I Tesa 4 - Naaŋmen Nɔpaalaa Gane

Nyɔvore Naŋ Pɛllɛ Naaŋmen Poɔ

¹ A baaraa zaa, te yɔɔmine ane te yɔɔpuuli, te sɔrɔ yɛ la kyɛ yele korɔ yɛ a Daana Yeezu eŋɛ ka yɛ naŋ da zanne yi te zie lɛ, a naŋ seŋ ka yɛ taa yɛ nyɔvoɛ ka a pɛllɛ Naaŋmen poɔ (aŋa lɛ yɛ naŋ sereŋ erɛ), yɛ erɛ ka a gaŋ a lɛ.

² Bonso, yɛ baŋ la bonna wuluu te naŋ da tu a Daana Yeezu zie a wuli yɛ.

³ A ŋaa la a Naaŋmen poboɔbo, a yɛ pɛgeyiibu: ka yɛ tage yɛmenne yi peɛ̃mo toma poɔ,

⁴ ka yɛ yeni yeni zaa baŋ lɛ o naŋ na baŋ o meŋɛ taabo, sonnoŋ ane gyeremɛ poɔ,

⁵ kyɛ ka a ta e ka vɔlfaare eŋɛ, aŋa a Nemboore-yobo banaŋ naŋ ba baŋ Naaŋmen naŋ maŋ erɛ.

⁶ A ŋaa poɔ, neɛzaa ta wa saana o yɔɔ bee o yɔɔpuulee poɔ bee a faara ba, bonso, a Daana e la san-yaara a yɛlɛ ama zaa poɔ, aŋa lɛ te naŋ da daŋ yeli ko yɛ kyɛ kpãã yɛ ne te poɔ zaa.

⁷ Bonso, Naaŋmen ba boɔle te eŋ yeldɛgɛ poɔ, kyɛ sonnoŋ poɔ la ka O boɔle te eŋ.

⁸ Azuiŋ, soba na zaa naŋ zagra a wuluu ama ba zagra nensaalba yɛlɛ bara kyɛ a Naaŋmen naŋ maŋ ko yɛ a Vooroŋ Soŋ meŋ yɛlɛ la ka yɛ zagra.

⁹ Pampana, a kyaare ne a yɔɔmine ane a yɔɔpuuli nɔmmo, a ba fere ka neɛzaa sɛge a ko yɛ, bonso, Naaŋmen da wuli yɛ la ka yɛ nɔnɔ taa;

¹⁰ kyɛ serɛzaa, yɛ nɔŋ la a yɔɔmine ane a yɔɔpuuli zaa naŋ be a Masedoniya paaloŋ zaa poɔ. Kyɛ anealɛzaa, te poyɛŋ noba, te sɔrɔ yɛ la ka yɛ maaleŋ erɛ a lɛ yaga zaa,

¹¹ a moɔrɔ ka yɛ kpeɛrɛ ne maaroŋ, a kaara yɛmenne yɛlɛ zie a kyɛ tonɔ toma ne yɛmenne nuuri aŋa te naŋ da wuli yɛ lɛ,

¹² ka ka yɛ na toɔ̃ erɛ velaa korɔ a banaŋ naŋ ba poɔ a yɛ poɔ, a ta de yɛ toɔrɔ dɔgle neɛzaa zu.

A Daana Waabo Yɛlɛ

¹³ Te yɔɔmine ane te yɔɔpuuli, te ba boɔrɔ ka yɛ be babammo poɔ a kyaare ne a banaŋ naŋ kpi yɛlɛ, ka yɛ ta wa taa posaanaa aŋa ba mine naŋ ba taa teɛretɔroo naŋ maŋ erɛ lɛ.

¹⁴ Bonso, te naŋ sage de ka a Yeezu da kpie la kyɛ leɛ-iri yi a kũũ poɔ, a lɛ meŋ gba ka Naaŋmen na tu a Yeezu zie kyɛ de O ne a banaŋ naŋ da kpi wa ne.

¹⁵ Bonso, a yeli ŋa la ka te de a Daana yelbiri yele ne korɔ yɛ, ka a te banaŋ ba naŋ bare ka te naŋ voorɔ te ta a Daana waabo daare, koŋ baŋ de a banaŋ naŋ da kpi weɛ.

¹⁶ Bonso, a Daana meŋɛ na yi la tenvelaa sigi wa ne kɔkɔkpeɛŋaa, ka maleke kpoŋ kɔkɔre ane Naaŋmen eele koŋ, ka a noba naŋ kpi a Kirista eŋɛ daŋ iri yi a kũũ poɔ.

¹⁷ Lɛ la ka a te banaŋ ba naŋ bare ka te naŋ voorɔ, na laŋ ne ba a sagama poɔ ka te tuori a Daana a saluoni poɔ, ka te ne a Daana pãã te bebe tegitegilɛ.

¹⁸ Azuiŋ, yɛ yele yɛlɛ teɛrɛ taa ne a yelbie ama.