I Tesa 5 - Naaŋmen Nɔpaalaa Gane

¹ Pampana, te yɔɔmine ane te yɔɔpuuli, a ba fere ka ba sɛge bonzaa ko yɛ a kyaare ne a saŋ ane a bebie na poɔ a yɛlɛ ama naŋ na e.

² Bonso, yɛmenne baŋ la velaa ka a Daana bebiri na wa la aŋa nannyige naŋ maŋ wa tensogɔ saŋ lɛ.

³ Ka ba naŋ wa yeli, “Emmaaroŋ ane zeŋ-laafeɛ bebe la,” lɛ la ka sããmo deɛ maŋ uri wa ba zie aŋa pɔge bidɔge poɔ naŋ maŋ uri beɛrɛ lɛ, ka ba kontoɔ̃ zo faa bamenne!

⁴ Kyɛ yɛnee, te poyɛŋ noba, yɛ ba be lige poɔ ka a bebiri ŋa na wa uri yɛ aŋa nannyige;

⁵ bonso, yɛ zaa waa la kyaane ane ŋmenaa bibiiri; te ba waa a tensogɔ bee lige bibiiri.

⁶ Azuiŋ, yɛ ta vɛŋ ka te gbire aŋa ba mine naŋ gbire lɛ, kyɛ yɛ vɛŋ ka te be nimiri kyɛ baŋ temenne taabo velaa;

⁷ bonso, a banaŋ naŋ maŋ gbire maŋ gbire la tensogɔ saŋ, ka banaŋ naŋ maŋ nyu dãã kuoli maŋ nyu kuoli tensogɔ saŋ.

⁸ Kyɛ te naŋ waa a ŋmenaa noba, yɛ vɛŋ ka te taa temenne velaa, kyɛ de yeldeebo ane nɔmmo ka a waa aŋa kuri kparoo ba naŋ maŋ su pɔge a nyaa, a de a faabo teɛretɔroo vɔgle aŋa kpogli.

⁹ Bonso, Naaŋmen ba nare te biŋ gu a O supuriyaaraa kyɛ O nare te la biŋ ka te na tu a te Daana Yeezu Kirista zie a nyɛ faabo,

¹⁰ Ona la kpi te zuiŋ, ka te be nimiri bee ka te gbire la, te ne O na laŋ voorɔ la.

¹¹ Azuiŋ, yɛ yele yɛlɛ teɛrɛ taa kyɛ soŋnɔ taa ka yɛ baara duoro, aŋa yɛ naŋ sereŋ erɛ a lɛ.

Yelteɛbo Parebaaraa, Yaane Puoro Ane Naaŋmen Maaloo

¹² Te sɔrɔ yɛ la te yɔɔmine ane te yɔɔpuuli, yɛ eŋnɛ a banaŋ naŋ tonɔ toma a yɛ poɔŋ, a kaara yɛ zu a Daana eŋɛ kyɛ yele yɛlɛ teɛrɛ yɛ.

¹³ Yɛ korɔ ba gyeremɛ yaga zaa ne nɔmmo a ba toma zuiŋ. Yɛ taa emmaaroŋ a yɛ poɔ.

¹⁴ Kyɛ te sɔrɔ yɛ la, te poyɛŋ noba, ka yɛ kpaana a entuo deme, a yele yɛlɛ teɛrɛ a banaŋ naŋ ba taa sukyie, a soŋ a banaŋ naŋ ba taa faŋ a ba yeldeebo poɔ, a dire kannyiri ne ba zaa.

¹⁵ Yɛ kaara soŋ ka yɛ kanzaa ta wa derɛ faaloŋ yɔɔrɔ ne faaloŋ, kyɛ yɛ maŋ moɔrɔ ka yɛ erɛ soŋ korɔ taa ane a noba zaa.

¹⁶ Yɛ taa popeɛloŋ tegitegilɛ,

¹⁷ a puoro tegitegilɛ a ta bara,

¹⁸ a maŋ puoro Naaŋmen bareka yɛlɛ zaa poɔ, bonso, a Naaŋmen poboɔbo naŋ be a Kirista Yeezu eŋɛ la a lɛ ko yɛ.

¹⁹ Yɛ ta kpinni a Vooroŋ Soŋ vũũ bare.

²⁰ Yɛ ta de a Ŋmen-yelmanneba yelbie ka a e yel-laama,

²¹ kyɛ yɛ maŋ tegre yelzaa nyɛ; yɛ nyɔge yeli naŋ e soŋ kpeɛŋaa;

²² a tage yɛmenne yi faaloŋ boorɔ zaa poɔ.

²³ Ka a emmaaroŋ Naaŋmen meŋɛ pɛge yɛ zaa ka yɛ yi, kyɛ ka a yɛ vooroŋ ane yɛ seere ane yɛ enne be laafeeloŋ poɔ, a ta taa faaloŋ zaa a te Daana Yeezu Kirista waabo saŋ.

²⁴ A soba na naŋ boɔle yɛ taa la yelmennoŋ, O na e la a lɛ.

²⁵ Te poyɛŋ noba, yɛ puoro korɔ te.

²⁶ Yɛ puori a yɔɔmine ane a yɔɔpuuli zaa ne puoruu naŋ soma.

²⁷ N korɔ yɛ la noɔre a Daana eŋɛ ne nimizeɛ zaa ka yɛ sɔre a lɛtɛ ŋa ko a noba zaa.

²⁸ Ka a te Daana Yeezu Kirista garaaseɛ be yɛ zie.