Gyɔɔn 1 - Naaŋmen Nɔpaalaa Gane

A Naaŋmen Yelbiri Naŋ Leɛ Nensaala

¹ A piiluu saŋ a Yelbiri da bebe la. A Yelbiri da be la Naaŋmen zie, ka a Yelbiri da waa Naaŋmen.

² A Yelbiri da be la Naaŋmen zie a piiluu saŋ zaa.

³ O zie la ka boma zaa tu a wa bebe. Bonzaa da ba kyebe naŋ tu ziyuo wa bebe ka O yoŋ zie naane.

⁴ O poɔ la ka nyɔvore da be, ka a nyɔvore da waa nensaalba zaa kyaane.

⁵ A veɛloŋ da kyaane la a lige poɔ, ka a lige da ba toɔ̃ a veɛloŋ.

⁶ Naaŋmen da toŋ la dɔɔ kaŋ yuori naŋ da di Gyɔɔn.

⁷ O da e la dansedire a wa ka O di a veɛloŋ danseɛ, ka ka noba na tu a o zie kyɛ sage de a Naaŋmen yɛlɛ.

⁸ Ona meŋɛ da naane a veɛloŋ, kyɛ o da waɛ la ka o di a veɛloŋ danseɛ.

⁹ A veɛloŋ naŋ sereŋ waa veɛloŋ a kyaane neɛzaa da waana la a teŋɛzu.

¹⁰ O da be la a teŋɛzu. O zie la ka a tendaa tu a wa bebe kyɛ ka a tendaa noba da ba baŋ O.

¹¹ O da wa la O meŋɛ noba zie, kyɛ ka a O meŋɛ noba da ba sage de O yɛlɛ.

¹² Kyɛ banaŋ zaa naŋ sage de O yɛlɛ, a sage de O yuori, O da ko ba la kpeɛ̃õ ka ba na leɛ Naaŋmen biiri,

¹³ ba dɔgebo da ba waa zẽẽ bee eŋgane dɔgebo, bee nensaala poboɔbo, kyɛ Naaŋmen dɔgebo da la.

¹⁴ Ka a Yelbiri da leɛ nensaala, a wa zeŋ te poɔ, ka te nyɛ O puubu. Ka a O puubu te tɔgle ne a saa bidɔɔ yeni puubu, naŋ paale ne garaaseɛ ane yelmennoŋ.

¹⁵ (A Gyɔɔn da di la O danseɛ kyɛ ŋmɛ kpɛlle a yeli, “A soba ŋa yɛlɛ la ka N da yeli, ‘A soba na naŋ na tu n puori wa, gaŋ ma la, bonso, O da bebe la kyɛ ka ba naŋ ba dɔge ma.’ ”)

¹⁶ A O Naaŋmennoŋ poɔ la ka te zaa nyɛ garaaseɛ dɔgle dɔgle taa.

¹⁷ A Naaŋmen nɔɛ sereŋ da tu la Moozul zie wa, ka garaaseɛ ane yelmennoŋ tu a Yeezu zie wa.

¹⁸ Neɛzaa daŋ ba nyɛ Naaŋmen. A Naaŋmen Bi-yeni yoŋ naŋ peɛle a Saa, Ona la e ka noba baŋ a Naaŋmen.

A Gyɔɔn Bati Danseɛ Diibu Yɛlɛ

¹⁹ Ŋaa la ka Gyɔɔn da di a danseɛ, a saŋ na a Gyuumine naŋ da toŋ a Naaŋmen bagmaalba ane a Levi boorɔ noba ka ba yi Gyɛruzɛlɛm a gaa te soore o, “Nembuo la fo?”

²⁰ A Gyɔɔn da ba mɔŋ noɔre, kyɛ o da yelee daadaa ko ba, “Maa naane a Mɛzaaya.”

²¹ Ka ba da soore o, “Ka wola pãã la? Fõõ la a Elaagya be?” Ka o da yeli, “Maa naane.” “Fõõ la a Ŋmen-yelmanna be?” Ka o da yeli sɔge, “Ai.”

²² Lɛ la ka ba soore o, “Nembuo pãã la fo? Yeli ko te, ka te leɛ gaa te yeli ko a banaŋ naŋ toŋ te. Boŋ yeli ka fo na yeli kyaare ne fo meŋɛ?”

²³ Ka a Gyɔɔn da yeli: “Maa la a neɛ na kɔkɔre naŋ ŋmeɛrɛ kpɛlle a wɛgyɛŋ poɔ, ‘Maale a Daana sori ka o tori,’ ” aŋa a Ŋmen-yelmanna Azaaya naŋ da yeli lɛ.

²⁴ Kyɛ a Faraziimine la pãã da toŋ ba.

²⁵ Ba da soore la a Gyɔɔn, “Ka fõõ ba wa e a Mɛzaaya, a ba e Elaagya, a ba e a Ŋmen-yelmanna, ka boŋ pãã so ka fo terɛ suobu?”

²⁶ Ka a Gyɔɔn yeli sɔge ba, “Maa eŋ terɛ la suobu ne koɔ̃ kyɛ neɛ kaŋ are la yɛ poɔŋ, ka yɛ ba baŋ O.

²⁷ Ona la soba na naŋ tu n puori waana, ka N ba seŋ ne O nɔɔtere miri loruu.”

²⁸ A yeli ŋa da e la a Bɛtani naŋ be a Gyɔɔdan maŋgaŋne benee a Gyɔɔn naŋ da terɛ a suobu.

