋaa, “Soba na zaa naŋ sage de N yɛlɛ, ba sage de N yoŋ yɛlɛ kyɛ a soba na naŋ toŋ ma yɛlɛ la ka o sage de.

⁴⁵ Neɛ na zaa naŋ nyɛ ma, nyɛ la soba na naŋ toŋ ma.

⁴⁶ N waa la kyaane naŋ wa a teŋɛzu, ka ka neɛ na zaa naŋ wa sage de N yɛlɛ koŋ la be lige poɔ.

⁴⁷ N ba dire neɛzaa naŋ woŋ a N yɛlɛ kyɛ ba tuuro a sɛrɛɛ, bonso, N ba wa ka N di a andonɛɛ sɛrɛɛ. Kyɛ N waɛ la ka N faa a andonɛɛ.

⁴⁸ Soba na naŋ zagre ma, a ba sage de N yɛlɛ taa la sɛredire. A bebi-baaraa daare, a yɛlɛ na N naŋ yeli la na di a o sɛrɛɛ.

⁴⁹ N meŋɛ yɛlɛ naane ka N yele, kyɛ a Saa naŋ toŋ ma meŋɛ la ko ma noɔre kyaare ne yɛlɛ N naŋ na yeli ane yɛlɛ anaŋ naŋ seŋ ka N manne.

⁵⁰ Kyɛ N baŋ ka a noɔre O naŋ ko ma terɛ la nyɔvore naŋ ba taa baaroo. Azuiŋ, a yɛlɛ N naŋ yele, a lɛ zomm N Saa naŋ ko ma la ka N yele.”