A Naaŋmen Pilee Yɛlɛ

²⁹ A nyaazie daare, Gyɔɔn da nyɛ la a Yeezu ka O waana o zie, ka o da yeli, “Yɛ nyɛ a Naaŋmen Pilee. Ona la na peere a andonɛɛ yelbieri bare!

³⁰ A soba ŋa yɛlɛ la ka N da yeli, ‘Neɛ naŋ gaŋ ma na tu la n puori wa, bonso, O daŋ bebe la kyɛ ka ba naŋ ba dɔge ma.’

³¹ Maa meŋɛ da ba baŋ O, kyɛ N wa terɛ la suobu ne koɔ̃ a yeli ŋa zuiŋ, ka ka a Izerayɛl biiri na baŋ O.”

³² A Gyɔɔn da di la danseɛ a yele, “N da nyɛ la a Vooroŋ Soŋ ka O waa ŋa ŋmanee a yi sazu sigi wa be O zie.

³³ Maa meŋɛ da ba baŋ O, kyɛ a soba na naŋ da toŋ ma ka N wa ko noba suobu ne koɔ̃ la da yeli ko ma, ‘A soba na fo naŋ nyɛ ka a Vooroŋ Soŋ sigi wa be O zie, Ona la na korɔ noba suobu ne a Vooroŋ Soŋ.’

³⁴ Kyɛ maa meŋɛ nyɛɛ la kyɛ di danseɛ ka a Naaŋmen Bie la a ŋa.”

A Yeezu Potuuribo O Naŋ Da Daŋ Boɔle Yɛlɛ

³⁵ A nyaazie daare, Gyɔɔn da la are ne la o potuuribo bayi,

³⁶ kyɛ nyɛ Yeezu ka O wa tɔlɔ, ka a Gyɔɔn kyaare yeli, “Yɛ nyɛ, a Naaŋmen Pilee la kyɛ!”

³⁷ A potuuribo bama bayi naŋ da woŋ ka o yeli a ŋaa, da tu la a Yeezu.

³⁸ A Yeezu naŋ da wa leɛ a nyɛ ba ka ba tuuro O la ka O da soore ba, “Boŋ la ka yɛ boɔrɔ?” Ka ba da yeli ko O, “Urabbi” (a tɛgɛ la Wulwullo), “yeŋ ka fo kpeɛrɛ?”

³⁹ Ka a Yeezu da yeli ko ba, “Yɛ wa nyɛ.” Ba da wa nyɛ la be O naŋ kpeɛrɛ, a da be O zie a bebiri na zaa. A da e ŋa zimaane gbelli anaare saŋ.

⁴⁰ A ba bayi na kaŋ naŋ da woŋ ka Gyɔɔn yeli a yɛlɛ ka ba da tu a Yeezu yuori da la Anduru, a Saamon Piita yɔɔ.

⁴¹ A Anduru da daŋ bɔ la o yɔɔ Saamon a yeli ko o, “Te nyɛ la a Mɛzaaya.” (A tɛgɛ la: Naaŋmen Neŋkaa-iraa)

⁴² A Anduru da taa la a Saamon wa ne a Yeezu zie, ka a Yeezu kaa o kyɛ yeli, “Fõõ la Saamon, a Gyɔɔn bidɔɔ. Ba na boɔle fo la Sefase” (a yuori tɛgɛ la Piita).

Yeezu Naŋ Boɔle Filipi Ane Nataneɛl

⁴³ A nyaazie daare Yeezu da maale la O teɛroŋ ka O yi gaa Galili teŋɛ. O da nyɛ la Filipi, a yeli ko o, “Wa tuuro ma.”

⁴⁴ A Filipi da yi la Bɛsaada, a teŋɛ na Anduru ane Piita naŋ da yi.

⁴⁵ A Filipi da nyɛ la Nataneɛl a yeli ko o, “Te nyɛ la a neɛ na yɛlɛ a Moozul naŋ sɛge a Naaŋmen begɛ gane poɔ, ka a Ŋmen-yelmanneba meŋ sɛge a gansoŋ poɔ. Ona la a Yeezu, a Yuzɛb bidɔɔ naŋ yi Naazɛrɛ teŋɛ.”

⁴⁶ A Nataneɛl da soore o la, “Boŋ bonsoŋ la na baŋ yi a Naazɛrɛ poɔ?” Ka Filipi da yeli ko o, “Wa nyɛ.”

⁴⁷ A Yeezu naŋ da wa nyɛ Nataneɛl ka o waana O zie la ka O da yeli, “Izerayɛl bie sereŋ la a ŋa, ka bonnoo zaa ba kye o zie!”

⁴⁸ Ka Nataneɛl da soore O, “Wola ka fo e baŋ ma?” Ka a Yeezu da yeli sɔge o, “N da nyɛ fo la a kaŋkanteɛ pare sɛre kyɛ ka a Filipi pãã wa boɔle fo.”

⁴⁹ Ka Nataneɛl da leɛ yeli, “Wulwullo, fõõ la a Naaŋmen Bie! Fõõ la a Izerayɛl Naa!”

⁵⁰ Ka Yeezu da yeli sɔge o, “N naŋ yeli ko fo ka N da nyɛ fo la a kaŋkanteɛ pare la so ka fo sage de be? Fo na nyɛ la yeltegrɛ naŋ gaŋ a ama.”

⁵¹ Ka Yeezu da yeli ko o, “Yelmeŋɛ ka N yele korɔ yɛ. Yɛ na nyɛ la a saluoni ka o yuo, ka a Naaŋmen malekere duoro kyɛ sigre waana a Nensaala Bie zu.”